Масъалаҳои тавсеаи ҳамкории мақомоти иҷроияи маҳаллии ҳокимияти давлатии шаҳри Панҷакент дар татбиқи марҳалаи дуюми лоиҳаи “Идоракунии ҳамгирои захираҳои табиӣ дар водии Зарафшон барои рушди одилона ва устувор”(INVEST), ки дар ҳамкорӣ бо шарикони рушд амалӣ карда мешавад, дар мулоқоти раиси шаҳр Абдухолиқ Холиқзода бо роҳбари Лоиҳаи мазкур Зумрат Норматова мавриди баррасӣ қарор гирифт.

Зимни муҳокима масъалаҳои рафти татбиқи зерлоиҳаҳои татбиқшаванда ва пешбинишуда дар самтҳои таъминот бо оби нӯшокӣ ва полезӣ, фаъолияти шабакаҳо обрасонӣ, вусъат бахшидан ба татбиқи онҳо ва дигар зерлоиҳаҳо матраҳ карда шуданд.

Бо дастгирии мақомоти иҷроияи маҳаллии ҳокимияти давлатии шаҳри Панҷакент, саҳмгузории ассосиатсияҳои истифодабарандагони оби полезӣ бартараф намудани оқибати ярч дар канали Марғедар, ки тавассути он беш аз 5 ҳазор гектар замини кишт ва боғоти ҳудуди чор ҷамоати деҳот обёрӣ карда мешавад, идома дорад.

Тавре зимни боздиди раиси шаҳр Абдухолиқ Холиқзода аз рафти бартараф намудани оқибати офати табиӣ гуфта шуд, ҳоло гирифтани хоки теппаҳои соҳили чапи канал, ки эҳтимоли ярч ва банд кардани маҷрои об дар онҳо зиёд аст, бо ҷалби техникаю механизмҳои зарурӣ идома дорад.

Роҳбарияти идораи давлатии беҳдошти замин ва обёрии ҳавзаи дарёи Зарафшон ва дигар масъулон муваззаф карда шуданд, ки кори бартараф намудани оқибати ярч ва омода намудани ин иншооти муҳими обёриро ба бастани об шабонарӯзӣ идома дода, онро дар мӯҳлати кӯтоҳ ба анҷом расонанд.

Рафти корҳо ҷиҳати бартараф намудани оқибати ин офати табиӣ зери назорат ҳамарӯзаи мақомоти иҷроияи маҳаллии ҳокимияти давлатии шаҳр қарор дорад.

Бо иқдоми мақомоти иҷроияи маҳаллии ҳокимияти давлатии шаҳри Панҷакент дар канори шоҳроҳ ва гулгаштҳои хиёбони марказии шаҳр ниҳолҳои ороишии нодир шинонида мешавад.

Ин ниҳолҳо аз навъҳои такмилшудаи нахл, ардач, сада, санавбар , шоҳбулут, коҷ ва гулу буттаҳои дигари ороишӣ иборат буда, дар ҳамкорӣ бо шарикон аз Ҷумҳурии Ӯзбекистон дастрас карда шудааст ва бо маслиҳату дастури мутахассисон, бо риояи агротехникаи хос барои чунин навъҳо шинонида мешавад.

Бо сабз шудани ин ниҳолҳо хиёбони марказии шаҳр, ки номи сардафтари адабиёти классикии тоҷику форс Абӯабдуллоҳ Рӯдакиро дорад, қабои бо ҳам зебо ба бар хоҳад кард.

Бо ҷалби техникаи Идораи давлатии беҳдошти замин ва обёрии ҳавзаи дарёи Зарафшон ва саҳмгузорию иштироки сокинони деҳаи Чорбоғи Ҷамоати деҳоти Косатарош маҷрои канали Фарметан дар ҳудуди деҳа тоза ва соҳилҳои селроҳаи байни деҳа мустаҳкам карда мешавад.

Дар ҷараёни боздид аз Ҷамоати деҳоти Косатарош раиси шаҳри Панҷакент Абдухолиқ Холиқзода ин иқдомро муҳим арзёюбӣ намуда, ба масъулон ва ташаббускорон барои дар мӯҳлати кӯтоҳ анҷом додани ин корҳо дастур дода шуд.

Дар канори токзори навбунёди хавозавии деҳаи Ғӯсари Ҷамоати деҳоти Лоиқ Шералӣ бо ибтикори мақомоти иҷроияи маҳаллии ҳокимияти давлатии шаҳри Панҷакент нахустин боғи тамашк( малина) бунёд карда мешавад.

Дирӯз кишоварзон бо иштироки раиси шаҳр Абдухолиқ Холиқзода ба шинонидани ниҳоли ин меваи буттагӣ дар 20 ҳисса замин шурӯъ намуданд.

Гуфта шуд, ки ниҳоли навъи интенсивии ин мева, ки аз тариқи хавоза парвариш карда мешавад, нисбат ба навъи маъмулӣ зудрас ва серҳосил буда, он дар ҳамкорӣ бо кишоварзони ноҳияи Тайлоқи вилояти Самарқанди Ҷумҳурии Ӯзбекистон дастрас карда шудааст.

Дар он ҷо аз ин навъи тамашк ҳосили фаровон мегиранд ва он дар бозор харидорони зиёд дорад. Зимнан, тамашк ба ҷуз хуштаъм буданаш хосияти давоӣ дошта, барои шамолзанӣ,коҳиши ҳарорати баланд, хуб намудани кори дилу рагҳо, тоза кардани рагҳои хунгард истифода мешавад ва аз он шарбату мураббо низ омода менамоянд.

Муносибатҳои гуногунҷабҳаи дӯстонаи Ҷумҳуриҳои Тоҷикистон ва Ӯзбекистон ба шарофати сиёсати пешгирифтаи роҳбарони кишварҳо - Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Президенти Ҷумҳурии Ӯзбекистон , муҳтарам Шавкат Мирзиёев ба сатҳи комилан нав баромада, ҳоло чун намунаи равобити неки ҳамсоягӣ ва ҳалли масоили гуногун дар минтақа ва ҷаҳон баҳогузорӣ карда мешавад.

Инро тантанаҳои наврӯзӣ дар вилояти Суғд бо иштироки роҳбарони олии Тоҷикистон, Ӯзбекистон ва Қирғизистон, мулоқоти сарварони Тоҷикистону Ӯзбекистон дар ҳошияи Ҳамоиши Осиёи Марказӣ ва Иттиҳоди Аврупо дар шаҳри Самарқанд бори дигар собит менамояд.

Дар ин замина раиси шаҳри Панҷакент Абдухолиқ Холиқзода дар раъси як ҳайат ба шумули соҳибкорон, кишоварзон, саноатчиён аз ҳамсояноҳияҳои Тайлоқ, Ургут ва Ҷонбойи вилояти Самарқанди Ҷумҳурии Ӯзбекистон дидан намуда, бо таҷрибаи онҳо дар соҳаҳои гуногун, хоса кишоварзӣ ва саноат, ошно шуданд.

Дар ин сафар ҳайати шаҳри Панҷакентро ҳокими ноҳияи Тайлоқ Баҳодир Облоназаров, Ургут- Ботир Ҷабборов ва Ҷонбой- Хуршед Назаров роҳнамоӣ намуданд.

Зимни боздид аз ин ноҳияҳо ҳайати шаҳри Панҷакент бо таҷрибаи парвариши тамашк, истифодаи замин, бунёди гармхонаҳо, коргоҳҳои истеҳсоли шароб, маҳсулоти ширӣ ва гӯштӣ, боғҳои интенсивии себ, гелос, шафтолу дар майдонҳои васеъ, ки аз тариқи қатрагӣ обу ғизо дода мешаванд, ширкати “Боғбон”, ки ба сабзонидани навъҳои гуногуни интенсивии ниҳоли дарахтони мева ва ток аз ҳуҷайра машғул аст ва минтақаи озоди иқтисолии Ургут, ки соли 2017 дар масоҳати 1842 гектар таъсис ёфта, ҳоло онҷо дар даҳҳо коргоҳҳои истеҳсолӣ беш аз 5000 нафар ба шуғл фаро гирифта шудаанд, шинос гардиданд.

Дар ҷараёни боздид имкониятҳои роҳандозии ҳамкориҳо бо соҳибкорону кишоварзони шаҳри Панҷакент, омӯхтани таҷрибаи пешқадами тарафайн, ташкили корхонаҳои муштарак ва дигар ҷанбаҳои робитаҳои иқтисодӣ баррасӣ шуда, чунин боздидҳо барои густариши минбаъдаи ҳамкориҳои гуногунҷабҳаи иқтисодӣ ва фарҳангӣ муфид арзёбӣ шуд.

Ҳукумати Ҷумҳурии Тоҷикистон ба рушди соҳаи кирмакпарварӣ ва коркарди пилла чун заминаи воқеъӣ барои тавсеаи саноати сабук дар мамлакат эътибори ҷиддӣ дода, бо ин мақсад Барномаи рушди соҳаи кирмакпарварӣ ва коркарди пилла барои солҳои 2020-2024 мавриди иҷро қарор гирифт.

Дар ин асос мақомоти иҷроияи маҳаллии ҳокимияти давлатии шаҳри Панҷакент барои муҳайё намудани пойгоҳи хуроки кирмак тадбирҳои амалӣ андешид ва дар ҳудуди Ҷамоати деҳоти Саразм дар панҷ гектар тутзор бунёд карда шуд.

Тавре дар намояндагии ҶСК “Пиллаи тоҷик” дар шаҳри Панҷакент иттилоъ доданд, дар ин ҷо беш аз 30 ҳазор бех ниҳоли тути навъи буттагии паҳнбарг шинонида шудааст, ки ҳар бехи он то панҷ кило барг медиҳад ва он барои рушди соҳаи кирмакпарварӣ ва истеҳсоли пилла- чун ашёи хоми саноатӣ, заминаи боэътимод мегузорад.

Ҳоло нигоҳубин ва парвариши тутзори нав тибқи қоидаҳои агротехникӣ ба роҳ монда шудааст ва дар канори он садҳо бех дигар навъи дарахтон низ шинонида мешавад.

Дар саҳни майдони муҷассамаи Шоҳ Исмоили Сомонии шаҳри Панҷакент бо иштироки фаъолон, роҳбарони ташкилоту муассисаҳо, падару модарон ва наздикони наваскарон ҷиҳати иҷрои Фармони Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон, муҳтарам Эмомалӣ Раҳмон аз 19 феврали соли 2025, № 967 «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007 ба сафи Қувваҳои Мусаллаҳи Ҷумҳурии Тоҷикистон ба хизмати ҳарбӣ» маросими гусели нахустин гурӯҳи даъватшавандагон ба хидмати Модар – Ватан баргузор шуд.

Беш сесад нафар даъватшавандагон, ки аксарашон бо амри дил хидмати Ватанро ихтиёр намудаанд ва дар мактаби Ташкилоти мададгори мудофиа касб омӯхтаанд, бо Парчам ва шиорҳои ватандӯстона дар даст, зери садои мусиқӣ ба майдон ворид шуда, саф оростанд.

Даъватшавандагон, падару модарон, дигар ҷамъомадагонро аз номи раиси шаҳр Абдухолиқ Холиқзода муовини раиси шаҳр Мурод Шукурзода бо оғози маъракаи даъвати баҳории хидмати ҳарбӣ – Рӯзи даъватшаванда, табрик гуфт.

Таъкид шуд, ки солҳои охир садҳо нафар ҷавонони шаҳри Панҷакент ба таври ихтиёрӣ, бо амри дил ва ифтихори баланди ватандӯстӣ ба комиссариати ҳарбии шаҳр муроҷиат намуда, омодагиашонро барои хидмати Ватан изҳор медоранд ва даъватшавандагони имрӯза аз ҷумлаи чунин ихтиёриёни ватандӯст мебошанд.

Аз номи ихтиёриён даъватшавандагон сухан карда, омодагӣ ва азму талошашонро барои хидмати содиқона, ҳифзи марзу буми кишвар баён намуданд.

Дар ҷамъомад ҳамчунин падару модарон ба наваскарон хидмати шоиста ва роҳи сафед орзу карданд.

Дар идома ба гурӯҳи даъватшавандагон - хатмкардагони мактаби Ташкилоти мададгори мудофиа, шаҳодатномаи ронандагӣ супорида шуд.

Маросими анъанавии нони насиба, машқҳои варзишии низомӣ аз ҷониби сарбозони қисмҳои ҳарбӣ ва барномаи ҷолиби ҳунарии санъаткорони шаҳр бо шеъру сурудҳои ватандӯстона, рақсҳои ҷаззоб анҷомбахши маросими гусели гурӯҳи аввали даъватшавандагон ба хидмати Модар – Ватан буд.

Дар рӯзи нахустини даъвати баҳорӣ бо фотиҳаи волидон ва зери навои мусиқӣ гурӯҳи аввалин иборат аз 306 нафар ҷавонони шаҳри Панҷакент ба хидмати ҳарбӣ гусел карда шуданд, 

Бо дастгирии мақомоти иҷроияи маҳаллии ҳокимияти давлатии шаҳри Панҷакент дар Ҷамоати деҳоти Сӯҷина ҷиҳати иҷрои нақшаи бунёди иншооти таъиноти гуногун ба ифтихори 35-умин солгарди истиқлоли давлатии Ҷумҳурии Тоҷикистон бо ҷалби соҳибкорон идома меёбанд.

Раиси шаҳр Абдухолиқ Холиқзода зимни боздид аз Ҷамоати деҳот бо рафти бунёди корхонаи истеҳсоли шифер, ки дар соҳили дарёи Зарафшон бо сармоягузории соҳибкор Фариз Камолов бунёд мешавад, шинос шуд.

Гуфта шуд, ки ҳоло қисми таҷҳизот аз Ҷумҳурии Чин ворид шуда, омода намудани он барои насб ва бунёди биноҳои истеҳсолию ёрирасон идома додад ва барои ин техникаю таҷҳизот ва қувваи корӣ ҷалб карда шудааст.

Дар маркази деҳа бошад, бо сармояи соҳибкор Машраб Эгамбердиев сохтмони маркази хидматрасонӣ иборат аз ҳаммоми замонавӣ ва толори чорабиниҳои идона идома дорад ва ҳоло намои берунаи он бо ҷалби устоҳо аз шаҳри Самарқанди Ҷумҳурии Ӯзбекистон бо усули миллии ғаҷкорӣ ороиш дода мешавад.

Дар ин боздид ҳамчунин бо рафти омодагиҳо барои бунёди маркази истироҳатӣ дар соҳили дарёи Зарафшон аз ҷониби соҳибкор Рустам Наҷмиддинов шинос шуда, барои анҷоми таҳияи лоиҳа ва санадгузорӣ дастур дода шуд.

Субҳи имрӯз ба Наврӯзгоҳи имсолаи шаҳри Панҷакент, ки дар гулгашти назди бинои мақомоти иҷроияи маҳаллии ҳокимияти давлатии шаҳр, майдони Парчаму Нишони давлатӣ ва варзишгоҳи марказӣ ҷойгир шудааст, аз тариқи дарвозаҳои рамзӣ ҳазорон нафар сокинон ва меҳмонони шаҳр ворид шуда, ба тантанаҳои наврӯзӣ мепайвастанд ва ҳамдигарро бо фарорасии ин ҷашни миллӣ ва ҷаҳонӣ шодбош мегуфтанд.

Дастархони наврӯзии ҷамоатҳои деҳот, маҳаллаҳои шаҳр, корхонаҳо, муассисаҳои таълимиро дар растаҳои идона намунаи ҳунарҳои мардумӣ, таъомҳои миллӣ, аз ҷумла рамзи Наврӯз- “Ҳафт син”-у “Ҳафт шин” оро медоданд ва бонувон ҳама либосҳои атласу адрас ва чакан ба бар намуда буданду аз ҳар гӯша садои мусиқию суруд ба гӯш мерасид.

Аз дирӯз бонувони ҳунарманди шаҳр дар дегҳои бузург рамзи дигари Наврӯз- сумалак, омода карда буданд ва он низ дастархони наврӯзиро оро медод.

Намояндаи Ҳукумати Ҷумҳурии Тоҷикистон, Президенти Академияи миллии илмҳои кишвар Қобилҷон Хушвақтзода, муовини якуми раиси вилояти Суғд Суҳайлӣ Қурбонзода, раиси шаҳр Абдухолиқ Холиқзода, дигар меҳмонон аз растаҳои наврӯзӣ дидан намуда, ба ҳунари сокинони шаҳр аҳсант хонда, онҳоро бо фарорасии Наврӯзи хуҷастапай шодбош гуфтанд.

Қисмати фарҳангии ҷашни Наврӯзи ҷаҳонӣ дар варзишгоҳи марказии шаҳр бо ҳузури ҳазорон нафар сокинони шаҳр баргузор шуд. Ҳозирин ва сокинон шаҳрро аз номи Ҳукумати мамлакат Президенти Академияи миллии илмҳо, аз номи муовини авали раиси Маҷлиси миллии Маҷлиси Олии кишвар, раиси вилояти Суғд, муҳтарам Раҷаббой Аҳмадзода муовини якуми раиси вилоят ва раиси шаҳр бо ҷашни Наврӯз муборакбод гуфтанд.

Таъкид шуд, ки ба фармудаи Пешвои муаззами миллат, Президенти Ҷумҳурии Тҷикистон, муҳтарам Эмомалӣ Раҳмон барҳақ “Тоҷикистони соҳибистиқлоли мо ва мардуми покниҳоду фарҳангпарвари он меросбари ҳақиқии ин ҷашни оламгир эътироф шудаанд, зеро тамоми суннату ойинҳои инсонпарваронаи Наврӯз маҳз дар сарзамини аҷдодии мо ва дар тамоми қаламрави кишвари биҳиштосоямон поку беолоиш ҳифз гардидаанд.Яъне Тоҷикистони маҳбуби мо воқеан Ватани аслии Наврӯз аст”

Гуфта шуд, ки сокинони шаҳри Панҷакент ин ҷашни миллӣ ва ҷаҳониро бо дастовардҳо дар ҳама соҳаҳои иқтисод, вусъати кишту кор ва ободкориву сабзгардонӣ, бо рӯҳи болида ва шукргузорӣ аз сулҳу суботи кишвар таҷлил менамоянд.

Дар тантанаҳои ҷашни наврӯзи шаҳр ҳамчунин меҳмонон аз Ҷумҳурии Ӯзбекистон, сайёҳон аз Ҷумҳурии исломии Эрон иштирок намуданд.

Барномаи фарҳангии ин ҷашни куҳан бо иштироки ҳунармандони номвари кишвар Хосияти Зарафшонӣ, Эркин Одинаев, Орзугул Хӯҷамова, Ҳунарманди халқии Тоҷикистон ва Ӯзбекистон Мардон Мавлонов, санъаткорон аз шаҳри Бухоро ва шаҳр ба тантанаҳои наврӯзӣ ҳусни тоза зам намуд.

Ҷашни Наврӯз дар ҳамаи корхонаю муассисаҳо,ҷамоатҳои деҳот маҳаллаҳо ва ҳар хонадон бо рангу ҷилои тоза таҷлил карда мешавад.

Рафти иҷрои “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025” дар ҷаласи васеъи Шӯрои ҳамоҳангсози мақомоти ҳифзи ҳуқуқи шаҳри Панҷакент бо иштироки доираи васеъи фаъолони шаҳр, роҳбарони корхонаю муассисаҳо , сарварони муассисаҳои таълимӣ, раисони ҷамоатҳои деҳот, ҷавонону бонувон мавриди баррасӣ қарор гирифт.

Дар ифтитоҳи ҷаласа раиси Шӯро, прокурори шаҳр, мушовири адлияи дараҷаи 1 Искандар Раҳматзода таваҷҷӯҳи ҳозиронро ба рафти иҷрои нишондодҳои Стратегияи мазкур, мушкилоте, ки дар ин самт ҷой доранд ва вазифаҳо ҷиҳати иҷрои он ҷалб намуд

Зимни шунидани натиҷаҳои санҷиши мақомоти прокуратура ва шуъбаи корҳои дохилӣ оид ба иҷрои талаботи “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025” дар ташкилоту муассисаҳои шаҳр аз ҷумла гуфта шуд, ки ҳанӯз ҳодисаҳои гароиш ба ақоиди экстремистию таррористӣ, ифротгароии динӣ дар шаҳр ба мушоҳида мерасанд ва даҳҳо нафар бо ин қонуншиканӣ дар ҷустуҷӯ қарор доранд. Ҳамчунин оид ба гароиши ҷавонон ба ақоиди ифротии динӣ, ба таълими ғайриқонунии динӣ ҷалб намудани наврасон низ мисолҳо оварда, гуфта шуд, ки як сабаби он робитаи сусти волидон бо фарзандонашон, ки дар муҳоҷират дар хориҷи мамлакат қарор доранд ва беназорат гузоштани наврасону ҷавонон дар истифода аз шабакаҳои иҷтимоии интернетӣ мебошад.

Дар ҷаласа гузоришҳо оид ба чорабиниҳое, ки дар ин самт ниҳодҳои мақомоти иҷроияи маҳаллии ҳокимияти давлатии шаҳр, аз ҷумла бахши кор бо ҷавонон ва варзиш, шуъбаи маориф, шуъбаи рушди иҷтимоӣ ва робита бо ҷомеаи дастгоҳи раиси шаҳр доир намудаанд, шунида, ҷиҳати тақвияти ин корҳо дар байни аҳолӣ, фаҳмонидани хатару оқибати гароиш ба ақоиди ифротӣ, хоса ифротгароии динӣ, пешгирии ин падидаҳо дастур дода, вазифаҳои ин ниҳодҳо мушаххас баён карда шуданд.

Таъкид шуд, ки ба иҷрои вазифаҳое, ки дар “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025” муайян карда шудаанд, бояд дар ҳар ташкилоту муассиса, ҷомеаи меҳнатӣ, ҷамоатҳои деҳот, маҳаллаҳои шаҳр, ҳар оила ба хотири эмин доштани ҷомеа аз ин хатар, таҳкими сулҳу субот, тарбияи насли худшиносу ватандӯсту бомаърифат, ҳифзи манофеи миллат ва давлат бо камоли масъулият муносибат намоянд.

Бо дастгирию мусоидати мақомоти иҷроияи маҳаллии ҳокимияти давлатии шаҳри Панҷакент ва саҳмгузории соҳибкорон ва волидон дар назди муассисаи таҳсилоти миёнаи умумии № 81 -и маҳаллаи нави деҳаи Чорбоғи Ҷамоати деҳоти Косатарош сохтмони синфхонаҳои иловагӣ идома дорад.

Дар ҷараёни шиносоии раиси шаҳр Абдухолиқ Холиқзода аз рафти сохтмон гуфта шуд, ки он аз панҷ синфхона иборат буда, ҳоло бардоштани деворҳо идома дорад.

Бо анҷоми сохтмон дар онҳо 250 нафар хонандагон дар ду баст ба таҳсил фаро гирифта мешавад.

Зимни боздиди муассисаи таҳсилоти миёнаи умумии № 108, деҳаи Ҷомчашма бошад омӯзгорон ва сокинони деҳа сӯҳбат карда, онҳо барои дуруст ба роҳ мондани таълими кӯдакон ва ободу зебо намудани деҳа даъват карда шуданд.

Дар калонтарин коргоҳи коркарди маъдани кӯҳии мамлакат- корхонаи муштараки “Зарафшон”, бо ибтикори роҳбарият ва кумитаи иттифоқи касаба ҷашни Наврӯз бо шукуҳу шаҳомат таҷлил карда шуд.

Раиси шаҳри Панҷакент Абдухолиқ Холиқзода зимнии сафари корӣ ба Ҷамоати деҳоти Косатарош дар тантанаҳои наврӯзии коргоҳ иштирок намуда, онҳоро бо фарорасии ин ҷашни ҷаҳонӣ шодбош гуфт ва таъкид дошт, ки нақшу ҷойгоҳи ин коргоҳи азим дар рушди саноат ва ғанӣ гардонидани буҷети на танҳо шаҳр, балки вилоят ва ҷумҳурӣ калон аст.

Гуфта шуд,ки ҷашни қадимаи Наврӯз, ки шаш ҳазор сол қабл мардуми ориёнажод ба он асос гузошта, имрӯз ҳамчун рамзи эҳёи табиат, шодию нишот дар тамоми ҷаҳон таҷлил карда мешавад, аз оғоз ҳамин маъниро таҷассум менамуд ва ба ҳамин хотир бо пешниҳоди кишварҳои ҳавзаи Наврӯз ба Феҳристи мероси ҷаҳонии созмони ЮНЕСКО шомил шуд.

Ба ифтихори ҷашни Наврӯз кормандони фаъоли муҳандсӣ- техникӣ ва коргарони корхона бо сипоснома мукофотҳои идона қадршиносӣ карда шуданд ва барномаи ҷолиби ҳунарӣ анҷомбахши тантанаҳои наврӯзӣ буд.

Тавре хабар дода будем, рӯзи 17 марти соли равон ба ифтихори ҷашни Наврӯз бори нахуст дар варзишгоҳи марказии шаҳри Панҷакент бо ибтикори Кумитаи кор бо ҷавонон ва варзиши назди Ҳукумати Ҷумҳурӣ, мақомоти иҷроияи ҳокимияти давлатии вилояти Суғд ва шаҳри Панҷакент, Федератсияи байналмилалии гӯштингирӣ мусобиқаи байналмилалӣ оид ба гӯштингирӣ бо иштироки варзишгарон аз ҷумҳуриҳои Ӯзбекистон, Қирғизистон, Федератсияи Русия, Ҷумҳурии исломии Эрон ва Тоҷикистон баргузор шуд.

Дар маросими ифтитоҳ ва ҷамъбасти он роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон,Федератсияи байналмилалии гуштингирӣ, намояндаи мақомоти иҷроияи ҳокимияти давлатии вилояти Суғд ва раиси шаҳри Панҷакент Абдухолиқ Холиқзода иштирок ва суханронӣ намуданд.

Дар ин мусобиқаи байналмилалӣ варзишгарони ҷумҳуриҳои Тоҷикистон ва Ӯзбекистон аз ҳама бештар нишон ба даст оварда, соҳиби мукофотҳои пулии таъсиснамудаи кумитаи тадорукоти мусобиқа шуданд.

Ин мусобиқаи байналмилалиро ҳайати иштирокчиёни Фестивали ҷаҳонии ҷавонон "Navruz Youth World Festival" низ тамошо карданд.

Маънию мӯҳтавои ин ҳикмати халқиро кишоварзони Ҷамоати деҳоти Халифа Ҳасани шаҳри Панҷакент хуб дарк менамоянд.

Аз ин ҷост, ки бо истифода аз обу ҳавои мусоиди баҳорӣ ҳоло дар хоҷагиҳои деҳқонии ҳудуди ҷамоати деҳот ҳамарӯза ҳашари картошкашинонӣ идома меёбад.

Зимни боздид аз рафти ҳашари картошкашинонӣ дар хоҷагиҳои ба номи Мирзобобо Қиёмов ва “Меҳнатобод” иттилоъ доданд, ки имсол деҳқонони ҷамоати деҳот дар майдони 535 гектар картошка шинониданианд ва қисми бештари онро кишти барвақтии ин зироат ташкил медиҳад.

Дар хоҷагиҳои ҷамоати деҳоти Ёрӣ низ деҳқонон аз рӯзҳои офтобӣ босамар истифода намуда, кишти картошкаро вусъат медиҳанд. Бо истифода аз таҷрибаи деҳқонони кордида, пеш аз кишт ба заминҳо нуриҳои маҳаллӣ, аз қабили пору ва хоки бегона, барои беҳтар намудани таркиби хок дар баъзе қитъаҳо қуми маҳин мерезанд.

Ба гуфти деҳқонон бо ин васила ҳосилнокии картошкаро, ки ба ғизо серталаб мебошад, ба мартиб зиёд намудан мумкин аст.

Санаи 12 март иҷлосияи якуми Маҷлиси вакилони халқи шаҳри Панҷакент, даъвати ҳафтум, баргузор шуд.

Дар кори иҷлосия, ки таҳти раёсати раиси шаҳр Абдухолиқ Холиқзода баргузор шуд, муовини якуми раиси вилояти Суғд Суҳайлӣ Қурбонзода, намояндагони комиссияи шаҳрии интихобот, роҳбарони сохторҳои мақомоти ҳифзи ҳуқуқ, вакилони ҷамоатҳои деҳот иштирок доштанд.

Дар оғози иҷлосия дар асоси маърӯзаи раиси комиссияи шаҳрии интихоботи Маҷлиси вакилони халқи шаҳр Мақсуд Мизробзода ваколати вакилони Маҷлиси вакилони халқи шаҳр, ки рӯзи 2-юми марти соли равон дар интихобот ба Маҷлиси намояндагони Маҷлиси Олӣ ва маҷлисҳои маҳаллӣ интихоб шудаанд, тасдиқ карда, дар ин бора қарор ба тасвиб расониданд.

Тибқи талаботи Қонуни Ҷумҳурии Тоҷикистон “Дар бораи вазъи ҳуқуқии вакили Маҷлиси вакилони халқи вилояти Мухтори Кӯҳистони Бадахшон, вилоят, шаҳри Душанбе, шаҳр ва ноҳия” вакилони Маҷлиси шаҳрӣ савганд ёд карданд.

Дар идомаи иҷлосия вакилон Дастури Маҷлиси вакилони халқи шаҳр ва Низомномаи комиссияҳои доимии Маҷлиси вакилони халқи шаҳрро тасдиқ намуда, оид ба ҳайати комиссияҳои доимии Маҷлиси вакилони халқи шаҳр қарор ба тасвиб расонида, қарорҳои раиси шаҳрро тасдиқ карданд.

Тибқи рӯзномаи иҷлосия вакилон масъалаи пешниҳоди номзад ба аъзогии Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботиии Суғд, № 2-ро баррасӣ карда, номзадии раиси шаҳри Панҷакент Абдухолиқ Холиқзодаро ба ин маснад пешбарӣ намуданд ва дар асоси талаботи Қонуни конститутсионии Ҷумҳурии Тоҷикистон “Дар бораи интихоботи Маҷлиси миллии Маҷлиси Олии Ҷумҳурии Тоҷикистон” аз тариқи овоздиҳии пӯшида овоз дода, дар ин бора қарор қабул карданд.

Ҳамчунин вакилон рӯйхати вакилони Маҷлиси вакилони халқи шаҳри Панҷакент, даъвати ҳафтумро ба ҷаласаи якҷояи ҳамаи мақомоти намояндагии вилояти Суғд оид ба интихоботи аъзои Маҷлиси миллии Маҷлиси Олии Ҷумҳурии Тоҷикистон аз ҳавзаи интихоботии Суғд, № 2 тасдиқ намуда, дар ин бора қарор қабул карданд.

Вакилон дар бораи ҳамаи масъалаҳои рӯзномаи иҷлосияи якуми Маҷлиси вакилони хадқи шаҳр, даъвати ҳафтум қарор ба тасвиб расониданд.