Дар доираи ҳамкориҳои Ҳукумати Ҷумҳурии Тоҷикистон бо Амороти Муттаҳидаи Араб бо дастгирии мақомоти иҷроияи маҳаллии ҳокимияти давлатии шаҳр ва сармоягузории ташкилоти байналмилалии хайриявии Шарҷа аз ҷониби ташкилоти ҷамъиятии хайриявии “Тоҷикистон” дар қарибии деҳаи Гулистони Ҷамоати деҳоти Ворӯ деҳаи нав бунёд карда мешавад.

Тибқи лоиҳа дар навбати аввал дар деҳаи нав, ки дар заминҳои бо қарори Ҳукумати мамлакат ва мақомоти иҷроияи маҳаллии ҳокимияти давлатии шаҳр барои оилаҳои эҳтиёҷманд ҷудо шуда буд, ҷойгир аст, барои 25 оилаи эҳтиёҷманди Ҷамоати деҳоти Ворӯ хонаҳои истиқоматии дорои се ҳуҷраи истиқоматӣ ва дигар ҳуҷраҳои ёрирасон сохта, хати барқ ва оби нӯшокӣ гузаронида,бунёди бинои муассисаи таълимӣ ва нуқтаи тиббӣ низ дар назар дошта шудааст.

Зимни боздиди раиси шаҳр Абдухолиқ Холиқзода аз маҳали сохтмон ба масъулон ҷиҳати дар мӯҳлати пешбӣинишуда ба анҷом расонидани сохтмони биноҳои истиқоматӣ, хати об, бинои муассисаҳои таълимӣ ва тиббӣ дастур дода шуд.

Додавра мазеъест болотар аз деҳаи Нигноти Ҷамоати деҳоти Рӯдакии шаҳри Панҷакент. Собиқа ин ҷо замини ноободи санглохи лалмӣ ва ғайрикишоварзӣ буд ва чизе ба ҷуз алафҳои хурӯй намерӯид.

Ҳоло ин ҷо боғест сабзгуну дилрабо ва меваҳояш хуштаъму сероб ва дидарабо. Ҳамаи ин самараи заҳмати сангини кишоварзи соҳиби таҳсилоти олии агрономӣ, боғбони варзида, сокини деҳаи Нигнот Маҳкамбой Ҷӯраев аст.

Ӯ баъди хатми донишкадаи кишоварзӣ чандин сол дар собиқ хоҷагии ҷамоавии ба номи Рӯдакӣ агрономи соҳаи боғдорӣ буд ва бо талошҳои ӯ беш аз 200 гектар боғ бунёд шудааст. Баъди ислоҳоти сохтори соҳаи кишоварзӣ ӯ аз тариқи шартнома обод намудану бунёди боғро дар ин мавзеъи нообод ба ӯҳда гирифт, аз 1,5 километр ба он аз тариқи лӯлаҳо об овард, 1,5 гектар замини санглохро обод намуду боғ бунёд кард.

Тӯли 30 сол Додавра бо заҳмати сангини Маҳкамбой Ҷӯраев ва аҳли оилааш ба боғистони зебою серҳосил бадал шуд.

Зимни боздиди раиси шаҳр Абдухолиқ Холиқзода иттилоъ дода шуд, ки дар ин боғ ҳоло беш аз ҳазор бех навъҳои гуногуни себ, зардолу, шафтолу, биҳӣ, олуболу, ҳазорҳо без санҷиду ҳулул парвариш карда мешавад ва ҳоло ҷамъоварии ҳосил идома дорад.

Аз ҳосили фаровони боғи Маҳкамбой Ҷӯраев ҳар сол садҳо нафар даҳон ширин мекунанд ва рӯзгораш низ аз он обод аст.

Дар ин сафар раиси шаҳр ҳамчунин аз мавзеъи Шӯрхоки деҳа, ки бо сармоягузории шарикони рушд он ҷо бо кашидани хати об аз масофаи 3,5 километр беш аз 80 гектар замини лалмӣ обёрӣ ва дар оянда боғ бунёд карда мешавад,боздид намуд.

Ҷаласаи навбатии Шӯрои мутобиқсозию методӣ оид ба таълим ва тарбияи ҳуқуқии шаҳрвандони назди раиси шаҳри Панҷакент баргузор шуд.

Дар ҷаласа, ки таҳти роҳбарии раиси шаҳр, раиси Шӯро Абдухолиқ Холиқзода бо иштироки муовинони раиси шаҳр, роҳбарону кормандони мақомоти ҳифзи ҳуқуқ, аъзоёни комиссияи шаҳрии даъват ба хидмати ҳарбӣ, масъулони маъракаи даъвати ҷавонон ба хидмати ҳарбӣ, раисони ҷамоатҳои деҳот ва маҳаллаҳои шаҳр доир шуд, рафти иҷрои Фармони Президенти Ҷумҳурии Тоҷикистон аз 29 августи соли 2025, №1070 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” мавриди баррасӣ қарор гирифт.

Зимни шунидани гузориши масъулон, пурсиши раисони маҳаллаҳо ва ҷамоатҳои деҳот рафти омодагӣ ба маъракаи тирамоҳии даъвати ҷавонон ба хидмати ҳарбӣ баррасӣ гардида, таваҷҷӯҳи онҳо ба тавсеаи корҳои тарғиботию ташкилӣ бо ҷавонони синни даъватӣ, волидони онҳо, шаффофияти фаъолияти комиссияи шаҳрии даъват, пешгирии амалҳои коррупсионӣ ва дигар масъалаҳои марбут ба даъвати ҷавонон ба хидмати ҳарбӣ, иҷрои пеш аз мӯҳлати нақшаи даъват ба хидмати ҳарбӣ ҷалб карда шуд.

Дар ҷаласаи Шӯро ҳамчунин ба масъулин ҷиҳати тавсеаи таълим ва тарбияи ҳуқуқии шаҳрвандон, ки омили муҳими тарбияи ватандӯстӣ ва омода намудани ҷавонон ба хидмати ҳарбӣ аст, дастур дода шуд.

Дар мақомоти иҷроияи маҳаллии ҳокимияти давлатии шаҳри Панҷакент бо иштироки прокурори шаҳр, мушовири адлияи дараҷаи 1 Искандар Раҳматзода, корманди масъули прокуратураи вилояти Суғд Зафар Назарзода, муовини раиси шаҳр Эркин Хушвақтзода, кормандони мақомоти ваколатдори давлатии назоратию санҷишии шаҳр машварат доир шуд.

Дар ҷамъомад ба таваҷҷӯҳи кормандони мақомоти назоратию санҷишӣ, аз ҷумла корҳои дохила, муҳофизат аз сӯхтор, маркази назорати санитарию эпидемиологӣ, ҳифзи муҳити зист, хоҷагии ҷангал, агентии “Тоҷикстандарт” нуктаҳои асосии Қонуни Ҷумҳурии Тоҷикистон «Дар бораи мораторий ба санҷишҳои фаъолияти субъектҳои соҳибкорӣ», ки дар заминаи дастури Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии Ҷумҳурӣ таҳияю қабул шуда, аз моҳи феврали соли равон мавриди амал қарор дорад, расонида шуд.

Таъкид шуд, ки дар давраи татбиқи Қонуни мазкур муқаррароти қонунгузории Ҷумҳурии Тоҷикистон вобаста ба санҷишҳои фаъолияти субъектҳои соҳибкорӣ, ба истиснои ҳолатҳои пешбининамудаи ҳамин Қонун, аз ҷумла мақомоти андоз, боздошта мешавад ва муқаррароти он бояд аз ҷониби мақомоти назоратию санҷишӣ қатъӣ риоя карда шавад.

Рисолати бузурги таърихию адабии сардафтари адабиёти классикии тоҷику форс, устод Абӯабдуллоҳи Рӯдакиро Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар китоби “Чеҳраҳои мондагор” на танҳо чун поягузори адабиёти тоҷик, балки рамзи бедориву худшиносӣ, ҷовидонагии адаб ва фарҳанги миллати куҳанбунёди тоҷик донистаанд.

Ин баҳои Пешвои миллат ба нақши абарустод Абӯабдуллоҳ Рӯдакӣ дар маросими таҷлили Рӯзи Рӯдакӣ, ки дар шаҳри Панҷакент доир гардид, борҳо ба забон оварда шуд.

Таҷлили Рӯзи Рӯдакӣ бо баргузории конфронси байналмилалии илмӣ- адабии “Рӯдакӣ ва эҳёи фарҳанги тоҷикон”, ки бо ибтикори мақомоти иҷроияи маҳаллии ҳокимияти давлатии шаҳр, пажӯҳишгоҳи забон ва адабиёти ба номи Абӯабдуллоҳ Рӯдакии Академияи миллии илмҳо ва Донишкадаи омӯзгории Тоҷикистон дар шаҳри Панҷакент доир шуд, оғоз гардид.

Аз минбари Кохи Лоиқи шаҳр олимон , пажӯҳишгарони осору аҳволи устод Рӯдакӣ дар бораи паҳлӯҳои ҳунари шоирӣ, нашри осори ӯ дар даврони истиқлол маърӯза карданд.

Муҳаққиқони осори устод Рӯдакӣ, меҳмонони ҷашнвора аз Ӯзбекистон, Чин, Ҷумҳурии исломии Эрон, аҳли адабу фарҳанги шаҳр, ҳаводорони назми оламгири шоир оромгоҳи ӯро дар Панҷруд зиёрат карда, дар маҳфили бузургдошти шоир иштирок намуда, ба пояи муҷассамаи шоир дар боғи канори рӯди Уреч ва дар саҳни осорхонаи ҷумҳуриявии ба номи Рӯдакӣ ба нишони эҳтиром гул гузоштанд.

Маҳфили адабию фарҳангӣ бахшида ба Рӯзи Рӯдакӣ дар саҳни майдони Парчами давлатии маркази шаҳр бо сухани табрикии раиси шаҳр Абдухолиқ Холиқзода оғоз шуда,дар бораи мақоми устод Рӯдакӣ адабиётшинос, доктори илми филологӣ, раиси Бунёди Рӯдакӣ Абдунабӣ Сатторзода, раиси бахши шаҳрии Иттифоқи нависандагони Тоҷикистон Исмоил Зарифӣ сухан карданд.

Аз ҷумла гуфта шуд, ки устод Рӯдакӣ адабиёти моро чунон бунёд ниҳод, ки то ба рағми ҳама гирдоби воқеаҳои пурпечутоби таърих пойдор бимонад ва бо ҳиммату истеъдоди ворисони сазовор боз ҳам муҳташаму тавоно гардад.

Дар Тоҷикистон бо ибтикори Пешвои миллат, муҳтарам Эмомалӣ Раҳмон номи мубораки устод Абуабдулоҳ Рӯдакӣ ба ноҳия, ҷамоат, деҳаҳо, хиёбону кӯчаҳо, майдону боғҳо, муассисаҳои фарҳангӣ гузошта, осораш борҳо ба нашр расида, оромгоҳи шоир таҷдиду азнавсозӣ гардида, ҳоло ба Маккаи ҳаводорони шеъри оламгири устод аз ҳама гӯшаҳои олам табдил ёфтааст.

Барномаи ҳунарии санъаткорони шаҳр, ки аз сурудҳо ба ашъори устод Рӯдакӣ, қироати шеърҳои шоир, рақсҳои ҷаззоб мураттаб шуда буд, ба иштирокчиёни ҷашнвора таассуроти ҷолиб боқӣ гузошт.

Ба ифтихори Рӯзи Рӯдакӣ дар ҳама муассисаҳои таълимӣ, ҷамоатҳои деҳот, корхонаю муассисаҳои шаҳр ҷамъомаду маҳфилҳо баргузор шуданд.

Ҳамдиёрони арҷманд!

Меҳмонони гиромӣ!

Ҳамаи шуморо бо Рӯзи Рӯдакӣ, ки ҳамасола 22 сентябр ба хотири бузургдошти сардафтари адабиёти классикии тоҷику форс, устод Абӯабдуллоҳи Рӯдакӣ дар саросари Тоҷикистон таҷлил карда мешавад, самимона муборакбод мегӯям.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барҳақ таъкид намудаанд, ки «Устод Рўдакӣ бо қудрати ҷонофарини сухан, ҳикмату дониши комил ва маҳорату ҳунари шоирии худ тавонист ҷаҳони шеъри тоҷикиро бо ашъори ҷовидонаи худ бекарона созад. Аз ин рў номи Рўдакӣ рамзи ҷовидонаи шеъри ҳакимонаву оламгири мо мебошад».

Ба шарофати истиқлол ва соҳибихтиёрии Тоҷикистон бо раҳнамоии Пешвои миллат имкон пайдо гардид, ки бо кору пайкори бузургони илму адаб тавассути ба интишор расидани мероси пурғановати онҳо бештару хубтар ошно гардем, ба қадри эҷодашон расем ва номашонро нигоҳ дорем.

Имрӯз ҳам шеъри волову сухани миллатсози устод Рӯдакӣ ба рамзи фарҳанги оламгири тоҷик ва хирадмандиву созандагиву накӯкорӣ табдил ёфта, дар шинохт ва беҳбуди асолати миллӣ нақши муҳим мегузорад. Фарзандони мо бо шеъри ӯ дарси маърифату одамгарӣ, хираду садоқат, муҳаббат ба Ватан ва парастиши онро меомӯзанд.

Шоҳбайти безаволи устод Рӯдакӣ:

Ин ҷаҳонро нигар ба чашми хирад,

Не бад-он чашм к-андар ӯ нигарӣ.

Ҳамчу дарёст в-аз накӯкорӣ,

Киштие соз то бад-он гузарӣ.

худ як китоби пурмаънист, ки ҳазорсолаҳо шиори зиндагии насли башар шудааст

Дар Тоҷикистон номи мубораки устод Абуабдулоҳ Рӯдакӣ ба ноҳия, ҷамоат, деҳаҳо, хиёбону кӯчаҳо, майдону боғҳо, муассисаҳои фарҳангӣ гузошта, муҷассамаи султони шоирон майдонҳои пойтахт ва аксар шаҳру ноҳияҳои мамлакатро ҳусну тароват бахшидаанд.

Боиси ифтихори мост, ки бештар аз 200 сол аст, ки донишмандони Ғарбу Шарқ дар ҷустуҷӯ, таҳлилу тафсир ва ҷамъоварии ашъори Рӯдакӣ машғуланд. Бо иқдоми наҷибонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ашъори устод Рӯдакӣ дар шакли куллиёт ва ба забонҳои гуногун бо сифати баланд чоп гардида, ба ҳаводорони назми оламшумули тоҷик пешкаш шуданд.

Рӯзи Рӯдакӣ ба ташаккули ҳисси ифтихори миллию ватанпарастии наслҳои имрӯзаву оянда неру мебахшад ва масъулияти онҳоро дар рушду пешрафти Тоҷикистон меафзояд.

Шеъри устод бо мазмуну муҳтавои олӣ ва арзишҳои башардӯстонаи худ аҳли оламро ба сулҳу рафоқат, дӯстиву адолат, рӯзгори босаодат даъват намуда, ҳамчун рамзи Ваҳдати фарҳангӣ ба мардуми олам то имрӯз хизмат мекунанд.

Шеъри Рӯдакӣ пайвандгари наслҳои гузашта, имрӯз ва ояндаи миллати тоҷик буда, бо арзишҳои бузурги ахлоқӣ, илмиву фарҳангӣ ва таърихӣ оинаи босафои зиндагии ҳар кадоми мову шумо мебошад.

Бори дигар Рӯзи Рӯдакиро ба ҳама ҳамдиёрон сидқан муборакбод гуфта, барояшон саломатӣ, бахту нишот орзу менамоям ва итминон дорам, ки рӯй овардан ба ашъори хирадмандонаи устод Абуабдуллоҳ Рӯдакӣ моро ба роҳи ақлу хирад, сулҳу дӯстӣ, муҳаббати воло ба Ватан ва ояндаи нек ҳидоят мекунад.

Рӯзи Рӯдакӣ гиромӣ бод!

Ҳар рӯзи шанбе тибқи Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» раиси шаҳри Панҷакент Абдухолиқ Холиқзода шаҳрвандонро қабул намуда, муроҷиат ва арзу шикояти онҳо шунида мешавад.

Дар рӯзи қабули навбатӣ шаҳвандон асосан оид ба додани қитъаи замини наздиҳавлигӣ, ҳалли баҳси замин, ташкили хоҷагии деҳқонӣ, таъминот бо оби полезӣ ва нӯшокӣ, расонидани ёрии молиявӣ ва дигар масъалаҳои иҷтимоӣ муроҷиат намуданд.

Зимни шунидани муроҷиатҳо ба 13 нафар моҳият ва роҳҳои қонунии ҳалли масъалаҳои ба миёнгузаштаи онҳо фаҳмонида, барои баррасӣ ва ҳалли қонунии муроҷиати 14 нафар ба сохторҳои марбутаи шаҳрдорӣ ва роҳбарони ташкилоту муассисаҳо дастур дода шуд.

Ҳамаи муроҷиатҳо ба қайд гирифта, дар мӯҳлати муқаррарнамудаи қонун баррасӣ намуда, ба шаҳвандон ҷавоби расмӣ ирсол карда мешавад.

Санаи 17 сентябр иҷлосияи сеюми Маҷлиси вакилони халқи шаҳри Панҷакент, даъвати ҳафтум, баргузор шуд.

Дар кори иҷлосия, ки таҳти раёсати раиси шаҳр Абдухолиқ Холиқзода баргузор шуд, муовини раиси вилояти Суғд Зайнура Азимӣ, роҳбарони сохторҳои мақомоти шаҳрдорӣ ва ҳифзи ҳуқуқ, раисони ҷамоатҳои деҳот, занони фаъоли шаҳр ва бонувони ҳунарманд, намояндагони васоити ахбор иштирок доштанд.

Аз рӯи масъалаи якуми рӯзномаи иҷлосия “ Оид ба рафти иҷрои қарори Ҳукумати Ҷумҳурии Тоҷикистон аз 30 апрели соли 2021, № 167 ”Дар бораи Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030 дар шаҳри Панҷакент” маърӯзаи вакили Маҷлиси шаҳрӣ, муовини раиси шаҳр Мурод Шукурзода шунида шуд.

Оид ба ин масъала маърӯзаи иловагӣ ва музокираи вакилон шунида, дар ин бора қарор қабул карда шуд.

Дар идомаи иҷлосия вакилон ҳисоботи вакили Маҷлиси вакилони халқи шаҳр аз ҳавзаи интихоботии Навобод, № 31 Раҳим Баҳриддиновро оид ба иҷрои ваколатҳояш шуниданд.

Тибқи рӯзнома дар иҷлосия аризаҳои вакилони Маҷлиси шаҳрӣ аз ҳавзаи интихоботии Лаби Чашма, № 3 Алишер Пӯлодзода ва Пули Гирдоб, № 38 Ҷамшед Юсуфов оид ба пеш аз мӯҳлат қатъ намудани ваколаташон баррасӣ шуда, дар ин бора қарор ба тасвиб расонида шуд.

Бо қарори иҷлосия дар ин ҳавзаҳои интихоботӣ рӯзи 16 ноябри соли 2025 интихобот ба ивази вакилони хориҷшуда таъин шуда, комиссияи шаҳрии интихобот оид ба интихоботи Маҷлиси вакилони халқи шаҳр таъсис дода, ҳайати он тасдиқ карда шуд.

Вакилон дар фарҷоми кори иҷлосия қарорҳои раиси шаҳрро оид ба таъин ба мансабҳо ва ҷудо намудани маблағҳо тасдиқ намуданд.

Дар иҷлосия намояндаи мақомоти иҷроияи ҳокимияти давлатии ваилоят, муовини раиси вилояти Суғд Зайнура Азимӣ сухан кард.

Вакилон дар бораи ҳамаи масъалаҳои рӯзномаи иҷлосияи сеюми Маҷлиси вакилони хадқи шаҳр, даъвати ҳафтум, қарор ба тасвиб расониданд.

Дар мақомоти иҷроияи маҳаллии ҳокимияти давлатии шаҳри Панҷакент дар ҳамкорӣ бо шуъбаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар водии Зарафшон рафти иҷрои Фармони Президенти Ҷумҳурии Тоҷикистон аз 29 августи соли 2025, № 1070 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” бо иштироки роҳбарони мақомоти ҳифзи ҳуқуқ, ҳайати комиссияи шаҳрии даъват ба хидмати ҳарбӣ, масъулони ба ин кор вобасташуда, раисони ҷамоатҳои деҳот, маҳаллаҳои шаҳр ва фаъолон мавриди баррасӣ қарор гирифт.

Дар ҷаласа зимни суханронии раиси шаҳр Абдухолиқ Холиқзода, сардори шуъбаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар водии Зарафшон Насриддин Низомзода, прокурори шаҳр, мушовири адлияи дараҷаи 1 Искандар Раҳматзода ва пурсиши масъулон натиҷаҳои ҷамъбасти маъракаҳои гузаштаи даъват ба хидмати ҳарбӣ, рафти иҷрои Фармони Президент дар ҷамоатҳои деҳот ва маҳаллаҳои шаҳр матраҳ шуд.

Таваҷҷӯҳи ҳайати комиссияи шаҳрии даъват ба хидмати ҳарбӣ, комиссияи тиббии он, масъулини мақомоти иҷроияи маҳаллии ҳокимияти давлатии шаҳр, раисони ҷамоатҳои деҳот ва маҳаллаҳои шаҳр, дигар иштирокчиёни ҷаласа ба шаффофияти фаъолияти комиссияи шаҳрии даъват, тавсеаи корҳои омодагӣ ба даъвати ҷавонон ба хидмати ҳарбӣ, вусъат додани тарғибу ташвиқ дар байни ҷавонон ва волидони даъватшавандагон, пешгирии амалҳои коррупсионӣ ва дигар масъалаҳои марбут ба даъвати тирамоҳии ҷавонон ба хидмати ҳарбӣ ҷалб карда шуд.

Дар даври вилоятии озмуни ҷумҳуриявии «Беҳтарин хизматчии давлатӣ» аз ҳисоби занон, ки санаҳои 11-13 сентябри соли равон, дар шаҳри Хуҷанд баргузор шуд, мутахассиси пешбари бахши фарҳанги мақомоти иҷроияи маҳаллии ҳокимияти давлатии шаҳри Панҷакент Меҳрноз Хӯҷализода сазовори ҷойи сеюм гардида, бо диплом ва тӯҳфаи хотиравӣ сарфароз гардонида шуд.

Меҳрноз хатмкардаи факултаи ҳуқуқшиносии Донишгоҳи миллии Тоҷикистон буда, соли сеюм аст ба ҳайси мутахассиси пешбари бахши фарҳанги шаҳр фаъолият дорад ва чун корманди фаъолу масъулиятшинос шинохта шудааст.

Ин озмун дар доираи сиёсати давлатии занон бо мақсади ҷалби бештари бонувон ба хидмати давлатӣ ҳамасола баргузор карда мешавад.

Сокини деҳаи Сӯҷинаи шаҳри Панҷакент Абдурауф Зиёев солиёни зиёд дар корхонаю муассисаҳои шаҳр вазифаи муҳосибро ба ӯҳда дошт. Баробари ин чун деҳқонзодаи асил ба боғдорию токпарварӣ таваҷҷӯҳ зоҳир мекард ва дар замини назди ҳавлиаш навъҳои гуногуни дарахтони меваю ангур парвариш менамуд.

Таҷдиди сохтори кишоварзӣ имкон фароҳам овард, ки дар мавзеъи Мушхона, ҳоло Навбаҳор, бо фарзандонаш ду хоҷагии деҳқонӣ- "Себзор" ва "Бозори Зиё"- ро ташкил намуда, ба бунёди боғу ток пардозад.

Бо ин мақсад даҳ сол қабл бо маслиҳат ва даъвати токпарварони шаҳри Турсунзода, ки дар бунёди токзори хавозавӣ собиқаи зиёд доранд, дар 20 ҳисса замин токзори хавозавӣ бунёд намуд. Ҳамчунин дар 8,5 гектар замини лалмӣ об бароварда, боғ бунёд кард.

Дар хоҷагиҳои деҳқонӣ аз ҳар қитъа замин босамар истифода мекунанд ва имсол ҳосил картошкаи барвақтӣ, сабзавот ва зироати хуроки чорво низ фаровон аст.

Раиси шаҳр Абдухолиқ Холиқзода бо ин боғбону токпарвари варзида, мулоқот намуд ва таҷрибаи ӯ дар бунёди боғу ток арзандаи тарғибу пайравӣ дониста шуд.

Дар токзори хавозавии Абдурауф Зиёев дувоздаҳ навъи ангур, аз ҷумла тоифӣ, чандин навъи ҳусайнӣ ва кишмиш, ҷавз ва ғайра парвариш мешавад ва имсол аллакай беш аз 10 тонна ҳосили онро ба бозор баровардааст.Бист тонна ҳосили себи хушсифати боғи навбунёдашро харидорон бевосита аз дарахт чида гирифтанд.

Ҳоло низ боғу токзор серҳосил аст ва он ҳамарӯза ба бозор бароварда мешавад.

Рӯи ҳавлиаш низ бо завқи баланд хавозаи ток кашида шудааст ва он ҳамасола ҳосили фаровон медиҳад. Дар боғи назди ҳавлиаш навъҳои гуногуни себ, нок, анҷир, шафтолу низ парвариш менамояд ва дастархонаш бо ҳама намуди маҳсулоти кишоварзӣ таъмин аст.

Гуфта шуд, ки бо истифода аз таҷрибаи ин боғбону токпарвари варзида, дар ҳама минтақаҳои шаҳр парвариши ангурро аз тариқи хавоза ва дарахтони меваро ба роҳ мондан мумкин аст.

Абдурауф Зиёев омодааст таҷрибаи ғаниашро ба дигар кишоварзон омӯзонад.

Дирӯз дар маҳаллаи нави деҳаи Чорбоғи Ҷамоати деҳоти Косатароши шаҳри Панҷакент бо иштироки раиси шаҳр Абдухолиқ Холиқзода барои бунёди кӯдакистони дорои 200 ҷой санги асос гузошта, корҳои сохтмонӣ шурӯъ карда шуд.

Кӯдакистон дар ҳудуди муассисаи таҳсилоти миёнаи умумии № 81 ҷойгир буда, тибқи лоиҳа аз таҳхона ва се қабат иборат аст ва барои фарогирии 200 нафар кӯдак пешбинӣ шудааст.

Он бо дастгирии мақомоти иҷроияи маҳаллии ҳокимияти давлатии шаҳр ва соҳибкорону сокинони деҳа сохта мешавад.

Бо гузоштани санги асос бо ҷалби се техникаи махсус ба кандани ҷои таҳхонаи бинои кӯдакистон шурӯъ карда шуд.

Сохтмони кӯдакистони нав зери назорати мақомоти иҷроияи маҳаллии ҳокимияти давлатии шаҳр идома ёфта, то ҷашни 35- солагии истиқлоли давлатии Ҷумҳурии Тоҷикистон мавриди истифода қарор дода хоҳад шуд.

Дар хиёбони Рӯдакии шаҳри Панҷакент, канори шоҳроҳ маҷмааи тиҷорат ва фароғат имрӯз нахустин мизоҷону харидоронро пазироӣ намуд.

Тавре зимни ифтитоҳи он ба раиси шаҳр Абдухолиқ Холиқзода гуфта шуд, ин маҷмаа аз ду қисмат иборат буда, бо дастгирии мақомоти иҷроияи маҳаллии ҳокимияти давлатии шаҳр аз ҷониби соҳибкорон Эраҷ Ниёзов ва Хушбахт Бобомуродов бо харҷи 900 ҳазор сомонӣ дар масоҳати беш аз 1300 метри мураббаъ бунёд шудааст.

Дар маҷмаъа ба харидорон якчанд намуди яхмос, қаҳва, шириниҳои гуногун ва молҳои саноатӣ, аз ҷумла маҳсулоти ширию гӯштӣ, гулмоҳии зинда, камераҳои назоратӣ, батареяҳои офтобӣ, пойафзолу либоси занона пешкаш карда мешавад.

Саҳни маҷмаа сафолакпӯш шуда, бо фаввора, дарахтони ороишии ҳамешасабз, гулҳои гуногун ороиш ёфта, он ҷо барои истироҳати мизоҷон мизу курсиҳои зебо низ гузошта шудааст.

Дар паҳлӯи ин маҷмаа, дар таҳхонаи бинои чорқабатаи истиқоматӣ соҳибкор ва ҳунарманд Мавзуна Абдураҳмонова толори арӯсӣ ва ороиши занон ташкил намудааст.