Panjakent.tj - Хабарҳо

2025-05-22 13:31:02

ДАР ДЕҲАИ БОҒЧА ПОЙГОҲИ ОБКАШӢ БАРҚАРОР КАРДА МЕШАВАД

Дар ин бора зимни сафари кории раиси шаҳри Панҷакент Абдухолиқ Холиқзода ба деҳаи Боғчаи Ҷамоати деҳоти Шинг иттилоъ дода шуд.

  Тавре гуфта шуд,  киштаҳои хоҷагиҳои деҳқонӣ дар ҳудуди деҳа, ки беш аз сад гектарро ташкил медиҳанд, аз норасоии оби полезӣ танқисӣ мекашанд ва собиқа инро пойгоҳи обкашӣ , ки дар канори деҳа, дар соҳили дарёи Зарафшон бунёд шуда, ҳоло аз байн рафтааст, ҷуброн менамуд.  Сокинони деҳа кӯшиши  тавассути канал аз дарёи Зарафшон гирифтани обро ҳам кардаанд, вале он бенатиҷа анҷом ёфтааст.

  Дар ҷараёни боздид аз мавзеъи собиқ пойгоҳи обкашӣ бо намояндаи ҶСК  “Корезлоиҳа”-и Кумитаи  давлатии сохтмон ва меъморӣ ва роҳбарияти идораи  давлатии беҳдошт замин ва обёрии ҳавзаи дарёи Зарафшон масъалаи бо тарҳ ва иқтидори нав барқарор намудани  пойгоҳи обкашӣ матраҳ карда шуд.

  Гуфта шуд, ки бо барқарор намудани ин пойгоҳ   таъминоти даҳҳо гектар заминҳои кишт ва боғ дар ҳудуди Ҷамоати деҳоти Лоиқ Шералӣ, ки дар шафати деҳаи Боғча воқеъ аст, низ бо оби полезӣ беҳтар мегардад.

2025-05-22 11:12:05

БОЗДИД АЗ РАФТИ БУНЁДИ МУАССИСАҲОИ ТАЪЛИМӢ ДАР БОҒЧА ВА ХУШДАРА

Бо дастгирии мақомоти иҷроияи  ҳокимияти давлатии вилояти Суғд ва шаҳри Панҷакент дар деҳаҳои Боғча ва Хушдараи  Ҷамоати деҳоти Шинг сохтмони бинои нави муассисаҳои таълимӣ идома дорад.

 Зимни  сафари корӣ  ба Ҷамоати деҳоти Шинг раиси шаҳр Абдухолиқ Холиқзода бо рафти сохтмони биноҳои нави нави мактабҳо шинос шуд. 

  Иттилоъ  дода шуд, ки  дар деҳаи Боғча  ба ҷои бинои   собиқи таълимгоҳи № 113, ки дар ҳолати садамавӣ қарор дошт аз ҷониби  пудратчӣ - бинокорони ширкати сохтмонии СУ-3, бинои хуштарҳи замонавӣ бунёд шуда,  ҳоло бунёди толори варзишӣ ва ба тартиб овардани атрофи он идома дорад. Он барои фарогирии  беш аз 700 хонанда дар ду баст пешбинӣ шудааст.

  Дар сохтмони бинои нави бахши ин муассисаи таълимӣ дар деҳаи навбунёди Хушдара, ки  аз 12 синфхона иборат буда, барои 480 хонанда дар ду баст пешбинӣ шудааст, бинокорони ин ширкати сохтмонӣ ба бардоштани деворҳо машғул буданд.Гуфта шуд, ки барои идомаи сохтмон ҳамаи масолеҳи зарурии  бинокорӣ муҳайё буда, кор ҳамарӯза бомаром идома дорад. 

 Мустаҳкам намудани пойгоҳи соҳаи маориф, бунёди биноҳои нави мактабҳо дар меҳвари сиёсати иҷтимоии давлат қарор дошта,  ҳоло дар шаҳри Панҷакент 9 бинои нави таълимгоҳ  ва160 синфхонаи иловагӣ  дорои 4238 ҷойи нишаст бунёд карда мешавад.

2025-05-21 07:53:56

ШИНОСОӢ БО РАФТИ НАСБИ ХАТИ ОБИ НӮШОКӢ ТАЪМИРИ МАРКАЗИ ТИББӢ.

Бо дастгирии мақомоти иҷроияи маҳаллии ҳокимияти давлатии шаҳри Панҷакент, саҳмгузории соҳибкорони бурунмарзӣ ва сокинон ба деҳаи Хӯҷағариби Ҷамоати деҳоти Амондара ба масофаи беш аз ду километр хати оби нӯшокӣ кашида мешавад.

  Тавре дар ҷараёни боздиди раиси шаҳр  Абдухолиқ Холиқзода бо рафти васлу насби  хати оби нӯшокӣ, иттилоъ дода шуд, бо ин мақсад дар соҳили дарёи Зарафшон чоҳи амудӣ канда,  аз он ҷо тавассути лӯлаҳо  ба ҳавзи болопӯшида об оварда, пасон дар навбати дуюм то ба деҳа бурда мешавад.

  То ҳоло аз тариқи ҳашар ва ҷалби мутахассисон чоҳҳои амудӣ омода карда, хати барқ кашида, то ҳавзи аввал лӯла хобонида шуда, барои иҷрои ин корҳо беш аз як миллион сомонӣ харҷ шудааст.

  Дар деҳаи Равот бошад дар доираи лоиҳаи ҳамкорӣ бо шарикони рушд таъмири асосӣ ва таъдиди  маркази саломатии деҳа  идома дорад ва ҳоло бинокорон ба корҳои пардозгарӣ машғуланд.

  Маркази саломатӣ аз даҳ ҳуҷраи қабулу муоина ва табобат иборат буда, тибқи лоиҳа бо таҷҳизоти замонавии тиббӣ  муҷаҳҳаз гардонида, дувоздаҳ нафар кормандони тиб   ба табобати сокинони Равот ва  деҳаҳои атроф машғул мешаванд.

2025-05-20 16:13:46

МАН БАЪДИ ҲАЗОР СОЛ МЕОЯМ БОЗ

Ман баъди ҳама завол меоям боз,

                                              Чун мурғи хуҷастафол меоям боз.

                                             Аз баъди ҳазор сол ёдам бикунанд,

                                             Аз баъди ҳазор сол меоям боз.

  Ин ва дигар  байтҳои  Шоири Халқии Тоҷикистон,  дорандаи ҷоизаи давлатии ба номи Рӯдакӣ ва байналмилалии “Нилуфар”, устоди зинндаёд Лоиқ Шералӣ ин субҳ дар пояи муҷассамаи ӯ, саҳн ва саҳнаи Кохи Лоиқи шаҳри Панҷакент  борҳо аз забони дӯстдорону мухлисони ашъори нобаш садо доданд.

  Ин ҷо ба муносибати 84-умин зодрӯзи шоир маҳфили адабию фарҳангӣ бо иштироки доираи васеъи дӯстдорони каломи бадеъ ва  ашъори ин шоири ширинкалом баргузор шуд.

  Баъди маросими гулгузорӣ дар пояи муҷассамаи шоир дар толори Кохи Лоиқ  паёми шодбошии  мақомоти иҷроияи маҳаллии ҳокимияти давлатии шаҳрро ба ифтихори зодрӯзи шоир  ба ҳозирин муовини раиси шаҳр Парвина Нақибӣ қироат намуд ва  писарбузурги устод Лоиқ Шералӣ Диловар барои  бузургдошт ва арҷгузорӣ  ба Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва ба ҳамдиёрон барои гиромидошти  хотираи шоир изҳори сипос намуд.

  Аз ҷумла, ёдрас  шуд, ки ин кохи мӯҳташам, ки номи Лоиқро дорад ва муҷассамаи шоир   бо иштироки Пешвои миллат ифтитоҳ шуда буд ва ҳамасола ба ифтихори зодрӯзи  шоир ин ҷо маҳфили бузургдошт ва ёдкарди ӯ баргузор мешавад.

  Дар идомаи маҳфил ҳозирин аз қироати ашъори шоир, ҳунарнамоии Ҳунармандони шоистаи Тоҷикистон   Хосияти Зарафшонӣ, Орзугул Хӯҷамова,  овозхони ҷавон, дастпарвари Ҳунарманди Халқии Тоҷикистон, шодравон Давлатманд Холов-  Лоиқ  Холов ва санъаткорони шаҳр, ки бар матни ашъори устод Лоиқ суруданд, лаззат бурданд.

  Имсол низ ба ифтихори зодрӯзи шоир чун анъана дар  муассисаҳои таълимии шаҳр озмуну маҳфилҳои Лоиқхонӣ баргузор шуданд.

  Ҳамчунин  ин бегоҳ дар саҳни муҷассамаи устод Лоиқ Шералӣ маҳфили шеъру  суруд баргузор мешавад.

2025-05-20 16:03:46

БОЗДИД АЗ РАФТИ КИШТИ КАРТОШКА ВА ШОЛӢ ДАР ҶАМОАТИ ДЕҲОТИ АМОНДАРА

Кишоварзони шаҳри Панҷакент ин баҳор  тибқи дурнамо дар майдони 3900 гектар картошка ва 1850 гектар шолӣ кишт мекунанд ва ҳоло кишти ин зироати муҳимӣ ғизоӣ идома дорад.

Раиси шаҳр Абдухолиқ Холиқзода зимни сафари корӣ ба Ҷамоати деҳоти Амондара бо рафти кишти картошка ва шолӣ шинос шуд.

Гуфта шуд, ки  кишти шолӣ, ки дар майдони 270 гектар пешбинӣ шудааст, дар арафаи анҷомёбӣ буда, кишти картошка дар ҳамаи хоҷагиҳои деҳқонӣ идома дорад ва деҳқонон имсол майдони онро ба 280 гектар расониданианд.

Аз ҷумла, дар хоҷагии деҳқонии “Чашмасор”  то кунун  аз панҷ гектари пешбинишуда дар чор гектар картошка шинонидаанд ва ҳашари кишт идома дорад. Дар маҷмӯъ то ин муддат дар хоҷагиҳои деҳқонии ҳудуди ҷамоати деҳот дар 109 гектар картошка кишт кардаанд.

Дар сӯҳбат бо роҳбарияти ҷамоати деҳот ва хоҷагиҳои деҳқонӣ вусъат додани кишти картошка ва иҷро кардани нақшаи пешбинишуда қатъӣ талаб карда шуд.

2025-05-19 14:50:35

МАРО ЧУН ТОҶИКИСТОНӢ САДО КУН

Чу меборад ба сар борони меҳрат,

                                                 Маро бо шеъри боронӣ садо кун!

                                                 Душанбе қиблаи армони ман шуд,

                                                 Маро чун тоҷикистонӣ садо кун!

     Муаллифи ин ғазали ваҳдат, ки мақтааш иқтибос шуд ва боз   сию панҷ китоби шеър, баргардони  даҳҳо маҷмӯаи ашъори шоирони классику муосир аз хати форсӣ ба хати кирилии тоҷикӣ,  мақолаҳои зиёд дар мавзӯъҳои рӯз, соҳиби китобхонаи нодир дар шакли воқеӣ ва маҷозӣ, узви савдорати Иттифоқи нависандагони Тоҷикистон, раиси бахши панҷакентии Иттифоқи нависандагони Тоҷикистон, узви Созмони рӯзноманигорони Тоҷикистон, дорандаи  нишони “Хидмати шоиста”, нишонҳои Аълочии маориф ва илм, Аълочии матбуоти Тоҷикистон Исмоил Зарифӣ ба синни мубораки 70- солагӣ қадам гузошт.

  Раиси шаҳри Панҷакент Абдухолиқ Холиқзода ӯро ба ҳузур пазируфта, бо  70-солагӣ муборакбод намуд ва зимни ёдоварӣ аз хидматҳояш чун омӯзгор, шоир, рӯзноманигор, эҷоди ашъори зиёд дар мавзӯъҳои  ватандӯстӣ, ишқу муҳаббат ба диёр, фарзандони барӯманди миллат ва чун  шахсияти фаъоли ҷомеа барояш  саломатӣ ва барори эҷодӣ орзу намуд.

  Ба шоир ба ифтихори ин санаи мубораки умр  чун барги сабз  гулдаста, ҷома ва тӯҳфаҳои пулию молӣ тақдим  шуд.

  Пешниҳод шуд, ки дар доираи омодагӣ ба ҷашни 35- солагии истиқлоли давлатии кишвар ва таҷлили Рӯзи ҷавонони Тоҷикистон дар саҳни  Кохи Лоиқи шаҳр маҳфили шеъри Исмоил Зарифӣ баргузор карда шавад.

2025-05-16 17:45:26

“МОҒИЁН- АГРО” – СОҲИБИ ҶОИЗАИ “ 3ZERO-2025”

Гармхонаҳои   ширкати  “Моғиён- Агро” –и шаҳри Панҷакент дар озмуни “Дастовардҳои барҷаста дар соҳаи рушди Тоҷикистон”, ки дар ҳамкорӣ бо  шарикони рушд ҳамасола  баргузор мешавад,соҳиби ҷоиза гардид.

 Ин ҷоиза, ки  "3ZERO"(сабз) унвон шудааст, барои дастовардҳои барҷаста дар рушди Тоҷикистон барои ташкилотҳои ҷомеаи шаҳрвандӣ ва намояндагони бахши хусусӣ таъсис шуда, ҳар сол баргузор мешавад.

  Ширкати “Моғиён – Агро”   аз рӯи номинатсияи муҳофизони об дар доираи Стратегияи рушди иқтисоди сабз дар Тоҷикистон дар байни ҳафтод иштирокчии  ин озмун ғолиб дониста , бо диплом ва мукофот қадрдонӣ карда шуд.

  Гармхонаҳои ширкат дар масоҳати 1,5 гектар дар шаҳри Панҷакент ва Ҷамоати деҳоти Моғиён  бо сармоягузории соҳибкор  Мурод Юсуфов бунёд шуда, бо истифода аз технологияи пешрафта, аз ҷумла обёрӣ ва ғизодиҳии қатрагӣ ба истеҳсоли помидор, бодиринг, қулфинай, қаланфури булғор ва дигар сабзавот машғул аст.

2025-05-15 14:16:41

КОРХОНАИ КОРКАРДИ ҚАЛЪАГӢ ВА МИС АЗ НАВ БА КОР АНДОХТА МЕШАВАД

Бо  дастгирии мақомоти иҷроияи маҳаллии ҳокимияти давлатии шаҳри Панҷакент ва мусоидати  мақомоти марбутаи Ҷумҳурӣ баъди даҳ соли танаффус корхонаи муштараки “ Броадтек- Тоҷикистон майнинг инвестмент лимитед”, ки бо сармоягузории соҳибкорони чинӣ бунёд шуда буд, аз нав ба кор андохта мешавад.

  Дар ин бора дар мулоқоти раиси шаҳр Абдухолиқ Холиқзода бо директори корхонаи мазкур  Гуо Чин Чин ва муовини ӯ  Сун Ҷи Фенг иттилоъ дода шуд.

      Зимни мулоқот гуфта шуд, ки корхонаи мазкур соли 2015  баъди бунёди коргоҳи истеҳсолӣ дар ҳудуди  деҳаи Рукнободи Ҷамоати деҳоти Ворӯ ба  истихроҷ ва коркарди маъдани қалъагӣ ва мис дар кони мавзеъи Мушистон шурӯъ намуда, баъди  андаке бо сабабҳои гуногун аз фаъолият бозмонд ва ҳоло соҳибмулкони чинии он дар мувофиқа бо мақомоти марбутаи ҷумҳуриявӣ барои аз нав ба кор андохтани он омодагӣ мегиранд.

  Дар сӯҳбат  ҷонибҳо масъалаҳои ба кор омода намудани коргоҳи истеҳсолӣ, таъмиру таҷдиди роҳ, таъминот бо барқ, об, қабули кормандон ва дигар масъалаҳои омодагӣ  ба оғози фаъолияти истеҳсолии корхонаро матраҳ намуданд.

  Гуфта шуд, ки мақомоти иҷроияи маҳаллии ҳокимияти давлатии шаҳр дар ҳамкорӣ бо роҳбарияти корхона ва мақомоти соҳавии ҷумҳурӣ барои ҳарчи зудтар ба кор андохтани корхона мусоидат менамояд.

2025-05-15 14:13:05

МУСОБИҚАИ ФУТБОЛ БАРОИ ҶОМИ РАИСИ ШАҲР БАРГУЗОР МЕШАВАД...

Бахшида ба Рӯзи ҷаҳонии футбол, ки  бо ташаббус ва пешниҳоди Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе,  Президенти  Федератсияи футболи  Тоҷикистон ва Ассосиатсияи футболи Осиёи Марказӣ, муҳтарам Рустами Эмомалӣ  аз соли 2024 бо Қатъномаи Ассамблеяи Генералии   Созмони Милали Муттаҳид ҳар сол санаи 25 май баргузор мешавад, аз рӯзи 15 май дар шаҳри Панҷакент мусобиқаи футбол байни дастаҳои  корхонаю ташкилотҳо, муассисаҳои таълимӣ, ҷамоатҳои деҳот,маҳаллаҳои шаҳр, мақомоти ҳифзи ҳуқуқи шаҳр барои  соҳиб шудан ба Ҷоми раиси шаҳр доир мешавад.

Мусобиқа байни дастаҳо  рӯзҳои 15-24 май дар варзишгоҳи  марказии шаҳр  баргузор  шуда,  ба ғолибон 25-май – дар Рӯзи ҷаҳонии футбол, ҷом, диплом ва мукофотҳо дар вазъияти тантанавӣ супорида мешавад.

Ҳама ба тамошо ва мухлисии  бозии футбол-оммавитарин навъи варзиш!

2025-05-14 08:57:14

ГИРОМИДОШТИ ХОТИРАИ ҲОФИЗИ ХАЛҚӢ

Дар Рӯзи “Шашмақом”, ки дар Кохи Лоиқи шаҳри Панҷакент бо иштироки доираи васеъи  мухлисону ҳаводорони ин шоҳкори мусиқии классикии тоҷикон бо барномаи ҷолиби бозхонии сурудҳои он баргузор шуд, раиси шаҳр Абдухолиқ Холиқзода аз хидматҳои арзандаи Ҳофизи Халқии Тоҷикистон, дорандаи ордени “Шараф”, шодравон Умриҷон Баҳриев ёдоварӣ намуд.

 Роҳи эҷодии  Умриҷон Баҳриев ба олами санъати асил аз курсии ронандагӣ, дастаи ҳаваскорон оғоз ёфта, истеъдоди фитрӣ ,завқи баланд ӯро ба ҷодаи ҳунари асили “Шашмақом” овард, ба гирифтани унвони Ҳофизи Халқии Тоҷикистон,  ордени “Шараф”, профессори фахрии донишкадаи омӯзгории Панҷекат сазовор шуд. Дар даҳҳо озмунҳои ҷумҳуриявӣ мусиқии асили классикиро муаррифӣ намуд. 

 Ин  сароянда ва навозандаи мумтоз на танҳо дар иҷрои сурудҳои “Шашмақом”, балки эҷоди оҳангҳои нав дар радифи ин шоҳасар  нақши арзанда дошт. Силсилаи оҳангҳои эҷоднамудаи  ӯ бо номи “Мақоми  Муставӣ” бар матни шеърҳои ноби шоирони классик ва муосир, ки ба нота дароварда, ба нашр расидааст, аз ҷониби донандагони  мусиқии классикӣ баҳои баланд гирифтааст.

  Дар сӯҳбати раиси шаҳр  бо ҳамсари ҳофиз  Зарофат Мирзобобоева, ки дар манзили шодравон сурат гирифт, бори дигар аз саҳми ин ҳофизи боистеъдод дар рушди санъати мусиқӣ, тарбияи  санъаткорони ҷавон сухан рафта, таъкид шуд, ки хидматҳои арзандаи  ӯ  аз ҷониби Ҳукумати мамлакат қадрдонӣ шудааст ва ному кораш пос дошта мешавад.

2025-05-12 18:48:01

“ШАШМАҚОМ”- ДОСТОНИ МӮҲТАШАМИ САВТУ КАЛОМ

Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид доштаанд, ки «Шашмақом” – достони муҳташами савту калом аст, ки дар навоҳои он беҳтарин ва олитарин орзуву пиндорҳои неки аҷдодони мо таҷассум гардидаанд. Дар мусиқии “Шашмақом” намунаҳои маърифатангези назми оламшумули тоҷиқӣ бо лаҳни форам ба парвоз омада, руҳи мардуми маърифатпарвари моро болида месозад”.

        Ин маънӣ дар оғози таҷлили Рӯзи “Шашмақом” дар Кохи Лоиқи шаҳри Панҷакент, ки  бо ҳузури ҳаводорон ва мухлисони ин шоҳасари мусиқӣ доир шуд, дар шодбошии раиси шаҳр Абдухолиқ Холиқзода баён гардид.

       Гуфта шуд, ки  ин шоҳасари мусиқӣ тӯли асрҳо аз даҳон ба даҳон, аз тариқи “устод- шогирд”  омӯзонида, то ба замони мо омада расидааст ва маҳз дар даврони истиқлол бо иқдому ғамхориҳои фарҳангпарваронаи  Пешвои миллат барои ҳифзу такомули “Шашмақом”-ҳамчун шоҳасари мусиқӣ, таваҷҷуҳи махсус зоҳир гардида,  он  ба Феҳристи  мероси ҷаҳонии ЮНЕСКО шомил гардид ва аз соли 2002 ба инҷониб санаи 12 май ҳамчун Рӯзи “Шашмақом” таҷлил мегардад.

      Ин шоҳасари мусиқии асили классикӣ дар  Панҷакенти бостонӣ, ки дар гузашта аз ҳавзаи эҷодии мақомсароии  Самарқанду Бухоро маншаъ мегирифт, ҳаводорони зиёде дошт ва он дар ҳама ҷашну маъракаҳои ҷамъиятию мардумӣ садо медод ва хушбахтона, ин анъана имрӯз низ барҷост. 

     Таъкид шуд, ки ин анъанаи нек идома дода,  нишастҳои моро маҳз мусиқии асили “Шашмақом”, ки шунавандаашро ба пиндору кирдору гуфтори нек, камоли инсонгароӣ, дарки маъниҳои баланди шеъри классикон даъват мекунад, оро диҳанд. Талқин ва дарки ин мусиқии олӣ насли ҷавонро аз бад кардану бад андешидан, ба корҳои ношоиста даст задан боз медорад.

       Дар ҷамъомад ҳамчунон таъкид шуд, ки мақомоти иҷроияи маҳаллии ҳокимияти давлатии шаҳр сарпарастии нашри маҷмӯи мақолаҳоро дар бораи таърихи рушди “Шашмақом” дар Панҷакент ва  таҳсили  наврасони соҳибҳунарро  дар риштаи мусиқии классикии донишкадаҳо ба ӯҳда мегирад.

       Барномаи ҷолиби  гурӯҳи мақомсароёни  “Навои Панҷакент” хотири ҳозиринро бо  савту наво, рақс ва сурудҳои дилошӯби ин шоҳасари мусиқии классикии тоҷикон шод намуд.

2025-05-12 17:31:40

НАЗОРАТ БА ИСТИФОДАИ НЕРӮИ БАРҚ ПУРЗӮР КАРДА МЕШАВАД

Масъалаҳои вобаста ба истифодабарандагони нерӯи барқ фаҳмонидани мазмуну моҳияти Қонун “Дар бораи ворид намудани иловаҳо ба Кодекси ҷиноии Ҷумҳурии Тоҷикистон” ва Қонун “Дар бораи ворид намудани тағйир ба Кодекси ҳуқуқвайронкунии маъмурии Тоҷикистон” дар ҷамъомад дар мақомоти иҷроияи маҳаллии ҳокимияти давлатии шаҳр бо иштироки раиси шаҳр Абдухолиқ Холиқзода,  прокурори шаҳр, мушовири адлияи давраҷаи 1 Искандар Раҳматзода, сардори шуъбаи минтақавии Агентии назорати давлатии молиявӣ ва мубориза бо коррупсия дар водии Зарафшон  Нодирхон Акмалзода, роҳбарони ташкилоту муассисаҳо мавриди баррасӣ қарор дода шуд.

  Зимни гузориши муовини якуми раиси шаҳр Сабур  Собирзода гуфта шуд, ки бо ин мақсад бо қарори раиси шаҳр гурӯҳҳои корӣ таъсис шуда, онҳо муваззаф шудаанд, ки  мӯҳтавои тағйиру иловаҳо ба Кодексҳои ҷиноӣ ва  ҳуқуқвайронкуниро вобаста ба таъини муҷозот барои ғайриқонунӣ истифода бурдани нерӯи барқ ба ҳар оила фаҳмонида,  ба ин васила  қонуншиканӣ дар ин самт пешгирӣ карда шавад.

       Моҳияти ин тағйиру иловаҳоро раиси шаҳр, прокурори шаҳр ва сардори шуъбаи минтақавии Агентии назорати давлатии молиявӣ ва мубориза бо коррупсия дар водии Зарафшон ба ҳозирин фаҳмонида, онҳо вазифадор карда шуданд, ки  онро ба ҳар оила расонида, барои пардохти   ҳаққи истифодаи нерӯи барқ тадбирҳои амалӣ андешида шавад

  Дар идомаи ҷаласа  рафти кишти баҳорӣ, аз ҷумла картошка дар хоҷагиҳои деҳқонӣ  баррсӣ карда, пешниҳодҳои шуъбаи минтақавии Агентии назорати давлатии молиявӣ ва мубориза бо коррупсия дар водии Зарафшон   ба самъи ҳозирин расонида, масъулон барои бартараф намудани камбудиҳои ошкоршуда водор карда шуданд.

2025-05-12 16:45:35

ПАНҶАКЕНТ: ОҒОЗИ МУМФАРКУНИИ РОҲҲОИ МАҲАЛЛӢ...

Дар доираи нақшаи омодагиҳо ба ҷашни 35- солагии истиқлоли давлатии Ҷумҳурии Тоҷикистон дар шаҳри Панҷакент то ин муддат 43, 5 километр роҳҳои маҳаллӣ мумфарш  ва 43,2 километр қумпӯш карда шудааст.

  Бо оғози фасли гармо нахустин шуда, сокинони деҳаи Дашти Қозии Ҷамоати деҳоти Ёрӣ  бо иштироки раиси шаҳр Абдухолиқ Холиқзода ва фотиҳаи собиқадорон ба  мумфаршкунии роҳи байни деҳа шурӯъ намуданд.

  Тавре иттилоъ дода шуд, роҳи байни деҳа, ки аз назди муассисаи таълимӣ мегузарад, дар масофаи 1300 метр бо саҳмгузории сокинон  аз  ҷониби  ширкати сохтмонии “АСЛ” мумфарш карда мешавад. Ба ин кор  мутахассисон ва техникаю механизми зарурӣ ҷалб  шудааст.

  Раиси шаҳр дар сӯҳбат бо собиқадорони барӯманди деҳа,  омӯзгори собиқадор  Мирзоҳомид ва собиқ ронанда  Мирзоҳофиз Тулибоевҳо  ба ин иқдоми  собиқадорон ва сокинони деҳа баҳои баланд дод.

  Онҳо иброз доштанд, ки бо ташаббусу иқдоми фаъолон ва  сокинон дигар кӯчаҳои деҳа низ ба тадриҷ  таъмир ва мумфарш карда, дар ин кор онҳоро собиқадорон сару бар мешаванд.

  Дар маҷмӯъ соли равон  дар шаҳр  бо истифода аз ҳамаи сарчашмаҳои маблағгузорӣ мумфарш кардани 24 километр ва қумпӯш намудани 60 километр роҳҳои маҳаллӣ пешбинӣ шудааст.

2025-05-11 15:01:29

НАВАСКАРОН САВГАНДИ САДОҚАТ ЁД КАРДАНД

 Наваскарони қисми ҳарбии Вазорати мудофиаи мамлакат  мустақар дар шаҳри Панҷакент имсол дар боғи фарҳангию фароғатии ба номи Камоли Хуҷандии  шаҳр, дар  саҳни лавҳаи ёдгорӣ ба хотири шаҳидони ҷанг дар ҳузури раиси шаҳри Панҷакент Абдухолиқ Холиқзода. роҳбарияти мақомоти ҳифзи ҳуқуқ, волидону наздикон ва садҳо нафар сокинони шаҳр  барои хидмати содиқона ба Ватан, ба Президент, ҳифзи марзу буми муқаддаси он, фазои сулҳу суботи дар ҷомеа савганди садоқат ёд карданд

  Гуфта шуд, ки дар даъвати баҳорӣ ба хидмати ҳарбӣ даҳҳо нафар ҷавонони шаҳр бо ибрати шоиста ба қаҳрамониҳои падарону бобоён бо амри дил хидмати Ватанро ихтиёр намуданд ва нақшаи даъват пеш аз мӯҳлати муқаррашуда ба иҷро расонида шуд.

  Зимнан, дар ин қисми ҳарбӣ барои хидмати шоистаи сарбозон ҳама шароит- хобгоҳҳо, ошхонаи  васеъ, майдончаҳои тамрин, ҳаммом муҳайё буда, дар анборҳо захираи зарурии хурокаи серғизо нигоҳдорӣ мешавад.

  Наваскарон баъди ёд кардани савганди садоқат дар  вазъияти тантанавӣ  эҳтироми парчами ҳарбиро ба ҷо оварданд.

2025-05-09 10:36:24

МУЛОҚОТ БО СОБИҚАДОРИ АҚИБГОҲИ ҶАНГ

 Аз 5885 нафар иштирокчиёни набардҳои хунини Ҷанни Бузурги Ватанӣ аз шаҳри Панҷакент  ҳоло  хотираи нек боқӣ модааст ва аз дорандагони нишони “ Барои хидмати  шоиста дар солҳои Ҷанги Бузурги Ватанӣ, солҳои 1941-1945” танҳо   сокини маҳаллаи Саройбоғи деҳаи Кулолии Ҷамоати  деҳоти Рӯдакӣ, собиқ омӯзгор Холмаҳмад Холиқов, ки синнаш ба садсолагӣ наздик мешавад, барҳаёт аст.

  Арафаи Рӯзи Ғалаба намояндаи мақомоти иҷроияи ҳокимияти давлатии вилояти Суғд, директори намояндагии КВД “Хоҷагии манзилӣ – коммуналӣ” дар вилоят Баҳриддинхоҷа Нозимӣ ва раиси шаҳри Панҷакент Абдухолиқ Холиқзода  ӯро бо ҷашни Ғалаба муборакбод гуфтанд ва  ба ӯ табрикот  ва ёрии яквақтаи молиявии   раиси вилояти Суғд, муҳтарам Раҷаббой   Аҳмадзода ва мақомоти иҷроияи маҳаллии ҳокимияти давлатии шаҳр тақдим карда шуд.

  Дар сӯҳбат бо собиқадори ақибгоҳи ҷанг таъкид шуд, ки Ҳукумати мамлакат ба хидматҳои содиқонаи онҳо ҳамеша арҷгузорӣ менамояд.

2025-05-09 10:28:34

ТАҶЛИЛИ 80- СОЛАГИИ ҒАЛАБА ДАР ҶАНГИ БУЗУРГИ ВАТАНӢ

Ба ифтихори  80-умин солгарди ғалаба дар Ҷанги дуюми ҷаҳон дар  саҳни лавҳаи ёдгорӣ ба хотири шаҳидони ҷанг дар боғи Камоли Хуҷандии  шаҳри Панҷакент бо иштироки доираи васеъи собиқадорони меҳнат, ҷомеаи меҳнатии корхонаю муассисаҳо, ҷавонон  ҷамъомади тантанавӣ баргузор шуд.

  Таҷлили ин санаи таърихӣ бо шиносоӣ бо аслиҳаи ҷангӣ ва  гулгузорӣ ба пояи лавҳаи ёдгорӣ ва оташи абадӣ ба   эҳтироми шаҳидони ҷанг оғоз шуда, ҳозирин ва сокинони шаҳрро аз номи муовини аввали  раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд, муҳтарам Раҷаббой Аҳмадзода, намояндаи мақомоти иҷроияи ҳокимияти давлатии вилоят, директори намояндагии КВД “ Хоҷагии манзилӣ- коммуналӣ” дар вилояти Суғд Баҳриддинхоҷа Нозимӣ  ва раиси шаҳр Абдухолиқ Холиқзода ба муносибати  ҷашни Ғалаба муборакбод намуданд.

  Аз ҷумла,  гуфта шуд, ки ба таъкиди Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар суханронӣ ба ифтихори 80- солагии Ғалаба мардум ва Ҳукумати мамлакат ба ин хизмати таърихии фарзандони содиқу далери худ ҳамеша арҷ мегузоранд. 

        Зимнан,дар солҳои мудҳиши Ҷанги Бузурги Ватанӣ 5885 нафар ҳамдиёрони диловари мо дар набардҳои хунин иштирок намуда, 2400 нафари онҳо ҷонашонро дар ҷабҳаҳо нисор кардаанд ва ҳоло дар шаҳри Панҷакент аз иштирокчиёни набардҳои хунини ҷанги  ҷаҳонии дувум танҳо хотира ва номи нек боқӣ мондааст. 

      Дар фарҷоми таҷлили ҷашни 80- солагии Ғалаба дар Ҷанги Бузурги Ватанӣ аскарони қисми низомии Вазорати мудофиаи мамлакат мустақар дар шаҳри Панҷакент машқҳои ҳарбӣ нишон доданд.

      Ба муносибати 80-умин солгарди Ғалаба дар  корхонаю ташкилотҳо, муассисаҳои таълимӣ ҷамъомаду чорабиниҳои гуногун баргузор карда шуданд.

2025-05-06 14:33:28

БОЗДИД АЗ ЧАРОГОҲ

Тибқи ҳисоботи оморӣ ҳоло дар хоҷагиҳои ҷамъиятӣ ва шахсии шаҳри Панҷакент наздик ба 222 ҳазор сар гӯсфанду буз нигоҳдорӣ ва парвариш карда мешавад.

  Қисмати асосии моли майда фасли зимистонро дар минтақаҳои ҷануби кишвар паси сар намуда,  баъди анҷоми маъракаи наслгирӣ, ҳоло ба чарогоҳҳои тобистона  ронда мешавад.   Маъракаи наслгирӣ асосан анҷом ёфта, дар маҷмӯъ  аз ҳар сад сар моли майда наздик ба 70 сар барраю бузғола гирифта шудааст

  Рамаи   моли майдаи хоҷагиҳои  деҳқонии ба номи Нишонов ва “Роҳи абрешим”-и Ҷамоати деҳоти Саразм бошад, зимистонро низ дар дашту кӯҳҳои ҳудуди шаҳр мегузаронад. Ин рамаро солҳои зиёдест, ки  даҳмардаи авлодӣ ва варзида  Фатҳулло Бобоев ва писаронаш Ашӯру Султон нигоҳубин менамоянд.

  Раиси шаҳр Абдухолиқ Холиқзода  аз  чарогоҳи   мавеъи Чавлии Ҷамоати деҳоти Саразм боздид намуда, бо кору бори ин чорводорони собиқадор ва асил шинос шуд.

  Гуфта шуд, ки дар рамаи онҳо беш аз 700 сар моли майдаи ин ду хоҷагӣ парвариш меёбад. Имсол низ  онҳо  гӯсфандонро аз зимистон фарбеҳу солим бароварда, аз ҳар сад сар 90 сарӣ насл гирифтанд,

  Ҳоло рамаи онҳо дар чарогоҳҳои сералафи мавзеъи  Палангсой  нигоҳдорӣ шуда, баъди муддате ба чаррогоҳҳои тобистонаи Ҳафткӯл бурда мешавад.

2025-05-06 08:40:00

ПАНҶАКЕНТ: БОҒИ КАМОЛИ ХУҶАНДӢ БОЗСОЗӢ МЕШАВАД..

Бо дастгирии мақомоти иҷроияи маҳаллии ҳокимияти давлатии шаҳри Панҷакент боғи фарҳангию фароғатии ба номи Камоли Хуҷандӣ, ки дар яке аз мазеъҳои зебоманзари шаҳр, дар соҳили дарёи Зарафшон воқеъ аст, аз ҷониби соҳибмулк, соҳибкори муваффақ Алишер Бозоров бо тарҳи комилан нав азнавсозӣ карда мешавад.

  Тавре, зимни боздиди раиси шаҳр Абдухолиқ Холиқзода шарҳ дода шуд, айни замон корҳои ободонию азнавсозӣ бо тарҳи нав оғоз шуда, атрофи  Кӯли ҷавонон, ки дар канори боғ воқеъ аст, роҳравҳо бо қуми  маҳин пӯшида, барои истироҳат ва шиноварӣ омода карда шудааст ва корҳо дар ин самт идома доранд.

  Мутобиқи лоиҳаи ангоравӣ дар боғ  бунёди манораи бузург тимсоли бурҷи Эйфели Порис, фаввораҳо, мавзеъҳои истироҳатӣ, қаҳвахонаю майдонҳои бозӣ,  айвонҳои мунаққаш барои нишаст, амфитеатр, роҳравҳои чароғон, майдон, гулгаштҳо ва лавҳаи ёдгорӣ ба хотири иштирокчиёни ҷанги дуюми ҷаҳон бо тарҳи нав ва ғайра пешбинӣ шуда, онҳо батадриҷ сохта мешаванд.

  Бо анҷоми ин ободкориҳо боғи фарҳангию фароғатии ба номи Камоли Хуҷандӣ ба минтақаи зебои фароғатӣ барои сокинону меҳмонон, сайёҳон ва баргузории чорабиниҳои гуногуни фарҳангӣ табдил хоҳад ёфт.