антанаҳои ҷашни 35-солагии истиқлоли давлатӣ дар варзишгоҳи шаҳри Панҷакент

Бегоҳи рӯзи 3 август дар варзишгоҳи марказии шаҳри Панҷакент бо иштироки намояндагони Ҳукумати Ҷумҳурии Тоҷикистон, мақомоти иҷроияи ҳокимияти давлатии вилояти Суғд ва шаҳр, меҳмонон-намояндагони ҳокимияти ҳамсояноҳияҳои Ургут, Тайлоқ ва Ҷонбойи вилояти Самарқанди Ҷумҳурии Ӯзбекистон, беш аз даҳ ҳазор нафар сокинони шаҳру деҳот, ҷомеаҳои меҳнатии корхонаю муасисаҳои шаҳр, тантанаҳои таҷлили ҷашни бузурги 35- солагии истиқлоли давлатии Ҷумҳурии Тоҷикистон бо шукӯҳу шаҳомат оғоз шуд.

Ҳозирон ва сокинони шаҳрро Президенти Академияи миллии илмҳои Тоҷикистон Қобилҷон Хушвахтзода аз номи Ҳукумати мамлакат, муовини якуми раиси вилояти Суғд Суҳайлӣ Қурбонзода аз номи муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд муҳтарам Раҷаб Аҳмадзода ва раиси шаҳри Панҷакент Абдухолиқ Холиқзода бо ин ҷашни бузурги давлатӣ ва миллӣ шодбош гуфтанд.

Дар идомаи тантанаҳои идона ба иштирокчиёни ҷашнвора намоиши театрикунонида ва барномаи ҷолиби ҳунарӣ, ки тарраннумгари истиқлолу ваҳдату озодӣ ва обдии Ватани озоду соҳибистилол буданд, пешкаш карда шуданд ва чорабинии идона бо оташпароканӣ-салюти идона анҷом ёфт.

Имрӯз бо иштироки намояндаи Ҳукумиати Ҷумҳурии Тоҷикистон, Президенти Академияи миллии илмҳои Ҷумҳурии Тоҷикистон Қобилҷон Хушвахтзода, муовини якуми раиси вилояти Суғд Суҳайлӣ Қурбонзода ва раиси шаҳри Панҷакент Абдухолиқ Холиқзода ба ифтихори ҷашни муқаддас ва бузурги миллӣ – 35-солагии истиқлоли давлатии Ҷумҳурии Тоҷикистон, ба як қатор намояндагони соҳаҳои иқтисодию иҷтимоии шаҳр мукофотҳои давлатӣ, ифтихорномаю унвону нишонҳои ифтихорӣ супорида шуд.

Аз ҷумла, ба собиқадори соҳаи тандурустӣ, ҷарроҳи кӯдакон Бегмурод Адҳамов, мудири шуъбаи ҷарроҳии умумии Беморхонаи марказии шаҳр Ҳикматулло Яҳёзода ва собиқ омӯзгори муассисаи таҳсилоти миёнаи умумии №13-и деҳаи Нигнот Сафарбой Собиров, ки бо Фармони Президенти Ҷумҳурии Тоҷикистон бо медали “Хизмати шоиста” сарфароз гардонида шудаанд, ин мукофоти давлатӣ дар вазъияти тантанавӣ тақдим карда шуд.

Ҳамчунин ба як гурӯҳ намояндагони соҳаҳои тибу маориф, саноату сохтмон, соҳибкорон, хадамоти бонкӣ, хидматрасонӣ, аҳли фарҳанг ва мақомоти ҳифзи ҳуқуқ ифтихорномаи мақомоти иҷроияи ҳокимияти давлатии вилояти Суғд ва шаҳри Панҷакент, нишону унвонҳои ифтихорӣ супорида шуд

Рафти иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба таъмини рушди соҳаи маориф, Стратегияи миллии рушди маорифи Ҷумҳурии Тоҷикистон барои давраи то соли 2030 дар муассисаҳои таълимии шаҳри Панҷакент дар машварати августии кормандони соҳаи маорифи шаҳр мавриди муҳокима қарор дода шуд.

Машварат бо иштироки раиси шаҳр Абдухолиқ Холиқзода, директори Маркази дарёфт ва рушди истеъдодҳои раёсати маорифи вилояти Суғд Имомалӣ Бобоев, сарварони муассисаҳои таълимӣ ва омӯзгорон баргузор гардид.

Қабл аз оғози машварат иштирокчиён аз намоиши ҳунари аъзоёни маҳфилҳои муассисаи таҳсилоти иловагӣ ва кӯдакистонҳо дидан намуданд.

Дар машварат таваҷҷӯҳи роҳбарияти шуъбаи маориф, сарварони муассисаҳои таълимӣ ва омӯзгорон ба баланд бардоштани сифати таълиму тарбия, назорати пайваста ба раванди таълим, дарёфти соҳибистеъдодҳо ва таъмини иштироки шумораи бештари хонандагон дар озмуну олимпиадаҳои ҷумҳуриявӣ, иҷрои муқаррароти қонунгузорӣ оид ба масъулият барои таълиму тарбияи кӯдак, омодагӣ ба мавсими зимистон ва дигар масъалаҳои муҳими соҳа ҷалб карда шуд.

Дар фарҷоми машварат ба як гурӯҳ кормандони соҳаи маориф нишони “Аълочии маориф ва илми Ҷумҳурии Тоҷикистон”, сипосномаҳои раёсати маорифи вилояти Суғд ва мақомоти иҷроияи маҳаллии ҳокимияти давлатии шаҳри Панҷакент тақдим карда, барномаи ҷолиби ҳунарӣ пешкаши ҳозирин карда шуд.

Дар доираи нақшаи омодагиҳо ба 35- солагии истиқлоли давлатии Ҷумҳурии Тоҷикистон роҳи кӯчаи марказии деҳаи Амондараи деҳоти Амондараи шаҳри Панҷакент бо дастгирии мақомоти иҷроияи маҳаллии ҳокимияти давлатии шаҳр ва саҳмгузории сокинон мумфарш карда мешавад.

Мавриди қайд аст, ки роҳи дохили деҳа ба масофаи як километр бо харҷи 175 ҳазор сомонӣ саҳми сокинон, ҷалби техникаи роҳсозии муассисаи давлатии истифодаи роҳҳои нақлиётгарди шаҳр мумфарш карда мешавад ва ҳоло қисми асосии корҳо анҷом дода шудааст.

Баробари ин сокинони деҳа бо тоза намудани кӯчаҳои деҳа, ҷӯйҳо ва ба тартиб овардани намои хонаҳо ба таҷлили бошукӯҳи ҷашни 35- солагии истиқлоли кишвар омодагӣ мегиранд.

Имрӯз ҷиҳати иҷрои Амри Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аз 15 сентябри соли 2011 ва ҷадвали баргузории нишастҳои матбуотӣ, ки мақомоти иҷроияи ҳокимияти давлатии вилояти Суғд тасдиқ намудааст, дар мақомоти иҷроияи маҳаллии ҳокимияти давлатии шаҳри Панҷакент оид ба натиҷаҳои рушди иқтисодиву иҷтимоии шаҳр дар нимсолаи аввали соли 2026 нишасти матбуотӣ баргузор шуд.

Ба хабарнигорон маводи иттилоотӣ оид ба натиҷаҳои рушди иқтисодию иҷтимоии шаҳр дар нимсолаи аввали соли 2026 дастрас шуда, онҳо бо рафти иҷрои нақшаи омодагиҳо ба 35-умин солгарди истиқлоли давлатии Ҷумҳурии Тоҷикистон, ки дар ин давра ба ҷо оварда шуданд, шинос карда шуданд.

Дар ин замина раиси шаҳр Абдухолиқ Холиқзода ба беш аз 45 саволи хабарнигорони васоити ахбори маҳаллӣ ва вилоятӣ, шабакаи аввали телевизиони Тоҷикистон ва дигар рӯзноманигорон оид ба рафти бунёди майдон ва гулгашти Абулқосим Фирдавсӣ, биноҳои баландошёнаи истиқоматӣ, таъмири пулҳо, танзими нарх дар бозор, таъминот бо барқ, бунёди роҳи канорӣ дар шаҳр ва таъмири роҳҳои минтақаи сайёҳию истироҳатии Ҳафкӯл, дохили шаҳр, қитъаи роҳи Суғдиён – Дуоба, таҷдиди биноҳои баландошёна дар қисмати ғарбии шаҳр, риояи қоидаҳои забони адабии тоҷикӣ дар навишти лавҳаю овезаҳо, беҳдошти вазъи санитарии шаҳр ва хидматрасонии мусофиркашонӣ, аз байн бурдани савдои кӯчагӣ ва дигар саволҳо посухҳои мушаххас дода, масъалаҳои мавриди назари рӯзноманигоронро шарҳу тавзеҳ дод.

Гуфта шуд, ки мақомоти иҷроияи маҳаллии ҳокимияти давлатии шаҳр бо васоити ахбори умум робитаи пайваста дошта, омодааст минбаъд низ ҳамкориро бо онҳо дар сатҳи зарурӣ роҳандозӣ намояд.

Деҳаи Роғичи деҳоти Моғиён яке аз дурдасттарин маҳалҳои аҳолинишини шаҳри Панҷакент маҳсуб шуда, 18 километр болотар аз маркази маъмури ҷамоати деҳот воқеъ шудааст.

Ба рағми ин Роғичи дурдаст, ки дар оғӯши манзараҳои нотакрори табиат ва иҳотаи кӯҳҳо ҷойгир аст, аз назари мақомоти иҷроияи маҳаллии ҳокимияти давлатии шаҳр дур намондааст.

Деҳа бо нерӯи барқи мустақил таъмин буда, 120 нафар фарзандони деҳа дар муассисаи таҳсилоти миёнаи умумии №127 таълим мегиранд. Роҳ то деҳа ҳама фасли сол кушода аст.

Раиси шаҳри Панҷакент Абдухолиқ Холиқзода зимни сафари корӣ ба деҳоти Моғиён аз ин деҳа дидан намуда, бо сокинон сӯҳбати гарму самимӣ анҷом дод.

Ҳукумати мамлакат барои беҳдошти шароити зист дар ин деҳаи баландкӯҳ, ки зимистонаш нисбат ба водиҳо ду моҳ барвақт расида, дер давом мекунад, ҳамаи тадбирҳои заруриро роҳандозӣ менамояд.

Барои таъмири асосии бинои муассисаи таълимии деҳа ва бунгоҳи тиббӣ бо дастгирии мақомоти иҷроияи маҳаллии ҳокимияти давлатии шаҳр, ҷамоати деҳоти Моғиён, сохтори кӯмаки аввалияи тиббӣ- санитарӣ ва ҷалби корхонаҳои саноатие, ки дар ҳудуди деҳот фаъолият менамоянд, корҳои амалӣ ба роҳ монда, роҳ то деҳа дар ҳолати корӣ нигоҳ дошта мешавад.

Зимни боздид наврасони маъюби сокини деҳа аз ҷониби табибон дидан намуда, ба беш аз 40 оила орд, равған ва дигар маводи хурока тақдим карда шуд.

Бо дастгирии мақомоти иҷроияи маҳаллии ҳокимияти давлатии шаҳри Панҷакент, саҳмгузории шарикони рушд ва сокинон дар деҳоти Моғиён ба масофаи 14 километр хати об кашида, дар маҷмӯъ ҳолати обёрии 350 гектар замин беҳтар карда мешавад.

Тавре зимни боздиди раиси шаҳр Абдухолиқ Холиқзода аз рафти насби хати об гуфта шуд, он аз мавзеъи Даҳани об оғоз шуда, деҳаҳои Оби борик, Пушти Қӯрғон, Фонӣ ва Моғиёнро дар масофаи 14 километр убур карда, тавассути он ҳолати обёрии 210 гектар замин беҳтар ва 140 гектар замини лалмӣ обёрӣ карда мешавад.

Бо кашидани хати об ва обёрии заминҳои хоҷагиҳои деҳқонӣ ва қитъаҳои наздиҳавлигӣ наздик ба 9000 нафар сокинони деҳаҳо баҳраманд мешаванд.

Ба масъулони лоиҳа, ширкати паймонкор , ҷамоати деҳот ва фаъолон ҷиҳати дар мӯҳлати пешбинишуда ва тибқи меъёрҳои муқарраршуда ба анҷом расонидани корҳо дастур дода шуд.