Бо дастгирию мусоидати мақомоти иҷроияи маҳаллии ҳокимияти давлатии шаҳри Панҷакент, ҷалби соҳибкорон, аҳолӣ ва сармояи шарикони рушд дар деҳоти Халифа Ҳасан дар доираи нақшаи омодагиҳо ба ҷашни 35- солагии истиқлоли давлатии Ҷумҳурии Тоҷикистон бунёди иншшооти иҷтимоӣ вусъат меёбад.

Дар сафари корӣ раиси шаҳр Абдухолиқ Холиқзода аз рафти сохтмони бинои нави муассисаи таҳсилоти умумии асосии № 1 дар деҳаи Деваштич, ки бо дастгирии мақомоти иҷроияи маҳаллии ҳокимияти давлатии шаҳри Панҷакент, сармоягузории Бунёди миллии иҷтимоии маблағгузории Тоҷикистон сохта мешавад, боздид намуд.

Гуфта шуд, ки бино дорои ду қабат, 13 синфхона, толор ва дигар ҳуҷраҳои ёрирасон буда, барои қабули 480 хонанда дар ду баст пешбинӣ шудааст ва ҳоло бинокорони ҶДММ “Гулгун” бо ҷалби техникаи зарурӣ ба сохтмони он машғул ҳастанд.

Дар деҳаи Шӯрчаҳ бошад бо саҳмгузории сокинон таъмиру таҷдиди собиқ бинои муассисаи таҳсилоти миёнаи умумии № 17 идома дорад. Бо анҷоми ин корҳо масъалаи бо ҷои нишаст пурра таъмин намудани хонандагон ҳал хоҳад шуд.

Дар ин сафарӣ корӣ ҳамчунин дар мавзеъи Хамиртеппа бо рафти бунёди хонаҳои истиқоматии сокинони деҳаи Хумгарони деҳоти Косатарош, ки бо маблағгузории корхонаи муштараки “Зарафшон” аз ҷониби худи онҳо сохта мешавад, шинос шуда, барои дар мӯҳлати муайяншуда тибқи лоиҳа ва меъёрҳои бинокорӣ сохтани биноҳои истиқоматӣ дастур дода шуд.

Зимни боздид аз фаъолияти коргоҳи истеҳсоли хишти сементӣ, ки аз ҷониби соҳибкори маҳаллӣ сохта шудааст, барои зиёд ва васеъ намудан истеҳсоли ин маҳсулоти зарурии бинокорӣ маслиҳат дода шуд

Дар деҳоти Сӯҷинаи шаҳри Панҷакент дар доираи нақшаи омодагиҳо ба 35- солагии истиқлоли давлатии Ҷумҳурии Тоҷикистон дар ҳамкорӣ бо соҳибкорон корҳои бунёдкорию ободонӣ вусъат меёбад.

Раиси шаҳр Абдухолиқ Холиқзода зимни сафари корӣ ба ҷамоати деҳот дар маҳаллаи Баракат бо фаъолияти коргоҳи хурди истеҳсоли хишти сементии соҳибкор Салоҳиддин Ҳамроев шинос шуд.

Тавре иттилоъ дода шуд, ин ҷо ҳоло чор нафар коргарон рӯзе то 600-700 дона хишти сементӣ мерезанд. Бо оғози фасли гармо истеҳсоли ин навъи маҳсулоти бинокорӣ афзуда, ҳоло соҳибкор ҳамчунин барои роҳандозии банду басти дару тирезаҳои пластикӣ омодагӣ мегирад.

Дар коргоҳи дигари истеҳсоли хишти сементӣ, ки соҳибкор Хушназар Зиёев бунёд намудааст , ҳоло чор нафар сокинони деҳа ба кор ҷалб шуда, бо зиёд шудани харидорон шумораи коргарон ва истеҳсоли дигар намуди маҳсулоти бетонӣ, аз ҷумла, сутунпояҳо, қубурҳои калонҳаҷм, обравҳои бетонӣ низ меафзояд.

Зимни боздид иқдоми соҳибкор Шоҳиҷаҳон Сиддиқов, ки бо ҷалби техникаи зарурӣ, насби таҷҳизот ба бунёди коргоҳи коркарди қуму шағал дар соҳили дарёи Зарафшон машғул аст, муҳим арзёбӣ шуда, барои дар мӯҳлати пешбинишуда анҷом додани корҳо дастур дода шуд.

Дар ин радиф дар ҷараёни боздид мағозаи масолеҳи бинокории соҳибкор Темур Бурҳонов мавриди истифода қарор дода шуд. Дар ин ҷо ҳама намуди масолеҳ ва таҷҳизоти барои таъмиру сохтмон зарурро дастрас кардан мумкин аст.

Гуфта шуд, ки бунёди коргоҳҳои истеҳсоли хишти сементӣ, коркарди қуму шагал ва мағозаи масолеҳи бинокорӣ ба рушди ободкорию созандагӣ дар деҳот мусоидат мекунад.

Баҳси замин, риояи қоидаҳои бунёди бинои истиқоматӣ, таъмин бо манзил ва замини наздиҳавлигӣ, мусоидат барои дарёфти ҷойи кор, кӯмак барои табобат ва расонидани ёрии молиявӣ аз ҷумлаи масъалаҳое буданд, ки дар рӯзи қабули раиси шаҳри Панҷакент Абдухолиқ Холиқзода шаҳрвандон ба миён гузоштанд.

Зимни шунидани муроҷиатҳо ба шаҳрвандон роҳҳои ҳалли қонунии онҳо фаҳмонида, ба раисони ҷамоатҳои деҳот, роҳбарони ташкилоту муассисаҳо ҷиҳати баррасӣ ва ҳалли онҳо дастур дода шуд.

Таъкид карда шуд, ки ҳамаи муроҷиатҳо ба қайд гирифта, баъди баррасӣ ба шаҳрвандон дар муҳлати муқаррарнамудаи қонун ҷавоб гардонида мешавад.

Дар рӯзи аввали гусели ҷавонон ба хидмати ҳарбӣ, деҳоти Саразми шаҳри Панҷакент нақшаи даъватро барзиёд ва пеш аз мӯҳлат ба иҷро расонид.

Субҳи рӯзи аввали даъвати тирамоҳии имсола дар саҳни бинои маъмурии Ҷамоати деҳот ҳамаи 63 нафар даъватшавандагон, ки аксарашон бо амри дил хидмати Ватанро ихтиёр кардаанд, бо волидон ва мӯсафедони барӯманд, гирди дастархони идона ҷамъ омаданд.

Ба тавассути роҳандозии дурусти тарғибу ташвиқ дар байни ҷавонони синни даъватӣ , волидони онҳо ва корҳои ташкилию сафарбарӣ дар деҳоти Саразм, Хурмӣ, Халифа Ҳасан, Хурмӣ Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ”-ро чун ҳамасола ин навбат низ пеш аз мӯҳлат ба иҷро расониданд.

Дар ин ҷамоатҳои деҳот омодагӣ ба даъвати оянда аз ҳоло шурӯъ мешавад ва маҳз ҳамин кори доимӣ бо ҷавонон омили пеш аз мӯҳлат ба иҷро расонидани нақшаи даъват ба хидмати ҳарбӣ аст.

Муҳимтар аз ин ҷавонон дарк кардаанд, ки хидмати ҳарбӣ чун қарзи шаҳрвандӣ барояшон ҳатмӣ аст ва онҳо бояд ин қарзро бо сари баланду ифтихор ба ҷо оранд. Аз ин ҷост, ки сафи ихтиёриёни хидмат ба Ватан сол то сол меафзояд.

Дар маъракаи имсолаи даъвати тирамоҳии ҷавонон ба хидмати ҳарбӣ маҳаллаҳои Азизобод, Истиқол, Қоқурӣ, Сӯзангарон, Самарқандӣ, Рӯдакӣ. Холмуродов, Зардолузор, Лаби Чашма, Меҳргон низ нақшаи муайяншударо пеш аз мӯҳлат иҷро намуданд.

...Қатори мошинҳо,ки Парчами Тоҷикистон болояшон парафшон аст, бо даъватшававандаҳо бо фотиҳаи собиқадорон ва падару модарон ва зери навои мусиқию суруд роҳ пеш мегиранд.

Онҳо бо сари баланд ва ҳисси ифтихор ба хидмати Модар - Ватан мераванд.

Ватан - ҷоне, ки дар ҷони ману туст,

Ватан - ноне, ки дар хони ману туст.

Ватан гуфтан кам аст, эй ҷон, Ватан бош!

Ватан дар шонаву шони ману туст.

Ин маънӣ дар мулоқоти роҳбарияти шуъбаи минтақавии Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар водии Зарафшон бо кормандони соҳаи тандурустии шаҳри Панҷакент, ки дар толори Кохи Лоиқ дар ҳамкорӣ бо мақомоти иҷроияи маҳаллии ҳокимияти давлатии шаҳр баргузор шуд, таъкид гардид.

Гуфта шуд, ки ба таъкиди Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пешгиии кирдорҳои коррупсионӣ, фароҳам овардани фазои оштинопазир ба он ва ба ин раванд ҷалб намудани тамоми мақомоти давлатӣ, ниҳодҳои ҷомеаи шаҳрвандӣ вазифаи на танҳо субъектҳои мубориза бо коррупсия, балки аҳли ҷомеа мебошад.

Зимни баррасии рафти иҷрои “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” дар муассисаҳои тандурустӣ таваҷҷӯҳи кормандони соҳа ба пешгирии омилҳои коррупсионӣ, даст назадан ба чунин амалҳо, ки эътимоди мардумро ба адолат, ниҳодхои давлатӣ коҳиш медиҳад, чораҳои пешбининамудаи қонунгузорӣ дар мариди ошкор шудани чунин амалҳо ҷалб карда шуд.

Аз роҳбарияти беморхонаи марказӣ, сохтори кӯмаки аввалияи тиббӣ- санитарӣ, дигар муассисаҳои тиббӣ талаб карда шуд, ки назоратро ба фаъолияти кормандони тиббӣ пурзӯр намуда, барои пешгирии омилҳо ва амалҳои коррупсионӣ чораҳои қатъӣ андешида шавад.

Натиҷаҳои рушди иқтисодию иҷтимоии шаҳри Панҷакент дар нӯҳ моҳи соли равон дар заминаи дастурҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, супоришҳои муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд, муҳтарам Раҷаб Аҳмадзода имрӯз дар маҷлиси фаъолони шаҳр мавриди баррасӣ қарор дода шуд.

Дар ҷаласа, ки таҳти раёсати раиси шаҳр Абдухолиқ Холиқзода баргузор шуд, намояндаи мақомоти иҷроияи ҳокимияти давлатии вилояти Суғд, раиси иттифоқҳои касабаи вилоят Шарифулло Абдуллозода иштирок намуд.

Муовини якуми раиси шаҳр Сабур Собирзода дар бораи ҷамъбасти натиҷаҳои рушди иқтисодию иҷтимоии шаҳр дар нӯҳ моҳи соли ҷорӣ маърӯза кард.

Аз ҷумла, таъкид шуд, ки дар ин давра Барномаи рушди иҷтимоию иқтисодии шаҳри Панҷакент барои солҳои 2021-2025 баробари 96,4 фоиз таъмин шуда, ба иқтисоди шаҳр 172,4 миллион сомонӣ сармояи дохилӣ ва беруна ворид карда, сармояи асосӣ дар соҳаи сохтмон аз ҳисоби ҳамаи манбаъҳои 148,5 млн. сомониро ташкил додааст.

Дар ин давра ҳаҷми истеҳсоли маҳсулоти саноатӣ ба 5,5 млрд. сомонӣ расонида шуд, ки нисбат ба ҳамин давраи соли 2024-ум 1,3 млрд.сомонӣ ё 25,3 фоиз зиёд мебошад.

Истеҳсоли 31 намуди маҳсулоти саноатӣ афзуда, 12 корхонаю коргоҳҳои нав мавриди истифода қарор дода, шумораи корхонаҳои саноатӣ ба 59 адад ва коргарону кормандон ба 3785 нафар расонида шудааст,

Қайд шуд, ки дар давраи ҳисоботӣ ҳаҷми истеҳсоли маҳсулоти кишоварзӣ ба зиёда аз 1,9 миллиард сомонӣ расонида, 53567,8 тонна ғалла, аз ҷумла 13633 тонна шолӣ, 74800,4 тонна картошка, 98672,8 тонна сабзавот, 2803 тонна полезиҳо, 9544,2 тонна мева,4319,5 тонна ангур ҷамъ оварда шудааст.

Зикр шуд, ки ба истиқболи ҷашни 35-солагии истиқлоли давлатии Ҷумҳурии Тоҷикистон дар шаҳр бунёди 984 иншоот пешбинӣ шуда, 809 иншооти таъиноти гуногун мавриди истифода қарор дода шудааст.Ҳоло дар зиёда аз 175 иншоот кор бомаром идома дошта, дар онҳо беш аз 3384 нафар ба кор ҷалб карда шудаанд.

Дар ҳисобот ҳамчунин вазъи соҳаҳои роҳу нақлиёт, маорифу тандурустӣ, ҳифзи иҷтимоии аҳолӣ, хидматрасонӣ, сайёҳӣ, кор бо занону бонувон ва дигар соҳаҳои иқтисодию иҷтимоии шаҳр таҳлил шуд.

Зимни баррасии маърӯза раиси шаҳр аз муовинони раиси шаҳр- масъулони соҳаҳо, роҳбарони як қатор ташкилоту муассисаҳо пурсиш ба амал оварда, таваҷҷӯҳи онҳоро ба беҳдошти корҳо, таҳлили вазъи воқеии соҳаҳо, эътибори ҷиддӣ ба тақвияти корҳои тарғиботӣ, ислоҳи нуқсонҳои ҷойдошта, бо нишондиҳандаҳои хуб ҷамъбаст намудани соли равон, ки марҳилаи муҳими омодагӣ ба 35-умин солгарди истиқлоли давалатии кишвар аст, ҷалб карда шуд.

Дар фарҷоми ҷаласа намояндаи мақомоти иҷроияи ҳокимияти давлатии вилояти Суғд сухан кард.

Ҳамасола 14 октябр ба хотири арҷгузорӣ ба нақшу ҷойгоҳи соҳибкорон дар ҳаёти иқтисодию иҷтимоӣ дар мамлакат Рӯзи соҳибкорон таҷлил карда мешавад.

Имрӯз дар Кохи Лоиқи шаҳри Панҷакент Рӯзи соҳибкорон бо иштироки намояндагони доираҳои соҳибкории шаҳр таҷлил карда шуд.

Зимни табрики соҳибкорон раиси шаҳр Абдухолиқ Холиқзода аз дастгирӣ ва таваҷҷӯҳи пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди соҳибкорӣ ёдовар шуда, нақши муҳими соҳибкорон дар рушди соҳаҳои иқтисоду иҷтимоиёти шаҳр таъкид шуда, саҳми онҳо дар таъмини бозори дохила, бунёди иншооти таъиноти гуногун, бору мусофиркашонӣ, ғанӣ гардонидани буҷет, бо шуғл фарогирии аҳолӣ ва дигар соҳаҳо муҳим арзёбӣ гардид.

Аз ҷумла гуфта шуд, мақомоти иҷроияи маҳаллии ҳокимияти давлатии шаҳр дар ҷараёни тақвияти муколамаи давлат, бахши хусусӣ ва шарикони рушд, барои рушди сармоягузорию соҳибкорӣ корҳои зиёдеро анҷом медиҳад ва ҳоло дар шаҳр 9931 нафар соҳибкорон ба қайд гирифта шудаанд, ки ин назар ба соли гузашта 277 нафар бештар аст.

Бо мақсади мусоидат ба рушди соҳибкорӣ ва ҷалби бештари сармоягузорон Шӯро оид ба рушди соҳибкорӣ ва беҳтар намудани фазои сармоягузорӣ ташкил гардида, дар ин давраи соли равон бо иштироки соҳибкорону сармоягузорон форумҳои беҳдошти саводи молиявӣ баргузор шуда, дар ҳамкорӣ бо соҳибкорон, шарикони рушд корҳои зиёде анҷом дода шудааст. Ҳоло беш аз 74 фоизи маҷмӯи маҳсулоти дохилии шаҳр ба фаъолияти соҳибкорӣ рост меояд.

Таваҷҷӯҳи соҳибкорон ба сармоягузорӣ ба истеҳсоли масолеҳи сохтмон, коркарди маҳсулоти кишоварзӣ, аз ҷумла пашм, партовҳои истеҳсолӣ ва маишӣ, заршӯӣ, бунёди боғҳои интенсивӣ ва токзори хавозавӣ, истеҳсоли орду рӯған ва дигар соҳаҳои истеҳсолию хидматрасонӣ ҷалб карда, таъкид шуд, ки мақомоти иҷроияи маҳаллии ҳокимияти давлатии шаҳр барои рушди ин самтҳои соҳибкорӣ ҳамаҷониба мусоидат менамояд

Дар фарҷом як идда соҳибкорони муваффақ бо сипосномаҳои мақомоти иҷроияи маҳаллии ҳокимияти давлатии шаҳр сарфароз гардонида, барои иштирокчиён барномаи ҷолиби ҳунарӣ пешкаш карда шуд.

Беватан нест ғарибе, ки кунад ёди Ватан,

Дар Ватанбудаи бе ёди Ватани беватан аст.

Ин шоҳбайт ва дигар абёти ноби шоири тавоною навпардози тоҷик, зиндаёд Мастон Шералӣ дар тантанаҳое, ки дар шаҳри Панҷакент ба ифтихори 90- солагии ӯ бо ибтикори мақомоти иҷроияи маҳаллии ҳокимияти давлатии вилояти Суғд ва шаҳр баргузор шуд, вирди забони иштирокчиёни он- намояндагони аҳли адабу фарҳанги ҷумҳурӣ, вилоят ва шаҳр буд.

Ҷашнвораи Мастон Шералӣ нахуст дар зодгоҳи шоир- деҳаи Зери Ҳисори Ҷамоати деҳоти Рӯдакӣ, бо гулгузорӣ дар пояи муҷассамаи ӯ дар саҳни муассисаи таҳсилоти миёнаи умумии № 52, ки номи ӯро дорад, ифтитоҳи хона – музеи шоир, толори замонавии варзишӣ ва баргузории маҳфили адабию фарҳангӣ оғоз шуд.

Дар ҳузури ҳамдиёрони шоир ва аҳли адабу фарҳанг раиси шаҳр Абдухолиқ Холиқзода ҷашнвораи шоирро бо таъкиди ҷойгоҳи Мастон Шералӣ дар адабиёти муосири тоҷик, таҷлили 90- солагиаш, ки дар заминаи сиёсати фарҳангпарваронаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон баргузор мешавад, ифтитоҳ намуд.

Муовини аввали раиси Иттифоқи нависандагони Тоҷикистон Ато Мирхоҷа, Шоири Халқии Тоҷикистон Аскар Ҳаким, адабиётшинос, доктори илми филология, профессор Абдунабӣ Сатторзода дар бораи вижагиҳои ашъори Мастон Шералӣ, навпардозии ӯ дар шеъри солҳои 60-у 80-уми садаи бист, сухан карда, ба дастандаркорони таҷлили 90- солагии ӯ изҳори сипос намуданд.

Зимнан, ба ифтихори таҷлили ҷашнвораи шоир бо дастгирии мақомоти иҷроияи маҳаллии ҳокимияти давлатии шаҳр, саҳмгузории соҳибкори муваффақ Абдушафеъ Ҳоҷиев, фарзанди шоир Парвиз Мастон, сокинони деҳа муассисаи таълимӣ таъмиру таҷдид шуда, саҳни он бозсозӣ гардида, хона – музеи шоир ва толори варзишӣ бунёд карда шуд.

Ҳамчунин бо маблағгузории мақомоти иҷроияи маҳаллии ҳокимияти давлатии шаҳр мунтахаби ашъори шоир бо номи “Боли парвозам , Ватан” дар нашриёти “Хуросон”- и шаҳри Хуҷанд ба табъ расид ва ба меҳмонону иштироокчиёни ҷашни шоир тақдим карда шуд.

Ҷашнвораи шоир бо зиёрати оромгоҳи Одамушшуаро Абӯабдулоҳи Рӯдакӣ дар деҳаи Панҷруд, баргузории конфронси илмию амалӣ таҳти унвони “Мастон Шералӣ- шоири шеърҳои офтобӣ” дар Кохи Лоиқ ва маҳфили фарҳангии “Боли парвозам, Ватан” дар Кохи фарҳанги шаҳр ба номи Олим Бобоев идома ёфт.

Раиси шаҳр, намояндаи мақомоти иыроияи ҳокимияти давлатии вилояти Суғд, директори китобхонаи оммавии вилоятии ба номи Тошхоҷа Асирӣ Баҳром Мирсаидов ,шоирону адабиётшиносон аз нақшу ҷойгоҳи Мастон Шералӣ, мавзӯъҳои ашъори шоир, ки дӯст доштани Ватан, тараннуми бузургию шаҳомати он дар меҳвари он қарор дорад, вижагиҳои ҳунари шоирӣ ва шахсияти нотакрори ӯ, навовариҳо дар мазмуну мӯҳтавои шеъри муосири тоҷик, ки баъдан дар ашъори Лоиқ Шералӣ, Бозор Собир ва дигарон густариш ёфт, сухан карданд.

Барномаи фарҳангию ҳунарӣ, ки аз сурудҳо бар ашъори Мастон Шералӣ, сухангӯию шеърхонии шоирону олимон ,ҳунарнамоии санъаткорон ва рақсҳои ҷолиб иборат буд, ба иштирокчиёни ҷашнвора таассуроти амиқ боқӣ гузошт ва хотираи ин шоири тавоно, ватансаро ва навпардозро дар дилу дидаи ҳамдиёрон зинда гардонид.

Дар доираи нақшаи омодагиҳо ба ҷашни 35- солагии истиқлоли давлатии Ҷумҳурии Тоҷикистон дар шаҳри Панҷакент бунёди 984 иншоот пешбинӣ шуда, то ин муддат 809 иншооти таъиноти гуногун мавриди истифода қарор гирифта, ҳоло дар зиёда аз 175 иншоот, аз ҷумла 40 бинои истиқоматии бисёрошёна бо марказҳои савдо ва хизматрасонӣ, кор бомаром идома дошта, дар онҳо беш аз 3384 нафар ба кор ҷалб карда шудаанд.

Рафти бунёди иншооти ҷашнӣ зери назорати пайвастаи мақомоти иҷроияи маҳаллии ҳокимияти даввлатии шаҳр қарор дорад.

Раиси шаҳр Абдухолиқ Холиқзода аз рафти як қатор иншооти ҷашнӣ, аз ҷумла, сохтмони маркази оши палов ва таъмиру таҷдиди бинои асосии осоишгоҳи “Шифо” дидан намуд. Гуфта шуд, ки дар доираи нақшаи аазнавсозӣ ва таъмири осоишгоҳ бунёди майдончаи варзишӣ ба анҷом расида, он барои ба истифода додан омода карда шудааст.

Дар ин сафари корӣ ҳамчунин аз рафти бунёди бинои нави муассисаи таҳсилоти миёнаи умумии № 31 дар деҳаи Озодагон, сохтмони бинои маъмурии Раёсати Агентии суғуртаи иҷтимоӣ ва нафақаи назди Ҳукумати ҷумҳурӣ дар шаҳр, бинои маъмурии шуъбаи маориф ва хонаҳои истиқоматӣ барои кормандони соҳаҳои иҷтимоӣ, боғи фарҳангии ба номи Абулқосим Фирдавсӣ дар қисмати шарқии шаҳр боздид карда шуд.

Ба масъулони ширкатҳои сохтмонӣ барои дар муҳлати пешбинишуда, бо сифати хуб, мутобиқ ба лоиҳа ва меъёрҳои маъмулӣ бунёд намудани иншоотҳои ҷашнӣ дастур дода шуд

Дар доираи талаботи Қарори Ҳукумати мамлакат оид ба сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2025-2026 бо дастгирии мақомоти иҷроияи маҳаллии ҳокимияти давлатии шаҳри Панҷакент, ҳамкорӣ бо шабакаҳои барқи шаҳр ва сармоягузории соҳибкор Мардон Насриддинов неругоҳи хурди барқи обии “Панҷруд” баъди танаффуси тӯлонӣ боз фаъол гардонида шуд.

Бо 500 квт соат нерӯи барқ, ки ин нерӯгоҳ истеҳсол мекунад, аз оғози моҳи равон хонаҳои сокинони деҳаи Панҷруд ва қисман деҳаҳои шафати он бо барқи доимӣ таъмин карда мешавад.

Нерӯгоҳи мазкур чордаҳ сол муқаддам бо ибтикори ин соҳибкор сохта шуда буд. Баъдан ба сабабҳои гуногун, аз ҷумла фарсуда шудани таҷҳизот, аз фаъолият бозмонд.

Фаъол гардонидани ин нерӯгоҳи хурди барқи обӣ барои беҳтар намудани таъминоти аҳолӣ бо барқ дар давраи тирамоҳу зимистон мусоидат менамояд.

Устоди варзиш, устоди Донишкадаи омӯзгории Тоҷикистон дар шаҳри Панҷакент, номзади илмҳои педагогӣ Шавкат Абдуллоев дар чемпионати ҷаҳон дар байни собиқадорон ва устодони варзиш аз рӯи гуштини тарзи озод соҳиби мақоми сеюм гардид.

Ин мусобиқа, ки ҳоло дар шаҳри Варшава, пойтахти Лаҳистон мегузарад, устодони варзишро аз саросари ҷаҳон гирд овардааст

Шавкат Абдуллоев аз ҷумлаи устодон ва мураббияҳои шинохтаи варзиши шаҳри Панҷакент буда, дар чандин мусобиқаҳои сатҳи минтақавӣ ва байналмилалӣ соҳиби ҷоиза гардида, дар тарбияи варзишгарони ҷавон низ саҳми арзанда мегузорад

Дар мақомоти иҷроияи маҳаллии ҳокимияти давлатии шаҳри Панҷакент тибқи нақша ҳар рӯзи шанбе раиси шаҳр Абдухолиқ Холиқзода муроҷиат ва арзу шикояти шаҳрвандонро шунида, барои ҳалли қонунии онҳо чораҳои амалӣ андешида мешавад.

Ин навбат муроҷиату дархости шаҳрвандон, ки ба қабули раиси шаҳр омада буданд, асосан ба масъалаҳои таъминот бо қитъаи замини наздиҳавлигӣ, манзил, ҳалли баҳси замин, кӯмак барои табобат, дастгирии кӯдаки маъюб, таъминот бо ҷойи кор оид буд.

Ҳамаи муроҷиатҳо шунида, роҳҳои ҳалли қонунии онҳо фаҳмонида, ба сохторҳои марбутаи мақомоти шаҳрдорӣ ва ташкилоту муассисаҳо барои ҳалли онҳо дастур дода шуд.

Ҳамаи муроҷиату дархостҳо дар мӯҳлати муқаррарнамудаи қонун баррасӣ карда, аз натиҷааш ба шаҳрвандон хабар дода мешавад.

-Қарзи фарзандӣ, рисолати инсонӣ ва вазифаи шаҳрвандии ҳар кадоми мост, ки забони шаҳдбори миллату давлатамонро сидқан ва мисли модари худ дӯст дорем, зеро он забони модарии мо мебошад, онро эҳтирому эҳтиёт кунем ва ҳамеша дар андешаи поку беолоиш нигоҳ доштани он бошем.

Бо ин иқтибос аз суханронии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҷамъомади аҳли маорифу фарҳанг, зиёиён, собиқадорон ва ҷавонони шаҳри Панҷакент бахшида ба Рӯзи забони давлатӣ дар толори Кохи Лоиқ оғоз шуд.

Ба ҳозирин паёми шодбошии мақомоти иҷроияи маҳаллии ҳоркимияти давлатии шаҳр ба муносибати Рӯзи забони давлатӣ ироа гардид.

Дар он аз ҷумла , таъкид шудааст, ки бо ин забони ноб дар дарозои таърих бузургтарин осори адабию илмӣ, шоҳкориҳои адабиёт эҷод шуда, он ба рағми ҳама ҷангҳову кашмакашҳо, забткориҳои аҷнабиён, дигар шудани дину оин асолати таърихиашро нигоҳ дошт, зиндаю побарҷо боқӣ монд.

Изҳор шуд, ки ҳамдиёрону ҳамватанони арҷманди мо қарзи фарзандӣ, рисолати инсонӣ ва вазифаи шаҳрвандии худро ҷиҳати поку бегазанд нигоҳ доштани асолати забони модарӣ, ки ифодагари ҳастии миллат аст, минбаъд низ бо камоли сидқу меҳр ба ҷо меоранд.

Ба ҳозирин барномаи ҷолиби ҳунарӣ, ки аз қироати шеърҳо дар бораи забони модарӣ, намунаҳо аз “Шашмақом”, сурудҳо бар ашъори шоирон дар бораи бузургдошт ва эҳтироми забон мураттаб гардида буд, пешкаш шуд.

Ба муносибати Рӯзи забони давлатӣ дар ҳама муассисаҳои таълимию фарҳангии шаҳр маҳфилу нишаст ва ҳамоишу конфронсҳо баргузор шуданд.

Ҳамдиёрони арҷманд!

Рӯзи забони давлатии Ҷумҳурии Тоҷикистонро, ки ҳамасола ба нишони арҷгузорӣ ба ин рукни муҳимтарини ҳастии миллат ва нишони давлатдории миллии тоҷикон санаи 5 октябр дар саросари мамлакат таҷлил карда мешавад, ба ҳамаи шумо сидқан муборакбод мегӯям.

Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид намудаанд, ки “Қарзи фарзандӣ, рисолати инсонӣ ва вазифаи шаҳрвандии ҳар кадоми мост, ки забони шаҳдбори миллату давлатамонро сидқан ва мисли модари худ дӯст дорем, зеро он забони модарии мо мебошад, онро эҳтирому эҳтиёт кунем ва ҳамеша дар андешаи поку беолоиш нигоҳ доштани он бошем”.

Забони модарии мо идомаи забонҳои давраи куҳани порсӣ аз замони нигориши “Авасто” то таназзули давлати Ҳахоманишиён, давраи миёна аз замони давлати Ашкониён то поёни давлатдории Сосониён ва давраи нав, аз замони ташаккули Сомониён то имрӯз аст. Бо такя ба ин натоиҷи илмӣ метавон гуфт, ки забони кунунии мо давраҳои куҳан ва миёнаро ба сар бурда, дар замони салтанати Сомониён баробар бо халқи тоҷик, бо гунҷонидани гӯишҳои забонҳои куҳани авастоӣ, паҳлавӣ, хоразмӣ, бохтарӣ, суғдӣ ва дигар забонҳои куҳани мардуми эронинажод дар таркиби худ, дубора ба номи форсии тоҷикии нав эҳё шуд.

Мо соҳиби забоне ҳастем, ки бар садри он поягузори адабиёти тоҷикӣ-форсӣ, устод Абуабдуллоҳи Рӯдакӣ нишастаст ва дар тӯли беш аз ҳазор сол ворисони ӯ дар ҳавзаи тамаддуни тоҷикию форсӣ бо ин забон адабиёти оламшумул офаридаанд.

Барҳақ, бо ин забони ноб дар дарозои таърих бузургтарин осори адабию илмӣ, шоҳкориҳои адабиёт эҷод шуда, он ба рағми ҳама ҷангҳову кашмакашҳо, забткориҳои аҷнабиён, дигар шудани дину оин асолати таърихиашро нигоҳ дошт, зиндаю побарҷо боқӣ монд.

Баъди ба истиқлол расидани Ҷумҳурии Тоҷикистон Ҳукумати мамлакат бо роҳнамоии Пешвои муаззами миллат, Президенти Ҷумҳурии Тоҷкистон, муҳтарам Эмомалӣ Раҳмон барои рушду нумӯи забони тоҷикӣ, тозаю беолоиш нигоҳ доштани он тадобири зиёде андешид, ки қабули Қонуни Ҷумҳурии Тоҷикистон "Дар бораи забони давлатии Ҷумҳурии Тоҷикистон" дар таҳрири нав, қарори Ҳукумати Ҷумҳурии Тоҷикистон "Дар бораи Барномаи рушди забони давлатӣ барои солҳои 2020-2030", таъсиси ниҳоди давлатӣ оид ба забон ва истилоҳот ва ҳамасола таҷлил намудани Рӯзи забони давлатии Ҷумҳурии Тоҷикистон аз ҷумлаи онҳо аст.

Хушбахтона, ҳоло забони ноби тоҷикӣ чун забони давлатӣ, муоширату коргузорӣ аз ғамхориву пуштбонии давлату Ҳукумат, ҷомеи шаҳрвандӣ ва кулли ҳамватанон чун рамзи устувориву пойдории давлат ва истиқлоли сиёсии он бархурдор аст.

Мояи ифтихори ҳамзабонон аст, ки бо ин забони нобу фасеҳ Пешвои муаззами миллати мо аз минбарҳои баланди созмонҳои бонуфузи ҷаҳонӣ мавқеъу ҳадафҳои сулҳхоҳонаи Тоҷикистонро баён медоранд, бо ташаббусҳои некхоҳона онро ба ҷаҳониён муаррифӣ мекунанд.

Бо итминон изҳор медорам, ки ҳамдиёрону ҳамватанони арҷманди мо қарзи фарзандӣ, рисолати инсонӣ ва вазифаи шаҳрвандии худро ҷиҳати поку бегазанд нигоҳ доштани асолати забони модарӣ, ки ифодагари ҳастии миллат аст, минбаъд низ бо камоли сидқу меҳр ба ҷо меоранд.

Бо ҳамин нияту орзу ҳамдиёрон ва ҳамватанони арҷмандро бори дигар бо Рӯзи забони давлатии Ҷумҳурии Тоҷикистон самимона муборакбод мегӯям.

Рӯзи забони давлатии Ҷумҳурии Тоҷикистон муборак бод!

Таҳти ин унвон бо дастгирии мақомоти иҷроияи маҳаллии ҳокимияти давлатии шаҳри Панҷакент ва Лоиҳаи “Идоракунии ҳамгирои захираҳои табиӣ барои рушди одилона ва устувор дар водии Зарафшон”,(INVEST) ки дар ҳамкорӣ бо шарикони рушд амалӣ карда мешавад, форуми минтақавӣ баргузор шуд.

Дар он кормандони масъули лоиҳаи зикршуда дар водии Зарафшон, бонкҳои тиҷоратӣ, зерлоиҳаҳое, ки дар доираи ин лоиҳа амалӣ мешаванд, иштирок намуда, масъалаҳои марбут ба рушди рақамикунонӣ ва саводнокии молиявии маҳсулоти молиявию бонкиро, ки дар Барномаи миёнамӯҳлати рушди иқтисоди рақамӣ дар Ҷумҳурии Тоҷикистон барои солҳои 2021-2025 пешбинӣ шудааст, матраҳ намуданд.

Дар суханронии муовини раиси шаҳр Хусрав Дӯстбойзода ва роҳбари Лоиҳаи мазкур Зумрат Файзиева дар ҳузури иштирокдорони форум аз ҷумла гуфта шуд, ки татбиқи нишондодҳои Барномаи ёдшудаи давлатӣ, аз ҷумла баланд бардоштани сатҳи саводнокии молиявӣ ва рақамикунонии иқтисод барои истифодаи босамари захираҳои молиявӣ, дастрасӣ ба маҳсулоти бонкӣ имкониятҳои бештаре барои ҳамаи табақаҳои аҳолӣ фароҳам овард.

Дар доираи форум кормандони бонкҳои тиҷоратӣ роҳҳои ҳамкорӣ ва хидматрасониҳои бонкиро шарҳ доданд ва намоиш – фурӯши маҳсулоти кишоварзӣ, ки бо дастгирии лоиҳаи зикршуда истеҳсол шудааст , баргузор шуда, барномаи ҷолиби ҳунарии санъаткорон пешкаши иштирокдорон гардонида шуд.

Дар ҷаласаи навбатии Шӯрои ҳамоҳангсози фаъолияти мақомоти ҳифзи ҳуқуқи шаҳри Панҷакент, ки дар раъси раиси Шӯро, прокурори шаҳр, мушовири адлияи дараҷаи як Искадар Раҳматзода баргузор шуд, натиҷаҳои санҷиши ҳолати пешгирии ҳодисаҳои нохуши нақлиётӣ дар соли гузашта ва 9 моҳи соли равон мавриди баррасӣ қарор гирифт.

Дар ҷаласаи Шӯро зимни шунидани гузоришҳои муовини якуми раиси шаҳр, ёвари прокурори шаҳр, муовини сардори Шӯъбаи Вазорати корҳои дохилӣ дар шаҳр, сардори гурӯҳи бақайдгирию имтиҳонотии раёсати корҳои дохилии вилояти Суғд дар шаҳри Панҷакент, сардори муассисаи нигоҳдории роҳҳои автомобилгард, таваҷҷӯҳи масъулини сохторҳои марбута ва иштирокчиёни ҷаласа ба ваъъи риояи қоидаҳои бехатарии ҳаракат дар роҳ, ки боиси ҳодисаҳои нохуши нақлиётӣ, ҳалокат ва ҷароҳатбардории одамон гаштаанд, беҳдошти ҳолати роҳҳои нақлиётӣ, гузоштани аломатҳо дар роҳ, сатҳи таълими касбӣ дар мактабҳои ронандагӣ, баланд бардоштани масъулияти кормандон дар вақти додани шаҳодатномаи ронандагӣ, танзими фаъолияти ширкатҳои мусофир ва боркашонӣ ва дигар масъалаҳои марбут ба пешгирии ҳодисаҳои нохуши нақлиётӣ ҷалб карда шуд.

Бо қарори Шӯро ташкилоту муассисаҳои марбута барои пешгирӣ ва коҳиш додани ҳодисаҳои нохуши нақлиётӣ, бартараф намудани сабабу омилҳои онҳо муваззаф карда шуданд.

Ҳамаи панҷ нафар ҳакамони даври ҷумҳуриявии озмуни “Донандаи беҳтарини асарҳои Пешвои миллат” дар бахши муассисаҳои миёнаи касбӣ, ки аз ҷумлаи олимони варзидаи кишвар буданд, ба ҷавобҳои донишҷӯи соли сеюми коллеҷи тиббии шаҳри Панҷакент Меҳрона Худойбердиева баҳои баландтарин гузоштанд.

Ӯ дар ин бахши озмун байни донишҷӯёни муассисаҳои ибтидоӣ ва миёнаи касбии мамлакат беҳтарин дониста, соҳиби ҷойи аввал гардид.

Меҳрона ба ин озмуни бонуфуз бо роҳнамоии устодаш- омӯзгори фанни биологияи коллеҷи тиббии шаҳр, Аълочии соҳаи таҳсилоти ибтидоӣ ва миёнаи касбии Тоҷикистон Зубайдулло Яҳёев омодагии пухта дида, ҳамаи асарҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро мутолиа кардааст.

Се сол қабл дар даври ҷумҳуриявии озмуни “ Тоҷикон дар оинаи таърих” низ сазовори ҷоиза гашта буд.

Ин ғолибиятро ба ӯ ва устодонаш муборакбод мегӯем.