Дар доираи талаботи Қарори Ҳукумати мамлакат оид ба сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2025-2026 бо дастгирии мақомоти иҷроияи маҳаллии ҳокимияти давлатии шаҳри Панҷакент, ҳамкорӣ бо шабакаҳои барқи шаҳр ва сармоягузории соҳибкор Мардон Насриддинов неругоҳи хурди барқи обии “Панҷруд” баъди танаффуси тӯлонӣ боз фаъол гардонида шуд.

Бо 500 квт соат нерӯи барқ, ки ин нерӯгоҳ истеҳсол мекунад, аз оғози моҳи равон хонаҳои сокинони деҳаи Панҷруд ва қисман деҳаҳои шафати он бо барқи доимӣ таъмин карда мешавад.

Нерӯгоҳи мазкур чордаҳ сол муқаддам бо ибтикори ин соҳибкор сохта шуда буд. Баъдан ба сабабҳои гуногун, аз ҷумла фарсуда шудани таҷҳизот, аз фаъолият бозмонд.

Фаъол гардонидани ин нерӯгоҳи хурди барқи обӣ барои беҳтар намудани таъминоти аҳолӣ бо барқ дар давраи тирамоҳу зимистон мусоидат менамояд.

Устоди варзиш, устоди Донишкадаи омӯзгории Тоҷикистон дар шаҳри Панҷакент, номзади илмҳои педагогӣ Шавкат Абдуллоев дар чемпионати ҷаҳон дар байни собиқадорон ва устодони варзиш аз рӯи гуштини тарзи озод соҳиби мақоми сеюм гардид.

Ин мусобиқа, ки ҳоло дар шаҳри Варшава, пойтахти Лаҳистон мегузарад, устодони варзишро аз саросари ҷаҳон гирд овардааст

Шавкат Абдуллоев аз ҷумлаи устодон ва мураббияҳои шинохтаи варзиши шаҳри Панҷакент буда, дар чандин мусобиқаҳои сатҳи минтақавӣ ва байналмилалӣ соҳиби ҷоиза гардида, дар тарбияи варзишгарони ҷавон низ саҳми арзанда мегузорад

Дар мақомоти иҷроияи маҳаллии ҳокимияти давлатии шаҳри Панҷакент тибқи нақша ҳар рӯзи шанбе раиси шаҳр Абдухолиқ Холиқзода муроҷиат ва арзу шикояти шаҳрвандонро шунида, барои ҳалли қонунии онҳо чораҳои амалӣ андешида мешавад.

Ин навбат муроҷиату дархости шаҳрвандон, ки ба қабули раиси шаҳр омада буданд, асосан ба масъалаҳои таъминот бо қитъаи замини наздиҳавлигӣ, манзил, ҳалли баҳси замин, кӯмак барои табобат, дастгирии кӯдаки маъюб, таъминот бо ҷойи кор оид буд.

Ҳамаи муроҷиатҳо шунида, роҳҳои ҳалли қонунии онҳо фаҳмонида, ба сохторҳои марбутаи мақомоти шаҳрдорӣ ва ташкилоту муассисаҳо барои ҳалли онҳо дастур дода шуд.

Ҳамаи муроҷиату дархостҳо дар мӯҳлати муқаррарнамудаи қонун баррасӣ карда, аз натиҷааш ба шаҳрвандон хабар дода мешавад.

-Қарзи фарзандӣ, рисолати инсонӣ ва вазифаи шаҳрвандии ҳар кадоми мост, ки забони шаҳдбори миллату давлатамонро сидқан ва мисли модари худ дӯст дорем, зеро он забони модарии мо мебошад, онро эҳтирому эҳтиёт кунем ва ҳамеша дар андешаи поку беолоиш нигоҳ доштани он бошем.

Бо ин иқтибос аз суханронии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҷамъомади аҳли маорифу фарҳанг, зиёиён, собиқадорон ва ҷавонони шаҳри Панҷакент бахшида ба Рӯзи забони давлатӣ дар толори Кохи Лоиқ оғоз шуд.

Ба ҳозирин паёми шодбошии мақомоти иҷроияи маҳаллии ҳоркимияти давлатии шаҳр ба муносибати Рӯзи забони давлатӣ ироа гардид.

Дар он аз ҷумла , таъкид шудааст, ки бо ин забони ноб дар дарозои таърих бузургтарин осори адабию илмӣ, шоҳкориҳои адабиёт эҷод шуда, он ба рағми ҳама ҷангҳову кашмакашҳо, забткориҳои аҷнабиён, дигар шудани дину оин асолати таърихиашро нигоҳ дошт, зиндаю побарҷо боқӣ монд.

Изҳор шуд, ки ҳамдиёрону ҳамватанони арҷманди мо қарзи фарзандӣ, рисолати инсонӣ ва вазифаи шаҳрвандии худро ҷиҳати поку бегазанд нигоҳ доштани асолати забони модарӣ, ки ифодагари ҳастии миллат аст, минбаъд низ бо камоли сидқу меҳр ба ҷо меоранд.

Ба ҳозирин барномаи ҷолиби ҳунарӣ, ки аз қироати шеърҳо дар бораи забони модарӣ, намунаҳо аз “Шашмақом”, сурудҳо бар ашъори шоирон дар бораи бузургдошт ва эҳтироми забон мураттаб гардида буд, пешкаш шуд.

Ба муносибати Рӯзи забони давлатӣ дар ҳама муассисаҳои таълимию фарҳангии шаҳр маҳфилу нишаст ва ҳамоишу конфронсҳо баргузор шуданд.

Ҳамдиёрони арҷманд!

Рӯзи забони давлатии Ҷумҳурии Тоҷикистонро, ки ҳамасола ба нишони арҷгузорӣ ба ин рукни муҳимтарини ҳастии миллат ва нишони давлатдории миллии тоҷикон санаи 5 октябр дар саросари мамлакат таҷлил карда мешавад, ба ҳамаи шумо сидқан муборакбод мегӯям.

Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид намудаанд, ки “Қарзи фарзандӣ, рисолати инсонӣ ва вазифаи шаҳрвандии ҳар кадоми мост, ки забони шаҳдбори миллату давлатамонро сидқан ва мисли модари худ дӯст дорем, зеро он забони модарии мо мебошад, онро эҳтирому эҳтиёт кунем ва ҳамеша дар андешаи поку беолоиш нигоҳ доштани он бошем”.

Забони модарии мо идомаи забонҳои давраи куҳани порсӣ аз замони нигориши “Авасто” то таназзули давлати Ҳахоманишиён, давраи миёна аз замони давлати Ашкониён то поёни давлатдории Сосониён ва давраи нав, аз замони ташаккули Сомониён то имрӯз аст. Бо такя ба ин натоиҷи илмӣ метавон гуфт, ки забони кунунии мо давраҳои куҳан ва миёнаро ба сар бурда, дар замони салтанати Сомониён баробар бо халқи тоҷик, бо гунҷонидани гӯишҳои забонҳои куҳани авастоӣ, паҳлавӣ, хоразмӣ, бохтарӣ, суғдӣ ва дигар забонҳои куҳани мардуми эронинажод дар таркиби худ, дубора ба номи форсии тоҷикии нав эҳё шуд.

Мо соҳиби забоне ҳастем, ки бар садри он поягузори адабиёти тоҷикӣ-форсӣ, устод Абуабдуллоҳи Рӯдакӣ нишастаст ва дар тӯли беш аз ҳазор сол ворисони ӯ дар ҳавзаи тамаддуни тоҷикию форсӣ бо ин забон адабиёти оламшумул офаридаанд.

Барҳақ, бо ин забони ноб дар дарозои таърих бузургтарин осори адабию илмӣ, шоҳкориҳои адабиёт эҷод шуда, он ба рағми ҳама ҷангҳову кашмакашҳо, забткориҳои аҷнабиён, дигар шудани дину оин асолати таърихиашро нигоҳ дошт, зиндаю побарҷо боқӣ монд.

Баъди ба истиқлол расидани Ҷумҳурии Тоҷикистон Ҳукумати мамлакат бо роҳнамоии Пешвои муаззами миллат, Президенти Ҷумҳурии Тоҷкистон, муҳтарам Эмомалӣ Раҳмон барои рушду нумӯи забони тоҷикӣ, тозаю беолоиш нигоҳ доштани он тадобири зиёде андешид, ки қабули Қонуни Ҷумҳурии Тоҷикистон "Дар бораи забони давлатии Ҷумҳурии Тоҷикистон" дар таҳрири нав, қарори Ҳукумати Ҷумҳурии Тоҷикистон "Дар бораи Барномаи рушди забони давлатӣ барои солҳои 2020-2030", таъсиси ниҳоди давлатӣ оид ба забон ва истилоҳот ва ҳамасола таҷлил намудани Рӯзи забони давлатии Ҷумҳурии Тоҷикистон аз ҷумлаи онҳо аст.

Хушбахтона, ҳоло забони ноби тоҷикӣ чун забони давлатӣ, муоширату коргузорӣ аз ғамхориву пуштбонии давлату Ҳукумат, ҷомеи шаҳрвандӣ ва кулли ҳамватанон чун рамзи устувориву пойдории давлат ва истиқлоли сиёсии он бархурдор аст.

Мояи ифтихори ҳамзабонон аст, ки бо ин забони нобу фасеҳ Пешвои муаззами миллати мо аз минбарҳои баланди созмонҳои бонуфузи ҷаҳонӣ мавқеъу ҳадафҳои сулҳхоҳонаи Тоҷикистонро баён медоранд, бо ташаббусҳои некхоҳона онро ба ҷаҳониён муаррифӣ мекунанд.

Бо итминон изҳор медорам, ки ҳамдиёрону ҳамватанони арҷманди мо қарзи фарзандӣ, рисолати инсонӣ ва вазифаи шаҳрвандии худро ҷиҳати поку бегазанд нигоҳ доштани асолати забони модарӣ, ки ифодагари ҳастии миллат аст, минбаъд низ бо камоли сидқу меҳр ба ҷо меоранд.

Бо ҳамин нияту орзу ҳамдиёрон ва ҳамватанони арҷмандро бори дигар бо Рӯзи забони давлатии Ҷумҳурии Тоҷикистон самимона муборакбод мегӯям.

Рӯзи забони давлатии Ҷумҳурии Тоҷикистон муборак бод!

Таҳти ин унвон бо дастгирии мақомоти иҷроияи маҳаллии ҳокимияти давлатии шаҳри Панҷакент ва Лоиҳаи “Идоракунии ҳамгирои захираҳои табиӣ барои рушди одилона ва устувор дар водии Зарафшон”,(INVEST) ки дар ҳамкорӣ бо шарикони рушд амалӣ карда мешавад, форуми минтақавӣ баргузор шуд.

Дар он кормандони масъули лоиҳаи зикршуда дар водии Зарафшон, бонкҳои тиҷоратӣ, зерлоиҳаҳое, ки дар доираи ин лоиҳа амалӣ мешаванд, иштирок намуда, масъалаҳои марбут ба рушди рақамикунонӣ ва саводнокии молиявии маҳсулоти молиявию бонкиро, ки дар Барномаи миёнамӯҳлати рушди иқтисоди рақамӣ дар Ҷумҳурии Тоҷикистон барои солҳои 2021-2025 пешбинӣ шудааст, матраҳ намуданд.

Дар суханронии муовини раиси шаҳр Хусрав Дӯстбойзода ва роҳбари Лоиҳаи мазкур Зумрат Файзиева дар ҳузури иштирокдорони форум аз ҷумла гуфта шуд, ки татбиқи нишондодҳои Барномаи ёдшудаи давлатӣ, аз ҷумла баланд бардоштани сатҳи саводнокии молиявӣ ва рақамикунонии иқтисод барои истифодаи босамари захираҳои молиявӣ, дастрасӣ ба маҳсулоти бонкӣ имкониятҳои бештаре барои ҳамаи табақаҳои аҳолӣ фароҳам овард.

Дар доираи форум кормандони бонкҳои тиҷоратӣ роҳҳои ҳамкорӣ ва хидматрасониҳои бонкиро шарҳ доданд ва намоиш – фурӯши маҳсулоти кишоварзӣ, ки бо дастгирии лоиҳаи зикршуда истеҳсол шудааст , баргузор шуда, барномаи ҷолиби ҳунарии санъаткорон пешкаши иштирокдорон гардонида шуд.

Дар ҷаласаи навбатии Шӯрои ҳамоҳангсози фаъолияти мақомоти ҳифзи ҳуқуқи шаҳри Панҷакент, ки дар раъси раиси Шӯро, прокурори шаҳр, мушовири адлияи дараҷаи як Искадар Раҳматзода баргузор шуд, натиҷаҳои санҷиши ҳолати пешгирии ҳодисаҳои нохуши нақлиётӣ дар соли гузашта ва 9 моҳи соли равон мавриди баррасӣ қарор гирифт.

Дар ҷаласаи Шӯро зимни шунидани гузоришҳои муовини якуми раиси шаҳр, ёвари прокурори шаҳр, муовини сардори Шӯъбаи Вазорати корҳои дохилӣ дар шаҳр, сардори гурӯҳи бақайдгирию имтиҳонотии раёсати корҳои дохилии вилояти Суғд дар шаҳри Панҷакент, сардори муассисаи нигоҳдории роҳҳои автомобилгард, таваҷҷӯҳи масъулини сохторҳои марбута ва иштирокчиёни ҷаласа ба ваъъи риояи қоидаҳои бехатарии ҳаракат дар роҳ, ки боиси ҳодисаҳои нохуши нақлиётӣ, ҳалокат ва ҷароҳатбардории одамон гаштаанд, беҳдошти ҳолати роҳҳои нақлиётӣ, гузоштани аломатҳо дар роҳ, сатҳи таълими касбӣ дар мактабҳои ронандагӣ, баланд бардоштани масъулияти кормандон дар вақти додани шаҳодатномаи ронандагӣ, танзими фаъолияти ширкатҳои мусофир ва боркашонӣ ва дигар масъалаҳои марбут ба пешгирии ҳодисаҳои нохуши нақлиётӣ ҷалб карда шуд.

Бо қарори Шӯро ташкилоту муассисаҳои марбута барои пешгирӣ ва коҳиш додани ҳодисаҳои нохуши нақлиётӣ, бартараф намудани сабабу омилҳои онҳо муваззаф карда шуданд.

Ҳамаи панҷ нафар ҳакамони даври ҷумҳуриявии озмуни “Донандаи беҳтарини асарҳои Пешвои миллат” дар бахши муассисаҳои миёнаи касбӣ, ки аз ҷумлаи олимони варзидаи кишвар буданд, ба ҷавобҳои донишҷӯи соли сеюми коллеҷи тиббии шаҳри Панҷакент Меҳрона Худойбердиева баҳои баландтарин гузоштанд.

Ӯ дар ин бахши озмун байни донишҷӯёни муассисаҳои ибтидоӣ ва миёнаи касбии мамлакат беҳтарин дониста, соҳиби ҷойи аввал гардид.

Меҳрона ба ин озмуни бонуфуз бо роҳнамоии устодаш- омӯзгори фанни биологияи коллеҷи тиббии шаҳр, Аълочии соҳаи таҳсилоти ибтидоӣ ва миёнаи касбии Тоҷикистон Зубайдулло Яҳёев омодагии пухта дида, ҳамаи асарҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро мутолиа кардааст.

Се сол қабл дар даври ҷумҳуриявии озмуни “ Тоҷикон дар оинаи таърих” низ сазовори ҷоиза гашта буд.

Ин ғолибиятро ба ӯ ва устодонаш муборакбод мегӯем.

“Маҳз омӯзгорон – машъалафрӯзони ҷомеа қодиранд, ки имрӯзу фардои диёрро бо нури маърифат мунаввар созанд ва дар рушду тараққиёти давлату миллат ҳиссаи сазовор гузоранд...Омӯзгор шаъну шарафи миллат аст ва имрӯзу фардои ҳар як кишвар ва ҷомеа аз сатҳи маърифат ва фаъолияти ӯ вобастагии калон дорад”

Ин баҳои баланди Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҷамъомад ба муносибати Рӯзи омӯзгорон, ки санаи 1 октябр дар Кохи фарҳанги шаҳри Панҷакент, ба номи Олим Бобоев бо иштироки омӯзгорону устодони муассисаҳои таълимии шаҳр доир гардид, борҳо ба забон оварда шуд.

Дар паёми шодбошии раиси шаҳр Абдухолиқ Холиқзода, ки муовини раиси шаҳр Парвина Нақибӣ ба ҳозирин ироа намуд, бо таъкиди нақшу мақоми омӯзгорон дар тарбияи насли ояндасози кишвар, боло бурдани сатҳи маърифати ҷомеа гуфта шуд, ки рушди соҳаи маориф дар сиёсати иҷтимоии давлат меҳварӣ дониста мешавад.

Дар ин замина ҳоло наздик ба 60 дарсади буҷети маҳаллӣ барои таъмини рушди соҳаи маориф равона шуда, дар маҷмӯъ тайи солҳои соҳибистиқлолӣ музди меҳнати кормандони соҳаи маориф 22 маротиба баланд бардошта, аз 1-уми сентябри соли ҷорӣ маоши кормандони соҳа боз ба андозаи 30 фоиз зиёд гардид.

Ҳоло дар шаҳр дар 138 муассисаи таълимӣ 4883 нафар омӯзгорон ба беш аз 72 ҳазор нафар хонанда таълиму тарбия медиҳанд.

Дар фарҷоми ҷамъомад ба як идда омӯзгорон нишони Аълочии маориф ва илми Тоҷикистон, ифтихорнома ва сипосномаҳо тақдим карда, барономаи ҷолиби консертӣ пешкаш гардид.

Дар ин рӯз собиқадорони соҳаи маориф, омӯзгорони барӯманд Илёс Облоқулов ва Ҳанифа Шарифова аёдат намуда, ба онҳо тӯҳфаҳои хотиравӣ тақдим карда шуд.

Имрӯз -1 октябр ,дар рӯзи нахустини даъвати тирамоҳии ҷавонон ба хидмат дар сафи Қувваҳои Мусаллаҳи Ҷумҳурии Тоҷикистон дар шаҳри Панҷакент гурӯҳи аввали даъватшавандагонро ба хидмати Модар – Ватан гусел намуданд.

Ба ин муносибат дар саҳни майдони муҷассамаи Шоҳ Исмоили Сомонӣ бо иштироки фаъолон, роҳбарони ташкилоту муассисаҳо, падару модарон ва наздикони наваскарон маросими гусел баргузор шуд.

Зимни суханронии муовини якумии раиси шаҳр Сабур Собирзода аз ҷумла, гуфта шуд, ки мақомоти иҷроияи маҳаллии ҳокимияти давлатии шаҳр, комиссияи шаҳрии даъват, мақомоти ҳифзи ҳуқуқ, комиссариати ҳарбии шаҳр, ҷамоатҳои деҳот ҷиҳати иҷрои Фармони Президенти Ҷумҳурии Тоҷикистон, аз 29 августи соли 2025, № 1070 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” корҳои зиёди тарғиботӣ ва ташкилию сафарбариро ба иҷро расониданд.

Қайд карда шуд, ки дар Ҷамоатҳои деҳоти Хурмӣ, Саразм, Халифа Ҳасан, Шинг дар рӯзи нахустини гусели даъватшавандагон нақшаи даъват ба хидмати ҳарбиро пеш аз мӯҳлат ба иҷро расониданд,

Дар маросими гусел наваскарон, волидони онҳо сухан карда, садоқаташонро ба Ватан, ба Пешвои миллат изҳор намуданд.

Ба даъватшавандагоне, ки мактаби ронандагии Ташкилоти мададгори мудофиаро хатм намудаанд, ҳуҷҷати ронандагӣ, ба онҳое, ки дар иҷрои нақшаи даъват саҳми бориз гузоштаанд, сипоснома ва тӯҳфаҳои хотиравии мақомоти иҷроияи маҳаллии ҳокимияти давлатии шаҳр тақдим карда шуд.

Зимнан, дар давраи омодагӣ ба даъвати тирамоҳӣ бо дастгирии мақомоти иҷроияи маҳаллии ҳокимияти давлатии шаҳр ва Вазорати мудофиаи мамлакат 210 нафар ҷавонони синни даъватӣ ба мактаби ронандагии Ташкилоти мададгори мудофиа ҷалб карда шуданд.

Барномаи рангини ҳунарӣ, ки тараннумгари садоқат ба Ватан, ҷасорату матонат буд ва маросими анъанавии насибагирӣ анҷомбахши маросими нахустини гусели наваскарон ба хидмати ҳарбӣ буд.

Дар рӯзи нахустини даъвати тирамоҳӣ- Рӯзи даъватшаванда, бо фотиҳаи волидон ва зери навои мусиқӣ гурӯҳи аввалин иборат аз 400 нафар ҷавонони шаҳри Панҷакент ба хидмати ҳарбӣ гусел карда шуданд.

Устодони арҷманд!

Ҳамасола ҳафтаи аввали моҳи октябр дар саросари мамлакат Рӯзи омӯзгорон чун нишони арҷгузорӣ ба заҳмати устодон, муаллимон ва нақши онҳо дар тарбияи ҷомеа таҷлил карда мешавад.

Ба ин муносибат ҳамаи омӯзгорони шаҳрро бо иди касбиашон самимона муборакбод намуда, барояшон умри дароз, сарбаландӣ, хонаи обод ва дар иҷрои вазифа ва рисолати пуршарафи соҳибмаърифату соҳибкасб намудани насли ҷавону ояндасози кишвар муваффақият ва барору комёбӣ таманно менамоям.

Мардуми соҳибмаърифат ва гавҳаршиноси мо эҳтироми муаллимро ҳамеша пос медоранд ва ба заҳмати беандозаи ӯ дар ҷодаи таълиму тарбияи насли наврасу ҷавони Ватани азизамон сазовор арҷ мегузоранд. Тавре Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон таъкид кардаанд, “Омӯзгорон гурӯҳи пурнуфузе мебошанд, ки рисолати мафкурасозии миллат ва ҷомеа, босаводу соҳибмаърифат гардонидани наслҳои наврас ва барои кишвар ба камол расонидани кадрҳои ояндасоз ба дӯши онҳо вогузор шудааст”.

Барҳақ, омӯзгорон ҳастанд, ки дасти моро рост намуданд ва ба шоҳроҳи ҳаёт раҳнамун сохтандд ва имрӯз низ рисолати муқаддаси худро бо камоли садоқат ба ин Ватани биҳиштосо, ба имрӯзу ояндаи он, ба Пешвои миллатро бо садоқат ва маҳорати баланди касбӣ иҷро менамоянд.

Ҳаминро гуфтан кофист, ки дар даврони истиқлол дар шаҳри Панҷакент бо сармоягузорӣ ва манбаъҳои гуногун 81 иншооти соҳаи маориф, аз ҷумла муассисаҳои таҳсилоти умумӣ ва томактабӣ ба истифода дода, ҳоло корҳои сохтмонии боз 9 бинои муассисаи таълимӣ барои 3 ҳазор хонанда, 10 муассисаи томактабӣ ва 70 синфхонаи иловагӣ дар назди 15 муассисаи таълимӣ барои 2 ҳазору 350 хонанда идома доранд.

Ҳоло наздик ба 60 дарсади буҷети маҳаллӣ барои таъмини рушди соҳаи маориф равона шуда, дар маҷмӯъ тайи солҳои соҳибистиқлолӣ музди меҳнати кормандони соҳаи маориф 22 маротиба баланд бардошта шуд. Аз 1-уми сентябри соли ҷорӣ маоши кормандони соҳа боз ба андозаи 30 фоиз зиёд гардид. Яъне маоши онҳо то имрӯз қариб ҳашт баробар зиёд гардидааст.

Барҳақ, сармоягузорӣ ба неруи инсонӣ ва пеш аз ҳама, ба таълиму тарбияи наврасону ҷавонон беҳтарин ва сармарабахштарин сармоягузорӣ мебошад ва хушбахтона, ин ба як рукни муҳими сиёсати маорифпарваронаи Пешвои муаззами миллат табдил ёфтааст.

Ҳоло бори асосии таълиму тарбия дар мактаб ба дӯши бонувони омӯзгор аст ва онҳо 62 дарсади омӯзгоронро ташкил медиҳанд. Дараҷаи касбии омӯзгорон сол то сол беҳтар шуда, ҳоло 77 фоизи онҳо дорои таҳсилоти олӣ мебошанд.

Бо итминон изҳори умед мекунам, ки омӯзгорон, устодони арҷманд,мураббияҳо ба қадри ин ғамхориҳову ин баҳои баланд мерасанд ва дар тарбияи насли наврас дар рӯҳияи худшиносию ватандорӣ боз ҳам нақши арзанда мегузоранд.

Бо умеди он ки омӯзгорони арҷманди мо ин рисолати аслии худро ҳамеша дар ёд дошта бошанд, бори дигар ҳамаи онҳоро бо иди касбиашон муборакбод гуфта, барояшон саломатӣ ва дар ҷодаи иҷрои рисолати бузурги касбӣ ва инсониашон- тарбияи насли ояндасози Ватан, барору комёбӣ орзу мекунам.

Рӯзи омӯзгорон муборак бод, устодони арҷманд!

Бо дастгирии мақомоти иҷроияи маҳаллии ҳокимияти давлатии шаҳри Панҷакент ва сармоягузории Корхонаи муштараки “Зарафшон” дар Ҷамоати деҳоти Косатарош канал ва пойгоҳҳои обкашӣ барқарор карда мешаванд.

Тавре зимни боздиди раиси шаҳр Абдухолиқ Холиқзода аз оғози барқарор намудани ин ишооти обёрӣ гуфта шуд, бо таҷдиди собиқ канали Чертук дар масофаи 1,5 километр, бунёди ҳавзҳои обнигоҳдорӣ, таъмири асосии пойгоҳи обкашии “Дашти калон -1” ва насби пойгоҳи обкаши нав беш аз 200 гектар замин обёрӣ карда мешавад.

Барои ин корҳо КМ “Зарафшон” се миллион сомонӣ ҷудо намуда, онро паймонкор ҶДММ “ Файзи кӯҳистон” ба иҷро мерасонад.

Баҳори оянда деҳқонон дар ин заминҳо ба кишту кор ва бунёди боғ шурӯъ хоҳанд кард.

Дар доираи ҳамкориҳои Ҳукумати Ҷумҳурии Тоҷикистон бо Амороти Муттаҳидаи Араб бо дастгирии мақомоти иҷроияи маҳаллии ҳокимияти давлатии шаҳр ва сармоягузории ташкилоти байналмилалии хайриявии Шарҷа аз ҷониби ташкилоти ҷамъиятии хайриявии “Тоҷикистон” дар қарибии деҳаи Гулистони Ҷамоати деҳоти Ворӯ деҳаи нав бунёд карда мешавад.

Тибқи лоиҳа дар навбати аввал дар деҳаи нав, ки дар заминҳои бо қарори Ҳукумати мамлакат ва мақомоти иҷроияи маҳаллии ҳокимияти давлатии шаҳр барои оилаҳои эҳтиёҷманд ҷудо шуда буд, ҷойгир аст, барои 25 оилаи эҳтиёҷманди Ҷамоати деҳоти Ворӯ хонаҳои истиқоматии дорои се ҳуҷраи истиқоматӣ ва дигар ҳуҷраҳои ёрирасон сохта, хати барқ ва оби нӯшокӣ гузаронида,бунёди бинои муассисаи таълимӣ ва нуқтаи тиббӣ низ дар назар дошта шудааст.

Зимни боздиди раиси шаҳр Абдухолиқ Холиқзода аз маҳали сохтмон ба масъулон ҷиҳати дар мӯҳлати пешбӣинишуда ба анҷом расонидани сохтмони биноҳои истиқоматӣ, хати об, бинои муассисаҳои таълимӣ ва тиббӣ дастур дода шуд.

Додавра мазеъест болотар аз деҳаи Нигноти Ҷамоати деҳоти Рӯдакии шаҳри Панҷакент. Собиқа ин ҷо замини ноободи санглохи лалмӣ ва ғайрикишоварзӣ буд ва чизе ба ҷуз алафҳои хурӯй намерӯид.

Ҳоло ин ҷо боғест сабзгуну дилрабо ва меваҳояш хуштаъму сероб ва дидарабо. Ҳамаи ин самараи заҳмати сангини кишоварзи соҳиби таҳсилоти олии агрономӣ, боғбони варзида, сокини деҳаи Нигнот Маҳкамбой Ҷӯраев аст.

Ӯ баъди хатми донишкадаи кишоварзӣ чандин сол дар собиқ хоҷагии ҷамоавии ба номи Рӯдакӣ агрономи соҳаи боғдорӣ буд ва бо талошҳои ӯ беш аз 200 гектар боғ бунёд шудааст. Баъди ислоҳоти сохтори соҳаи кишоварзӣ ӯ аз тариқи шартнома обод намудану бунёди боғро дар ин мавзеъи нообод ба ӯҳда гирифт, аз 1,5 километр ба он аз тариқи лӯлаҳо об овард, 1,5 гектар замини санглохро обод намуду боғ бунёд кард.

Тӯли 30 сол Додавра бо заҳмати сангини Маҳкамбой Ҷӯраев ва аҳли оилааш ба боғистони зебою серҳосил бадал шуд.

Зимни боздиди раиси шаҳр Абдухолиқ Холиқзода иттилоъ дода шуд, ки дар ин боғ ҳоло беш аз ҳазор бех навъҳои гуногуни себ, зардолу, шафтолу, биҳӣ, олуболу, ҳазорҳо без санҷиду ҳулул парвариш карда мешавад ва ҳоло ҷамъоварии ҳосил идома дорад.

Аз ҳосили фаровони боғи Маҳкамбой Ҷӯраев ҳар сол садҳо нафар даҳон ширин мекунанд ва рӯзгораш низ аз он обод аст.

Дар ин сафар раиси шаҳр ҳамчунин аз мавзеъи Шӯрхоки деҳа, ки бо сармоягузории шарикони рушд он ҷо бо кашидани хати об аз масофаи 3,5 километр беш аз 80 гектар замини лалмӣ обёрӣ ва дар оянда боғ бунёд карда мешавад,боздид намуд.

Ҷаласаи навбатии Шӯрои мутобиқсозию методӣ оид ба таълим ва тарбияи ҳуқуқии шаҳрвандони назди раиси шаҳри Панҷакент баргузор шуд.

Дар ҷаласа, ки таҳти роҳбарии раиси шаҳр, раиси Шӯро Абдухолиқ Холиқзода бо иштироки муовинони раиси шаҳр, роҳбарону кормандони мақомоти ҳифзи ҳуқуқ, аъзоёни комиссияи шаҳрии даъват ба хидмати ҳарбӣ, масъулони маъракаи даъвати ҷавонон ба хидмати ҳарбӣ, раисони ҷамоатҳои деҳот ва маҳаллаҳои шаҳр доир шуд, рафти иҷрои Фармони Президенти Ҷумҳурии Тоҷикистон аз 29 августи соли 2025, №1070 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” мавриди баррасӣ қарор гирифт.

Зимни шунидани гузориши масъулон, пурсиши раисони маҳаллаҳо ва ҷамоатҳои деҳот рафти омодагӣ ба маъракаи тирамоҳии даъвати ҷавонон ба хидмати ҳарбӣ баррасӣ гардида, таваҷҷӯҳи онҳо ба тавсеаи корҳои тарғиботию ташкилӣ бо ҷавонони синни даъватӣ, волидони онҳо, шаффофияти фаъолияти комиссияи шаҳрии даъват, пешгирии амалҳои коррупсионӣ ва дигар масъалаҳои марбут ба даъвати ҷавонон ба хидмати ҳарбӣ, иҷрои пеш аз мӯҳлати нақшаи даъват ба хидмати ҳарбӣ ҷалб карда шуд.

Дар ҷаласаи Шӯро ҳамчунин ба масъулин ҷиҳати тавсеаи таълим ва тарбияи ҳуқуқии шаҳрвандон, ки омили муҳими тарбияи ватандӯстӣ ва омода намудани ҷавонон ба хидмати ҳарбӣ аст, дастур дода шуд.