Panjakent.tj - Хабарҳо

2026-10-31 13:57:27

МУЛОҚОТ БО РОҲБАРИ КОРХОНАИ МУШТАРАКИ ҒАНИГАРДОНИИ ҚАЛЪАГИЮ МИС

 Дар мулоқоти раиси шаҳри Панҷакент Абдухолиқ Холиқзода бо директори кулли  нави корхонаи муштараки “Броадтек- Тоҷикистон майнинг инвестмент лимитед”   Ли Жен Лон масъалаҳои вобаста ба омодагии корхона ба оғози фаъолият мавриди баррасӣ қарор гирифт.

   Зимни  сӯҳбат  масъалаҳои омодасозию санҷиши таҷҳизоти насбшуда, тибқи қонунгузории ҷорӣ омода намудани асноди зарурии ҳуқуқӣ, таъминоти минбаъдаи корхона бо барқу об, корҳо дар мавзеъи истихроҷи маъдан, ташкили ҷойҳои нави корӣ ва дигар самтҳои роҳандозии фаъолияти он матраҳ карда шуд.

  Гуфта шуд, ки баъди ба фаъолият пардохтани корхона   300 нафар дар он ба кор пазируфта мешаванд.

2026-10-29 16:18:23

БОЗДИД АЗ ДИДБОНГОҲИ ОБИИ ДУПУЛА

Пойгоҳи обченкунӣ ва ё дидбонгоҳи обии Дупула  яке аз куҳантарин иншооти гидрологии кишвар буда, дар мавзеъи Дупулаи шаҳри Панҷакент ҷойгир шуда, барои назорат,  ченкунӣ ва банақшагирии захираҳои обии ҳавзаи даврёи Зарафшон нақши муҳим дорад.

  Тавре зимни боздиди раиси шаҳр  Абдухолиқ Холиқзода аз ин иншооти гидрологӣ гуфта шуд, он яке аз ниҳодҳои Агентии обуҳавошиносии Кумитаи ҳифзи муҳити зисти Ҷумҳурии Тоҷикистон буда, аз  нимаи асри гузашта то ба имрӯз ҳаҷми оби дарёи Зарафшонро чен мекунад.

  Тибқи маъумотҳои дидбонгоҳ ҳаҷми миёнаи солонаи оби дарёи Зарафшон 162 метри мукааб дар сония буда, дар фасли тобистон то ба 250 - 690  метри кубӣ -сония мерасад.

  Баландтарин ҳаҷми оби дарёи Зарафшон 31 майи соли 1967  дар ҳаҷми 996 ва камтарин соли 1957-112 метри мукааб- сония ба ҳисоб гирифта шудааст

2026-10-29 13:41:33

ДАР ДЕҲОТИ ЁРӢ БАРОИ ПАРВАРИШИ 60 ҲАЗОР САР МУРҒ ФЕРМА СОХТА МЕШАВАД

Дар деҳаи Миндонаи деҳоти Ёрии шаҳри Панҷакент  сохтмони фермаи паррандапарварӣ дар арафаи анҷомёбӣ қарор дорад.

  Тавре зимни боздиди раиси шаҳр Абдухолиқ Холиқзода бо рафти омодагӣ ба оғози роҳандозии парвариши мурғ дар фермаи нав иттилоъ дода шуд, он бо маблағгузории соҳибкори маҳаллӣ Мифтоҳиддин Нарзиев сохта шудааст ва дар навбати аввал барои парвариши 60 ҳазор сар мурғи гӯштӣ ва тухмӣ пешбинӣ гардидааст.

  Ҳоло  сохтмон ва таҷҳизонидани  бино анҷом ёфта, барои кормандон шароити мусоиди кору истироҳат омода карда,  насби панелҳои офтобӣ барои истеҳсоли барқи худӣ идома дорад.

2026-10-29 13:39:45

КӮЧАҲОИ ДЕҲАИ МИНДОНАИ ДЕҲОТИ ЁРӢ ДАР МАСОФАИ БЕШ АЗ ДУ ҲАЗОР МЕТР МУМФАРШ КАРДА ШУДАНД...

обистони имсол роҳи деҳаи Миндонаи деҳоти Ёрии шаҳри Панҷакент бо саҳмгузории сокинон ва  дастгирии мақомоти иҷроияи маҳаллии ҳокимияти давлатии шаҳр дар доираи нақшаи ободкориҳо ба ифтихори 35-солагии истиқлоли давлатии Ҷумҳурии Тоҷикистон  дар масофаи 2,1 километр  мумфарш карда  шуда буд.

Дар идомаи ин кор сокинони деҳа ба мумфарш намудани роҳи кӯчаҳои деҳа  пардохтанд ва бо ҷалби техникаи роҳсозӣ онро дар муддати кӯтоҳ анҷом доданд.

Тавре зимни боздиди раиси шаҳр Абдухолиқ Холиқзода гуфта шуд, кӯчаҳои деҳа дар масофаи ду километр бо саҳмгузории соҳибкорон ва сокинон мумфарш карда шуд.

Маҷмӯан, имсол бо саҳмгузории сокинони деҳа, дастгирии мақомоти иҷроияи маҳаллии ҳокимияти давлатии шаҳр, Вазорати нақлиёти Ҷумҳурӣ 4,5 километр роҳ аз пули нави болои дарёи Зарафшон то деҳа ва инак, кӯчаҳои деҳа низ мумфарш карда шуданд.

2026-10-28 16:47:52

ОҒОЗИ МУМФАРШКУНИИ РОҲИ ДЕҲАИ ЗАРРИНРУДИ ДЕҲОТИ АМОНДАРА

Дар шаҳри Панҷакент бо ибтикори мақомоти иҷроияи маҳаллии ҳокимияти давлатии шаҳр ва ҷалби соҳибкорону сокинон роҳҳои маҳаллӣ таъмир ва мумфарш карда мешаванд.

Дирӯз бо иштироки раиси шаҳр Абдухолиқ Холиқзода ба мумфарш намудани  роҳи деҳаи Зарринруди деҳоти Амондара аз мавзеъи Дупула то деҳа шурӯъ карда шуд.

Тавре зимни оғози ин кор гуфта шуд, роҳ ба масофаи ду километр ва харҷи беш аз ду миллион сомонӣ саҳмгузории сокинони деҳа бо ҷалби техникаи роҳсозӣ мумфарш карда мешавад.

2026-10-27 16:07:38

«АСОИ САФЕД»- РАМЗИ ҒАМХОРӢ БА НОБИНОЁН

Ҳамасола   моҳи октябр  бо Қатъномаи Созмони Милали Муттаҳид Рӯзи  ҷаҳонии «Асои сафед» таҷлил мешавад. «Асои сафед» рамзи шахси нобино буда, 15‐уми октябри соли 1964 бо ташаббуси Федератсияи байналмилалии нобиноён бо мақсади ҷалби таваҷҷуҳи одамон ба онҳое, ки биноии  худро аз даст додаанд ва бо вазъи душвори зиндагӣ рӯ ба рӯ шудаанд,  чунин номгузорӣ  шудааст.

   Ба ин муносибат имрӯз бо ибтикори мақомоти иҷроияи маҳаллии ҳокимияти давлатии шаҳри Панҷакент 120 нафар, ки  бо амри тақдир нобино ҳастанд ва ё нуқсони биноӣ доранд, дар тарабхонаи “Боғи сабз”-и  Боғи фарҳангию фароғатии  Камоли Хуҷандии шаҳр гирди дастархони идона ҷамъ оварда шуданд.

  Раиси шаҳр Абдухолиқ Холиқзода  ба ҳозирин аз ғамхориҳое, ки дар мамлакат  дар асоси дастуру супоришҳои  Пешвои миллат,Президенти кишвар муҳтарам Эмомалӣ Раҳмон  ин табақаи аҳолӣ  фаро гирифта шудаанд, ёдрас  намуд.  Гуфта шуд, ҳамаи 254 нафар сокинони шаҳр, ки  маҷрӯҳ  аз рӯи биноӣ мебошанд, аз имтиёзҳое, ки давлат барояшон муқаррар намудааст, бархурдоранд. 

  Ба муносибати Рӯзи ҷаҳонии “Асои сафед”  бо қарори раиси шаҳр  ба онҳо кӯмакпулии яквақта ҷудо карда, тӯҳфаҳои хотиравӣ тақдим карда шуд. 

        Дар фарҷоми чорабинӣ аз ҷониби бахши фарҳанги шаҳр баҳри болидахотирии иштирокчиён барномаи  ҳунарӣ пешкаш гардид. 

2026-10-23 16:18:17

БОЗДИД АЗ РАФТИ КИШТИ ТИРАМОҲӢ ВА БОҒИ НАВБУНЁД

Кишоварзони хоҷагиҳои деҳқонии шаҳри Панҷакент  то ин муддат дар майдони 1690 гектар кишти тирамоҳӣ гузаронидаанд, ки ин баробари 74 дарсади нақша мебошад ва ҳоло кишт идома дорад.

  Раиси шаҳр Абдухолиқ Холиқзода зимни сафари корӣ ба деҳоти Амондара бо рафти кишти тирамоҳии ғалла дар хоҷагии деҳқонии ба номи Абдураҳмони Ҷомӣ шинос шуд. Гуфта шуд, ки  саҳмдорони хоҷагӣ ин тирамоҳ  дар майдони 165 гектар  кишти гандуму ҷавро ба нақша гирифта, ҳоло дар майдони 114 гектар гишт гузаронидаанд.

  Ба кишоварзон барои дар мӯҳлати кӯтоҳ анҷом додани кишти тирамоҳӣ дастур дода шуд,

  Дар идомаи  сафари корӣ бо вазъи парвариши ниҳолҳо дар боғи навбунёди  Давлатёр Дониёров, ки дар ҳамкорӣ бо шарикони рушд аз тариқи чоҳи амудӣ об бароварда,  дар майдони 2,5 гектар бунёд карда шудааст, шинос шуда, барои  тибқи қоидаҳои агротехникӣ ба роҳ мондани парвариши он маслиҳат дода шуд

  Дар ин боғи навбунёд 3000 бех ниҳолҳои  дарахтони гуногун парвариш карда мешавад.

2026-10-23 16:16:27

САФАРИ КОРӢ БА ДЕҲОТИ АМОНДАРА, БОЗДИД АЗ РАФТИ СОХТМОНИ ИНШООТИ ИҶТИМОӢ ВА АЁДАТИ СОБИҚАДОРИ МЕҲНАТ

 Бунёди биноҳои нав барои муассисаҳои таълимӣ ва тандурустӣ, беҳдошт шароити таълим ва ҳифзи саломатии аҳолӣ аз масъалаҳои муҳимест, ки дар заминаи сиёсати иҷтимоии Ҳукумати кишвар дар маркази таваҷҷӯҳи мақомоти иҷроияи маҳаллии ҳокимияти давлатии шаҳри Панҷакент  қарор дорад.

       Дар ин росто раиси шаҳр Абдухолиқ Холиқзода зимни сафари корӣ ба деҳоти Амондара аз рафти бунёду таъмири муассисаҳои таълимӣ ва тиббӣ  дидан намуд.

       Дар деҳаи Амондара ҳоло бо сармоягузории шарикони рушд сохтмони бинои иловагии муассисаи таҳсилоти миёнаи умумии № 32  барои  ба таълим фарогирии 800 хонанда дар ду баст  ва ҳуҷраҳои ёриросон, насби панелҳои офтобӣ, дар деҳаи Майкада бо маблағгузории буҷети вилояти Суғд сохтмони бинои нави муассисаи таҳсилоти миёнаи умумии № 19 барои 900 нафар дар ду баст бо тарҳи замонавӣ ва шароити хуби таълим идома дорад.

       Зимни боздид ба паймонкорон барои дар мӯҳлати пешбинишуда ва сифати хуб ба анҷом расонидан биноҳои таълимгоҳҳо дастур дода шуд.

        Дар ҷараёни сафари корӣ ҳамчунин аз фаъолияти  Маркази саломатии деҳаи Амондара, ки баъди таъмиру таҷдид дорои шароити хуби  қабулу табобати сокинон  мебошад, изҳори қаноатмандӣ карда шуд.

         Дар ин рӯз  бо сокини деҳаи Амондара, собиқадори меҳнат  Абдутоҳир Мӯминов мулоқот намуда, ба ӯ барои заҳмати бисёрсола изҳори сипос карда шуд 

2026-10-23 16:14:35

ОҒОЗИ КОРҲОИ ЗАРШӮӢ ДАР СОҲИЛИ ДАРЁИ ЗАРАФШОН

Номи дарёи Зарафшон  баргирифта аз зар -тилло доштани он  аст ва  қаблан дар соҳилҳои он заршӯӣ роиҷ буд.

     Бо қабули Қонун  “Дар бораи металҳо ва сангҳои қимматбаҳо” ва қарори Ҳукумати кишвар  ҳоло ширкатҳо ва шаҳрвандон метавонанд ба ин пешаи қадима ба таври қонунӣ машғул шаванд.

   Дар ҳамин замина  Парки технологӣ ва коллеҷи  технологӣ- иноватсионии  Донишкадаи омӯзгории Тоҷикистон дар шаҳри Панҷакент дар  шафати деҳаи Майкадаи деҳоти Амондараи шаҳри Панҷакент, дар соҳили дарёи Зарафшон ба заршӯӣ оғоз намуд

  Тавре зимни  оғози корҳои таҷрибавии заршӯӣ ба раиси шаҳр Абдухолиқ Холиқзода иттилоъ дода шуд, инҷо  дар ҳамкорӣ бо шарикони рушд технологияи  ҷудо кардани  тилло аз қуми соҳили дарё насб карда шудааст.

  Дар заминаи ин коргоҳ  баробари заршӯӣ, ҳамчунин ба  садҳо нафар сокинони маҳаллӣ ва донишҷӯёни донишкада ва коллеҷи технологӣ- иноватсионӣ усулҳои маъмулии ин кор омӯзонида, дар оянда онҳо барои худ машғулияти  фоидаовар пайдо менамоянд.

2026-10-22 09:56:15

ПАНҶАКЕНТ: НАҚШАИ ДАЪВАТИ ҶАВОНОН БА ХИДМАТИ ҲАРБӢ ПЕШ АЗ МӮҲЛАТ ИҶРО КАРДА ШУД

Бегоҳи дирӯз гурӯҳи навбатии ҷавонони шаҳри Панҷакент ба хидмати ҳарбӣ гусел карда шуданд ва бо ин Фармони Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон,муҳтарам Эмомалӣ Раҳмон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи  хизмати ҳарбиро адо намудаанд ва даъвати навбатии шаҳрвандони солҳои таваллуди 1999-2008 Ҷумҳурии Тоҷикистон ба хизмати ҳарбӣ” пеш аз мӯҳлат ба иҷро расонида шуд.

         Дар иҷрои пеш аз мӯҳлати нақшаи даъвати тирамоҳӣ роҳандозии ҳамкории густурдаи мақомоти иҷроияи маҳаллии ҳокимияти давлатии шаҳр, комиссияи шаҳрии даъват,  комиссариати ҳарбии шаҳр,мақомоти сохторҳои ҳифзи ҳуқуқ, ҷамоатҳои деҳот, маҳаллаҳои шаҳр бо ҷавонону волидайни онҳо ва бо амри дил хидмати Ватанро ихтиёр намудани даҳҳо нафар ҷавонони баору ватандӯст мусоидат намуд.

  Дар даъвати тирамоҳии хидмати ҳарбӣ 426 нафар ҷавонони ғаюр ва ватандӯсти шаҳри Панҷакент ба хидмати Модар-Ватан сафарбар карда шуданд

2026-10-20 15:00:33

БУНЁДИ МАЙДОНИ ФИРДАВСӢ ВУСЪАТ МЕЁБАД

 Баъди  чанд муддат меҳмонон ва сокинони Панҷакент, ки аз ҷониби шарқ ба шаҳр ворид мешаванд, нахуст ба майдону гулгашти зебою хуштарҳ ва муҷассамаи муҳташами муаллифи  ҳамосаи бузурги  мардуми ориёнажод-“Шоҳнома”-и безавол Абулқосим Фирдавсӣ менигаранд.

  Ҳоло ин ҷо бо маблағгузории мақомоти иҷроияи маҳаллии ҳокимияти давлатии шапҳр  бунёди майдону гулгашти Абулқосим Фирдавсӣ идома дорад.

  Мақомоти шаҳрдорӣ  бунёди онро зери назорати пайваста қарор додааст ва дар ин росто раиси шаҳр  Абдухолиқ Холиқзода аз рафти сохтмони иншоот дидан намуда, ба пудратчӣ- ширкати  бинокории “СУ- 3”, барои тибқи лоиҳа ва дар мӯҳлати пешбинишуда бо сифати хуб анҷом додани корҳои сохтмонӣ дастур дод.

2026-10-19 16:21:08

БАРРАСИИ МАСЪАЛАҲОИ МУҲИМИ РӮЗ

Дар оғози маҷлиси назоратии назди раиси шаҳри Панҷакент Абдухолиқ Холиқзода, ки имрӯз баргузор шуд,  муҳтавои суханронии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо соҳибкорони мамлакат  ва дастуру супоришҳо ҷиҳати рушди соҳибкорӣ, бартараф намудани монеаҳо дар ин самт шарҳу тавзеҳ дода шуд. 

  Ба ҳозирин ҳамчунин  натиҷаҳои рушди иқтисодию иҷтимоии  вилояти Суғд, ки дар маҷлиси фаъолони вилоят баррасӣ гардида буд, тавзеҳ ва вазифаҳо барои давраи оянда тавзеҳ гардид.

  Дар идомаи мулоқот зимни  пурсиши муовинони раиси шаҳр, комиссари ҳарбии шаҳр вазифаҳо ҷиҳати дар муҳлати пешбинишуда ба анҷом раснидани кишти баҳорӣ, дар фурсати кӯтоҳ ба иҷро расонидани нақшаи даъвати ҷавонон ба хидмати ҳарбӣ,  тезонидани таҳияи ҳуҷҷатҳо барои оғози сохтмони иншооти иҷтимоӣ муайян карда шуд.

  Дар ҷаласа ҳисоботи роҳбарони мудирони бахшҳои танзими анъана ва маросим,  рушди сайёҳии мақомоти иҷроияи маҳаллии ҳокимияти давлатии шаҳр, сардухтури сохтори кӯмаки аввалияи тиббӣ – санитарӣ, бахши хадамоти муҳоҷират, Агентии шуғли аҳолӣ оид ба фаъолият дар нӯҳ моҳи соли равон шунида, ба онҳо барои  вусъати корҳо, ислоҳи мушкилоти мавҷуда, саҳеҳияти ҳисоботҳои оморӣ оид ба ин соҳаҳо дастур дода шуд. 

2026-10-18 13:30:50

ОМАД ХУҶАСТА МЕҲРГОН

Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар Паёми табрикии имсола  ба  муносибати ҷашни Меҳргон онро  яке аз муҳимтарин ҷашнҳои табиӣ ва фарҳангии мо – тоҷикон, ки реша дар таърихи чандинҳазорсола дорад ва ҳамчун ҷашни баракату фаровонӣ ва меҳру меҳрубонӣ дар қалбҳои мардуми ориёитабор ҷой гирифта, ойини вобаста ба мавсими ҷамъоварии ҳосил ва ҷамъбасти самараи заҳмати марди деҳқон мебошад, унвон кардаанд.

  Ҷашни Меҳргон, имрӯз дар саҳну майдони назди Кохи фарҳанги шаҳри Панҷакент бо баргузории намоиши маҳсулот ва техникаи  кишоварзӣ, намунаи ҳунарҳои мардумӣ ва таомҳои миллӣ, бо иштироки муовинони раиси шаҳр, деҳқонон, кормандони ташкилоту муассисаҳо, ҷамоатҳои деҳот, маҳаллаҳои шаҳр  таҷлил карда шуд.

2026-10-18 12:55:00

ҚАДРШИНОСИИ ҒОЛИБОНИ ДАВРИ ШАҲРИИ ОЗМУНҲОИ ҶУМҲУРИЯВӢ

Дирӯз дар Кохи фарҳанги ба номи Олим Бобоеви шаҳри Панҷакент бо иштироки ғолибони даври шаҳрии озмунҳои ҷумҳуриявии “ Фурӯғи субҳи доноӣ китоб аст”, “Илм – фурӯғи маърифат” ва “Шоҳномахнӣ”  бо иштироки ғолибони ин давр, омӯзгорон ва аҳли маорифи шаҳр маросими қадршиносии ғолибон баргузор шуд.

  Дар оғози маросим рафти баргузории  даври  шаҳрии ин озмунҳои ҷумҳуриявиро муовини раиси шаҳр Парвина Нақибӣ таҳлил намуд. Зикр шуд, ки дар даври дуюми озмунҳои “Фурўѓи субњи доної китоб аст”- 582, “Илм фурўѓи маърифат”- 1706,“Шоҳномахонӣ” 573 нафар хонандагон, донишҷӯён ва дигар табақаҳои аҳолӣ иштирок намуда, мутаносибан ба даври вилоятии онҳо  106, 109 ва 36 нафар роҳхат гирифтанд. 

  Таъкид шуд, ки мақомоти иҷроияи маҳаллии ҳокимияти давлатии шаҳр барои баргузории даври шаҳрии ин озмунҳо тадбирҳои амалӣ андешида,  ҷиҳати дар сатҳи баланд ташкил намудани онҳо ва қадршиносии ғолибон  бо қарорҳои раиси шаҳр 759 ҳазор сомонӣ ҷудо карда шуд.

  Аз масъулини шуъбаи маориф, муассисаҳои  таълимии миёна,  донишкадаю коллеҷҳо, комиссияҳои  баргузории озмунҳо  даъват шуд, ки барои ишироки бештари хонандагону донишҷӯён, омӯзгорон ва одамони касбу кори гуногун дар ин озмунҳои ҷумҳуриявӣ, ки аз ибтикороти наҷибонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ба хотири баланд бардоштани сатҳи маърифати  бадеӣ ва техникии ҷомеа аст,  минбаъд чораҳои амалӣ андешанд.

  Ба ғолибони даври шаҳрии  озмунҳои “Фурўѓи субњи доної китоб аст”, “Илм фурўѓи маърифат” ва “Шоҳномахонӣ”,  омӯзгорони онҳо дар вазъияти тантанавӣ диплом ва мукофотҳои таъсисшуда тақдим карда шуд. 

2026-10-17 10:08:29

ДАР ШАҲРИ ПАНҶАКЕНТ ФОРУМИ ҶУМҲУРИЯВӢ ЗЕРИ УНВОНИ “ ПЕШВОИ МИЛЛАТ-ЭҲЁГАРИ АНЪАНАҲОИ МИЛЛӢ” БАРГУЗОР ШУД

Рӯзи 16 октябр  бо ибтикори Кумитаи кор бо занон ва оилаи назди Ҳкумати мамлакат ва дастгирии мақомоти иҷроияи маҳаллии ҳокимияти давлатии шаҳри Панҷакент дар доираи нақшаи татбиқи Барномаи давлатии рушди оила дар Ҷумҳурии Тоҷикистон барои солҳои 2024-2028, бо мақсади  эҳё ва рушди ҳунарҳои миллӣ ва дастгирии занони ҳунарманд ва соҳибкор  дар шаҳри  Панҷакент  таҳти унвони  “Пешвои миллаи-эҳёгари анъанаҳи миллӣ” форуми ҷумҳуриявӣ дар доираи ҷамъбасти озмуни  ”Беҳтарин оилаи ҳунарманд”  бо иштироки ҳунармандон   аз ҳама минтақаҳои  мамлакат баргузор шуд.

       Меҳмонон ва иштирокчиёни форум дар оғоз дар саҳни Кохи фарҳанги ба номи Олим Бобоев аз намоиши ҳунарҳои миллӣ, ки маҳсули дасти ҳунармандон аз   шаҳрҳои Душанбе, вилоятҳои Хатлону  Бадахшон, Суғд ва шаҳри Панҷакент буданд ва марказҳои ҳунармандии шаҳр, корхонаи дӯзандагии  "Маҳсул", бостоншаҳри Саразм дидан намуданд.       

      Дар  форум муовини якуми  раиси Кумитаи кор бо занон ва оилаи назди Ҳукумати мамлакат Мадина Набизода, Зайнура Азимӣ- муовини раиси вилояти Суғд,  Сабур Собирзода- муовини якуми раис шаҳри Панҷакент иштирок ва суханронӣ намуданд.

  Таъкид шуд, дар даврони истиқлол бо дастгирӣ ва таваҷҷӯҳи пайвастаи  Асосгузори сулҳу ваҳдати миллӣ-Пешвои миллат, Президнти Ҷумҳурии Тоҷикистон муҳтарам Эмомалӣ Раҳмон анъанаю ҳунарҳои миллӣ эҳё ва рушд карда, ҳазорҳо нафар ҳунармандон, хоса бонувон, ба ин соҳа ҷалб шуда, дар муаррифии   ҳунарҳои миллии тоҷикон дар сатҳи ҷаҳонӣ саҳм гузоштанд.

  Ҳунари миллии мо дар арсаи ҷаҳонӣ эътироф гардид ва намунаи боризи он ба Феҳристи мероси ҷаҳонии ЮНЕСКО ворид шудани чакандӯзӣ ва ба феҳристи Шаҳрҳои  ҷаҳонии ҳунармандӣ шомил шудани шаҳри Панҷакент аз рӯи сӯзанидӯзӣ ва Истравшан  бо ҳунари кордсозӣ аст.

  Иштирокчиёни форумро шоира Меҳринисо ,ҳунармандон ва  бонувони фаъоли шаҳри Панҷакент шодбош гуфтанд.

  Дар фарҷоми форум маросими бо диплом ва мукофотҳои  Кумитаи кор бо занон ва оилаи назди Ҳукумати мамлакат  қадршиносӣ намудани ғолибони озмуни ”Беҳтарин оилаи ҳунарманд” баргузор гардида, барномаи ҷолиби ҳунарии санъаткорони шаҳри Панҷакент пешкаш шуд. 

  Дар ҷараёни  форум  бо бонувони барӯманди шаҳри Панҷакент, собиқ муовинони раиси шаҳр  Фотима  Сироҷзода, ҳоло ноиби ректори Донишкадаи омӯзгории Тоҷикистон дар шаҳри Панҷакент, Маҳбуба Ҳабибӣ ва Барно Ашӯрова мулоқот баргузор шуд.

2026-10-15 09:37:39

РОҲҲОИ МАҲАЛЛАИ ҚОҚУРӢ МУМФАРШ КАРДА МЕШАВАД

Дирӯз бо саҳмгузории  соҳибкорон ва сокинон мумфарш намудани кӯчаи ба номи Султон Отабоеви маҳаллаи Қоқурии шаҳри Панҷакент  оғоз шуд.

  Тавре дар маросими оғози  ин кор ба муовини якуми раиси шаҳр Сабур Собирзода иттилоъ доданд,  мумфарш намудани роҳи ин кӯча дар масофаи беш аз як километр пешбинӣ шуда, он бо саҳмгузории соҳибкорон, вакили Маҷлиси шаҳрӣ Фариз Камолов, Ифтихор Яздонқулов, Шодмон Отабоев ва иштироки сокинони маҳалла бо ҷалби техникаи роҳсозӣ баҷо оварда мешавад.

  Дар маҷмӯъ, давоми 9 моҳи соли равон дар шаҳр беш аз 41 километр роҳҳои маҳаллӣ бо сармоягузории соҳибкорон, аҳолӣ ва  дигар  манбаъҳо мумфарш карда шудааст ва ин кор ҳоло идома дорад. 

2026-10-14 12:17:12

БОЗДИД АЗ КОРХОНАИ ИСТЕҲСОЛИ ХИШТ

Ҷамъияти  саҳҳоми  кушодаи    “Заводи хишт” дар заминаи  куҳантарин  коргоҳи истеҳсоли хишти шаҳри Панҷакент ташкил шудааст  ва он собиқа ҳамаи сохтмонҳои шаҳру деҳотро бо ин навъи маҳсулоти бинокорӣ таъмин менамуд.

  Дар ҷараёни  боздиди  раиси шаҳр Абдухолиқ Холиқзода  аз фаъолияти коргоҳ иттилоъ дода шуд, ки он дар нӯҳ  моҳи соли равон 1,8 миллион дона хишт истеҳсол намудаст, ки ин назари ба ҳамин давраи порина 21,8 фоиз бештар аст.

  Баробари ин таъкид карда шуд, хиште, ки коргоҳ ҳоло истеҳсол менамояд, қисми ночизи эҳтиёҷи ширкатҳои бинокории шаҳрро ба ин масолеҳ таъмин  менамояд.

  Ба роҳбарияти коргоҳ барои насби таҷҳизоти ҳозиразамон, зиёд намудани истеҳсоли маҳсулот ва беҳдошти сифати он дастур дода шуд 

2026-10-14 12:05:11

ДАР ДЕҲОТИ ХАЛИФА ҲАСАН ЧОРВОДОРӢ РУШД МЕКУНАД

Дар деҳоти Халифа Ҳасани шаҳри Панҷакент соҳибкорон  ба  соҳаи  чорводорӣ таваҷҷӯҳ менамоянд.

  Раиси шаҳр Абдухолиқ Холиқзода зимни сафари корӣ аз фаъолияти фермаи хурди чорводории кишоварз ва соҳибкор Наҷмиддин Муҳиддинов, ки дар мавзеъи Мушхона  ташкил карда шудааст, дидан намуд.

   Ин ҷо ҳоло 17 сар  гови гӯштӣ ва ширдеҳ ба парвариш гузошта шудааст,  Ба ӯ барои васеъ намудани бинои ферма ва зиёд кардани саршумори чорвои хушзот дастур дода шуд.

  Дар ин ҷо ҳоло соҳибкор  Ҳалим Соҳибов ба бунёди фермаи  паррандапарварӣ барои   дар навбати аввал парвариш намудани 10 ҳазор сар мурғ барои истеҳсоли тухм ва гӯшт  оғоз намудааст.

  Ба масъулини ҷамоати деҳот  ва рёсати кишоварзии шаҳр барои зери назорат гирифтани бунёди ин ферма супориш дода шуд. 