Panjakent.tj - Хабарҳо

2025-06-02 10:28:57

БАРРАСИИ РАФТИ ИҶРОИ БАРНОМАИ КАСБОМӮЗӢ

Дар оғози ҷаласаи назоратии назди раиси шаҳри Панҷакент Абдухолиқ Холиқзода, ба ҳозирин  оид  ба  баргузории  нахустин Конфронси байналмилалии сатҳи баланд оид ба ҳифзи пиряхҳо, ки  дар пойтахти мамлакат бо иштироки беш аз 2500 коршиноси сатҳи баланд аз 80 кишвар, роҳбарони ҳайатҳои як қатор ҳукуматҳо, намояндагони воломақоми созмонҳои минтақавию байналмилалӣ, пажӯҳишгоҳҳо ва шарикони рушд доир гардид,маълумот дода шуд.

  Баъдан, зимни шунидани гузориши  сардори Раёсати  Агентии меҳнат ва шуғли аҳолӣ дар шаҳр оид  ба  рафти иҷрои “Барномаи касбомӯзии шаҳрвандони Ҷумҳурии Тоҷикистон барои солҳои 2021-2025” гуфта шуд, ки аз оғози татбиқи барномаи мазкур дар маҷмӯъ беш аз 4120 нафар   бо роҳҳои гуногун  ба касбомӯзӣ фаро гирифта, дар бахши муассисаи давлатии “ Маркази таълими калонсолони Тоҷикистон”  барои ин ҳама шароитҳо муҳайё буда, ҳамчунин дар ин давра 12 ярмаркаи ҷойҳои кории холӣ ва вазифаҳои озод баргузор карда шудааст.

   Раёсати  Агентии меҳнат ва шуғли аҳолӣ дар шаҳр вазифадор карда шуд, ки дар ҳамкорӣ бо ниҳодҳои марбута ҷиҳати санҷиши иҷрои барномаи мазкур, ба касбомӯзӣ бештар  ҷалб намудани шахсони бешуғл тибқи талаботи бозори меҳнат тадбирҳои амалӣ андешад.

  Дар идомаи ҷаласаи назорати зимни баррасии пешниҳоди мақомоти прокуратура оид ба ҳолати риояи қонунгузорӣ дар бораи замин таваҷҷӯҳи раёсати кишоварзӣ,  кумитаи идораи замин, ҷамоатҳои деҳот ва дигар заминистифодабарандагон ба риояи қатъии қонунҳо, истифодаи босамари замин, пешгирии ҳолатҳои риоя нашудани қонунҳо дар истифодаи замин ҷалб карда, онҳо муваззаф карда шуданд, ки кишти картошка ва дигар зироатро зери назорати қатъӣ қарор дода, ба саҳеҳияти маълумотҳои омори кишоварзӣ  эътибори ҷиддӣ дода шавад.

  Дар ҷаласа ҳамчунин рафти  сохтмони  як қатор иншооотҳо дар доираи нақшаи омодагӣ ба 35- солагии  истиқлоли давлатӣ баррасӣ карда, масъулон барои назорати ҷиддӣ ба  сифати корҳо, дар мӯҳлати пешбинишуда ба анҷом расонидани сохтмон,  ободу зебо  ва тоза намудани заминҳои шафати  роҳҳо ва дигар масъалаҳои муҳими ҳаёти иқтисодӣ ва иҷтимоии шаҳр мавриди баррасӣ қарор дода шуд.

2025-06-01 17:38:15

АЁДАТИ КӮДАКОН ДАР БЕМОРХОНА

Дар арафаи Рӯзи байналмилалии ҳифзи кӯдакон раиси шаҳри Панҷакент Абдухолиқ Холиқзода кӯдаконеро, ки дар беморхонаи кӯдакони шаҳр табобат мегиранд, аёдат намуд ва онҳоро бо ин рӯз табрик гуфт.

Дар сӯҳбат бо волидони онҳо ва кормандони беморхона аз ҷумла гуфта шуд, ки давлат ва Ҳукумати мамлакат бо дастури Пешвои миллат , Президенти Ҷумҳурии Тоҷикистон, муҳтарам Эмомалӣ Раҳмон барои ба ғамхорӣ фаро гирифтани кӯдакон, ҳифзи саломатии онҳо ҳамаи чораҳоро меандешад ва ҳифзи саломатии модару кӯдак ҳанӯз аз давраи ҳомиладорӣ зери назорати табибон қарор гирифта, масъулияти давлат, ҷомеа, мактаб ва волидон дар таълиму тарбияи кӯдаконро қонун муайян намудааст.

Таъкид шуд, ки бо дастгирии мақомоти иҷроияи маҳаллии ҳокимияти давлатии вилояти Суғд ва шаҳр ҳоло бунёди бинои нави беморхонаи кӯдакон оғоз шуда, дар мӯҳлати муайяншуда он бо сифати хуб ва шароити мусоид барои табобати атфол сохта мешавад.

Ба кӯдаконе, ки дар беморхона табобат мегиранд, тӯҳфаҳои идонаи мақомоти иҷроияи маҳаллии ҳокимияти давлатии шаҳр тақдим карда, кормандони бемористон муваззаф карда шуданд, ки табобати онҳоро дар сатҳи зарурӣ ба роҳ монанд.

Дар ин боздид бо рафти бунёди бинои нави беморхонаи кӯдакон шинос шуда, ба сохтмончиён барои бо сифати хуб ба ҷо овардани корҳои бинокорӣ дастур дода шуд.

Дар ин рӯз ҳамчунин аз ҷониби масъулини мақомоти иҷроияи маҳаллии ҳокимияти давлатии шаҳр ва маъмурияти беморхонаи марказӣ ду нафар кӯдак маъюбе, ки дар хона табобат мегиранд ва кӯдаконе, ки дар шӯъбаҳои беморхонаи марказии шаҳр ба табобат фаро гирифта шудаанд, аёдат карда, ба онҳо тӯҳфаҳои идона тақдим карда шуд.

2025-06-01 17:36:56

КӮДАКИ МАН ШОД ЗӢ, ОЗОД ЗӢ

Дар кохи фарҳанги шаҳри Панҷакент Рӯзи байналмилалии ҳифзи кӯдакон бо иштироки доираи васеъи тарбиягирандагони муассисаҳои томактабии шаҳр, мураббияҳо  ва волидони онҳо, намояндагони ташкилоту муассисаҳо ботантана таҷлил карда шуд.

  Дар оғози ҳамоиш кӯдакон чун анъана дар рӯи асфалт расм кашиданд ва  кӯдакистонҳо ҳунари тарбиягирандагонашонро ба намоиш гузоштанд.

   Ба ҳозирин паёми табрикии раиси шаҳр Абдухолиқ Холиқзодаро ба муносибати Рӯзи байналмилалии ҳифзи кӯдакон муовини раиси шаҳр Мурод Шукурзода ироа намуд.

  Дар он, аз ҷумла, таъкид шудааст, ки дар сиёсати иҷтимоии Ҳукумати кишвар, ки бо роҳнамоии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ мешавад, ғамхорӣ ба кӯдакон, муҳайё намудани шароити мусоиду созгор барои тарбияю таълими онҳо ҷойгоҳи хосаро соҳиб аст  ва маҳз ба ҳамин хотир бо дастури Сарвари давлат барои бунёди муассисаҳои томактабӣ дар ҳар маҳали аҳолинишин тадбирҳои амалӣ андешида мешавад.

  Мақомоти иҷроияи маҳаллии ҳокимияти давлатии шаҳр низ барои ба тарбия дар муассисаҳои томактабӣ фаро гирифтани кӯдакон, беҳдошти шароити таълиму тарбия дар кӯдакистонҳо чораҳо андешида, волидонро барои тарбияи дурусти фарзандонашон, иҷрои муқаррароти  Қонун “Дар бораи масъулият дар таълиму тарбияи фарзанд” вомедорад.

  Дар фарҷоми чорабинӣ  тарбиягирандагони кӯдакистонҳо барои ҳамсолонашон ва ҳозирин барномаи ҷолиби рақсу суруд пешкаш намуданд, ки инъикосгари кӯдакии хушбахтона дар паноҳи ғамхории давлат, ҷомеа ва волидон буд.

2025-06-01 17:34:59

ПАЁМИ ТАБРИКИИ раиси шаҳри Панҷакент Абдухолиқ Холиқзода ба муносибати Рӯзи байналмилалии ҳифзи кӯдакон

Ҳамдиёрони  арҷманд!  Кӯдакони азизи диёр!

 Ҳамасола дар саросари ҷаҳон, аз ҷумла кишвари азизи мо, санаи 1 июн ҳамчун Рӯзи байналмимлалии ҳифзи кӯдакон ба хотири ба ғамхории бештар фаро гирифтани насли ояндасози ҷомеа қайд карда мешавад

 Ин рӯзи муборакро ба  кулли кӯдакони хушбахти диёр, волидони онҳо ва ҳамаи мо аз номи мақомоти иҷроияи маҳаллии ҳокимияти давлатии шаҳр  самимона муборакбод гуфта, барояшон осмони софу беғубор, оромию осудагӣ ва тамоми хушиҳои зиндагиро орзу намоям. 

  Тавре  Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон борҳо таъкид доштаанд, ғамхорӣ ба кӯдакон, барои таълиму тарбияи онҳо фароҳам овардани шароити мусоид, таъмини  кӯдакии хушбахтона барои онҳо, ҳаёти осоиштаи кӯдакон ва риояи ҳуқуқу озодиҳои онҳо, дар рӯҳияи меҳру муҳаббат ба Ватан ва ҳамчун насли солиму созанда тарбия  кардани насли наврас дар сиёсати иҷтимоии давлат ва Ҳукумати мамлакат ҷойгоҳи хосаро доро аст ва   дар даврони истиқлол дар ин роҳ қадамҳои устувор гузошта мешавад.

  Барҳақ,кӯдакон ояндаи осудаву ободии ҳар як миллат, сарвати бебаҳои ҳар як хонавода ва ҷомеаву давлат ба шумор рафта, бахту саодати рӯзгори падару модарон мебошанд ва Ҳукумати  мамлакат барои  ба ғамхорӣ фаро гирифтани кӯдакон, ҳифзи саломатии онҳо ҳамаи чораҳоро меандешад ва ҳифзи саломатии модару кӯдак зери назорати табибон қарор гирифта, масъулияти давлат, ҷомеа, мактаб ва волидон дар  таълиму тарбияи кӯдаконро қонун муайян намудааст.

 Ҳукумати мамлакат дар навбати аввал кӯдакони ятиму бепарастор, эҳтиёҷманду имконияташон маҳдуд ва фарзандони оилаҳои камбизоатро ба ғамхории пайваста фаро  гирифтааст ва  мулоқотҳои  Пешвои муаззами миллат дар ҳар сафари кориашон ба манотиқи мамлакат   бо чунин табақаи кӯдакон  ба ин далел аст.

 Мақомоти иҷроияи ҳокимияти давлатии  шаҳри Панҷакент низ  дар заминаи ин сиёсати инсонпарваронаи Ҳукумати кишвар  барои  ба ғамхории доимӣ фаро гирифтан ва фароҳам овардани тамоми шароитҳои зарурӣ ҷиҳати  беҳдошти  омӯзишу парвариши кӯдакон ва насли наврас корҳои судмандро ба анҷом мерасонад.  Таваҷҷӯҳи хоса ба бунёди муассисаҳои томактабӣ дар ҳар ҷамоати деҳот ва маҳалҳои аҳолинишин, ба ин кор ҷалб намудани  сарчашмаҳои гуногуни маблағгузорӣ ҷиҳати иҷрои дастури  Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аз ҷумлаи ин тадбирҳо аст.

  Ин кор зери назорати пайвастаи мақомоти иҷроияи маҳаллии ҳокимияти давлатии шаҳр қарор дорад ва ғамхорӣ ба кӯдакон, муҳайё намудани шароити созгор барои тарбияи онҳо  минбаъд низ дар меҳвари фаъолияи мо қарор хоҳад гирифт.

   Бори дигар фарзандони дӯстрӯякро  бо ин рӯз самимона табрику таҳният гуфта,  тамоми хушиҳои рӯзгорро таманно  намуда, барояшон кӯдакии хушбахтонаро дар паноҳи ғамхории давлату ҷомеа ва волидон орзу мекунам.

  Рӯзи байналмилалии ҳифзи кӯдакон муборак бод!

2025-05-31 08:36:06

БОЗДИД АЗ БОҒИ ГЕЛОС, ФЕРМАИ ЧОРВОДОРӢ ВА ПАРВАРИШИ КАРТОШКА.

Соҳибкор ва кишоварз   Абдусалом Воҳидов  ҳоло ҳамарӯза ҳосили боғи гелосашро ба бозор мебарорад ва он харидорони зиёд ҳам дорад. Баъди чанде ҳосили  лиму низ дар гармхонаи  оилавии ӯ пухта мерасад.

  Раиси шаҳри Панҷакент Абдухолиқ Холиқзода зимни боздид аз Ҷамоати деҳоти Халифа Ҳасан бо фаъолияти ин соҳибкор шинос шуда, барои васеъ намудани боғи гелос ва  парвариши лиму дар гармхона масдиҳат дод.

  Дар ин сафар ҳамчунин  аз рафти  кишт ва парвариши картошка ва дигар зироат дар хоҷагиҳои деҳқонии Ҷамоати деҳот дидан намуда,  дастур дода шуд, ки кишти картошка идома дода шавад. Кишоварзони хоҷагиҳои деҳқонӣ  ҳоло дар 247 гектар картошка шинонида, майдони онро то анҷоми мавсими кишт ба 535 гектар мерасонанд.

  Зимни боздиди фермаи чорводории   соҳибкор  Фирӯз Ҷумъаев, ки дар он 50 сар чорвои калони гӯштӣ парвариш карда мешавад, барои  зиёд намудани саршумори чорво, дастрас  кардани чорвои хушзоти зудрас дастуру тавсия дода шуд.

2025-05-31 08:34:40

САФАРИ КОРӢ БА ҶАМОАТИ ДЕҲОТИ ХАЛИФА ҲАСАН ВА ИФТИТОҲИ ИНШООТҲО.

Дар ҷамоати деҳоти Халифа Ҳасани шаҳри Панҷакент  бунёди иншооти таъиноти гуногун ба истиқболи ҷашни 35- солагии истиқлоли давлатии Ҷумҳурии Тоҷикистон бо маром идома дорад. 

  Раиси шаҳри Панҷакент Абдухолиқ Холиқзода зимни сафари корӣ ба ҷамоати деҳот дар маросими ба истифода додани як қатор иншоот иштирок намуда, ба ин иқдоми соҳибкорон баҳои баланд дода шуд.

  Аз ҷумла,  зимни ифтитоҳи мағозаи фурӯши маводи кимиёӣ барои соҳаи кишоварзии соҳибкор  Самад Соҳибназаров бо номи "Сомон - агро" гуфта шуд, ки   бо ташкили он  барои кишоварзон дастрас намудани маводи кимиёии барои рустанипарварӣ зарурӣ, аз ҷумла, нурӣ, заҳрҳои кимиёии мубориза бо ҳашароти зиёновар ва касалиҳои зироату боғу ток беҳтар мегардад.

  Дар ин сафари корӣ ҳамчунин  аз нуқтаи фурӯши сӯзишвории соҳибкор Абдусаттор Руҳулов, рафти корҳои ободонии оромгоҳи деҳаи Сӯфиён дидан намуда, пули мошингузар аз болои канали Фарметан,  чоҳи амудӣ барои бо оби нӯшокӣ таъмин намудани 200 хоҷагии сокинони ин  деҳа аз тариқи ҳашар бунёд намудаанд,   нуқтаи шустушӯи мошинҳо ва мағозаи қисмҳои эҳтиётӣ ифтитоҳ карда шуд.

  Гуфта шуд, ки мақомоти иҷроияи маҳаллии ҳокимияти давлатии шаҳр иқдоми соҳибкоронро ҷиҳати бунёди иншооти гуногун ва ташкили ҷойҳои нави корӣ ҳамаҷониба дастгирӣ менамояд.

2025-05-29 16:14:44

БА ЭҲТИЁҶМАНДОН ҚИТЪАҲОИ ЗАМИНИ НАЗДИҲАВЛИГӢ ҶУДО КАРДА ШУД

Таъминот бо қитъаи замини наздиҳавлигӣ, баҳсҳо оид ба замин аз масъалаҳои умдаест, ки дар рӯзҳои қабули раиси шаҳри Панҷакент Абдухолиқ Холиқзода ва дар муроҷиатҳои шаҳрвандон ба мақомоти иҷроияи маҳаллии ҳокимияти давлатии шаҳр ба миён гузошта мешавад.

  Бо мақсади расидагӣ ба ин арзу муроҷиатҳо ва таъмини оилаҳои эҳтиёҷманд бо қитъаи замини наздиҳавлигӣ бо қарорҳои раиси шаҳр аз 29 майи соли 2025, таҳти рақамҳои 251,252,253,254,255,156 ва 257 дар асоси қарори Ҳукумати Ҷумҳурии Тоҷикистон, аз 2 сентябри соли 2010, № 441,суратмаҷлиси комиссияҳои ҷамъиятӣ  дар Ҷамоатҳои  деҳоти Рӯдакӣ ба 6 , Моғиён-12, Ёрӣ – 14, Амондара – 6, Хурмӣ- 10, Косатарош- 9, Фароб-3, дар маҷмӯъ ба 60 оилаи эҳтиёҷманд қитъаҳои замини наздиҳавлигӣ ҷудо карда шуд.

  Тибқи қарорҳои мазкур шаҳрвандон баъди гирифтани шаҳодатнома дар бораи бақайдгирии давлатӣ дар  қитъаҳои заминҳои наздиҳавлигии ҷудошуда  бояд ба сохтмони манзил шурӯъ намоянд.

2025-05-29 14:37:47

МАВОДИ НАШЪАОВАР- ХАТАР БАРОИ ҶОМЕА

Ҳамасола дар саросари ҷаҳон санаи 1 июн ҳамчун Рӯзи байналмилалии мубориза бар зидди маводи нашъаовар ба хотири тақвияти мубориза бо ин хатар барои ҷомеа қайд карда мешавад.

Раиси шаҳри Панҷакент Абдухолиқ Холиқзода зимни табрики кормандони шуъбаи байниноҳиявии Зарафшони раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Суғд бо ин рӯз, таъкид намуд, ки 26 сол боз кормандони ин ниҳод дар сафи пеши мубориза бо гардиши ғайриқонунии маводи мухаддир ва коҳиш додани таъсири харобиовари он ба аҳли ҷомеа қарор доранд ва дар ин ҷабҳа ба дастовардҳои назаррас низ ноил шудаанд.

Гуфта шуд, ки дар мубориза бо нашъаҷаллобӣ ва нашъамандӣ, ки вабои аср унвон шудааст, бояд бо аҳли ҷомеа ҳамкории густарда ба роҳ монда шавад.

Ба кормандони шуъбаи минтақавии Агентӣ сипоснома ва тӯҳфаҳои хотиравии мақомоти иҷроияи маҳаллии ҳокимияти давлатии шаҳр тақдим карда шуд.

2025-05-29 14:36:20

КӮЧАЮ БИНОҲО ТАРҲУ НАМОИ ЗЕБО ДОШТА БОШАНД

Ҳамин маънӣ зимни боздиди раиси шаҳри Панҷакент  Абдухолиқ Холиқзода аз кӯчаи Деваштичи шаҳр, ки марказро бо боғи истироҳатию фароғатии Камоли Хуҷандӣ мепайвандад, ба роҳбарони ташкилоту муассисаҳое, ки дар он ҷойгиранд, таъкид карда шуд.

   Аз ҷумла, ба роҳбарияти нозироти андоз, кумитаи идораи замин, муассисаи фаръии “Хоҷагии манзилӣ- комуналӣ”, муассисаи давлатии “Хоҷагии ҷангали Панҷакент”, маркази таъминоти бехатарии озуқаворӣ, коргоҳи истеҳсоли сафолаки соҳибкор Суҳроб Илёсов дастур дода шуд, ки барои бо тарҳу намои зебо ороиш додани биноҳои маъмурӣ ва истеҳсолӣ, тоза кардан ва ба тартиб овардани ду тарафи  ин кӯча ва намои биноҳои истиқоматӣ  дар мувофиқа бо шуъбаи меъморӣ ва шаҳрсозии мақомоти иҷроияи маҳаллии ҳокимияти давлатии шаҳр тадбирҳои амалӣ андешанд.

  Ҳамчунин  ба масъулини боғи фарҳангию фароғатии ба нами Камоли Хуҷандӣ ҷиҳати вусъат додани корҳои ободонӣ тибқи лоиҳаи таҷдиди он супориш дода шуд.

2025-05-28 13:22:40

ҶАЛАСАИ ШӮРОИ ҲАМОҲАНГСОЗИ МАҚОМОТИ ҲИФЗИ ҲУҚУҚ

 Дар ҷаласаи навбатии Шӯрои ҳамоҳангсози мақомоти ҳифзи ҳуқуқ дар шаҳри Панҷакент, ки дар Кохи фарҳанги шаҳр бо иштироки раисони ҷамоатҳои деҳот,  корхонаю муассисаҳо, хоҷагиҳои деҳқонӣ ва дигар фаъолон таҳти раёсати прокурори шаҳр, мушовири адлияи дараҷаи 1  Искандар  Ращматзода баргузор шуд,масъалаҳои истифодаи замин тибқи талаботи қонунгузории ҷорӣ ва тағйиру иловаҳо ба Кодексҳои ҷиноӣ ва ҳуқуқвайронкунии маъмурӣ  оид ба истифодаи ғайриқонунии нерӯи барқ  мариди баррасӣ қарор дода шуд.

  Зимни шунидани ҳисоботу гузориши масъулон, аз ҷумла таъкид шуд, ки замин моликияти истисноии давлат буда, барои истифода ба хоҷагиҳои деҳқонӣ ва дигар истифодабарандагон вогузор карда шудааст ва он бояд мувофиқи таъинот, босамар, барои кишти зироат истифода шавад. 

 Дар ҷаласа, муқаррароти Кодекси замин ва дигар санадҳои қонунгузорӣ оид ба истифодаи замин фаҳмонида, гуфта шуд, ки дар сурати истифодаи ғайримақсаднок ва бекор мондан  он ба манфиати давлат бозпас гирифта мешавад.

  Дар ҷаласа ҳамчунин   тағйиру иловаҳо ба Кодексҳои ҷиноӣ ва ҳуқуқвайронкунии маъмурӣ  оид ба истифодаи ғайриқонунии нерӯи барқ  ба ҳозирин ёдрас намуда, гуфта шуд, ки  мӯҳтавои  онҳо  зимни сӯҳбату вохӯриҳо ва тақсими варақаҳо ба ҳамаи сокинон фаҳмонида  шудааст ва дар сурати ошкор шудани чунин ҳодисаҳо ба онҳо тибқи талаботи қонун баҳои ҳуқуқӣ дода мешавад.

2025-05-28 12:41:24

БОЗДИД БО РАФТИ БУНЁДИ ИНШООТИ ҶАШНӢ

Рафти иҷрои нақшаи бунёди иншооти таъиноти гуногун ва ободкориҳо ба муносибати 35- солагии истиқлоли давлатии Ҷумҳурии Тоҷикистон зери назорати пайвастаи мақомоти иҷроияи маҳаллии ҳокимияти давлатии шаҳри Панҷакент қарор дорад.

   Дар ин росто раиси шаҳр Абдухолиқ Холиқзода зимни сафари корӣ ба Ҷамоати деҳоти Ёрӣ бо рафти бунёди бинои иловагии муассисаи таҳсилоти миёнаи умумии № 57 боздид намуд.

  Бинои мазкур бо дастгирии мақомоти иҷроияи маҳаллии ҳокимияти давлатии шаҳр ва  маблағгузории соҳибкорон ва сокинони деҳа бунёд мешавад ва ҳоло корҳои бинокорӣ дар қабати дуюми он оғоз шудааст.

    Бо бунёди  бинои иловагӣ, ки барои 800 хонанда дар ду баст пешбинӣ шудааст, мушкилоти  норасоии ҷои нишаст дар таълимгоҳ ҳал хоҳад шуд.

  Дар ин сафари корӣ раиси шаҳр  ҳамчунин дар деҳаи Ғӯсари Ҷамоати деҳоти Лоиқ Шералӣ  бо рафти сохтмони бинои маъмурии ҷамоати деҳот ва беморхонаи минтақавӣ барои 100 ҷой шинос гардид  ва барои  тезонидани корҳо дастур дода шуд.

2025-05-28 11:24:17

САФАРИ КОРӢ БА ҶАМОАТИ ДЕҲОТИ СӮҶИНА

Дар Ҷамоати деҳоти  Сӯҷинаи шаҳри Панҷакент дар доираи нақшаи омодагӣ ба ҷашни 35-солагии истиқлоли давлатии  Ҷумҳурии  Тоҷикистон корҳои ободонию бунёдкорӣ бомаром идома доранд.

  Раиси шаҳр Абдухолиқ Холиқзода зимни сафари корӣ  аз рафти бунёди коргоҳи истеҳсоли хишт, ки  бо сармоягузории соҳибкор  Фариз Камолов бунёд мешавад,  дидан намуд.

  Гуфта шуд, ки ҳоло бунёди сехи истеҳсоли шифер дар арафаи анҷомёбӣ қарор дошта, ҳамаи таҷҳизоти зарурӣ барои насб ва ашёи хом низ дастрас карда шудааст.

  Иқтидори истеҳсолии коргоҳи мазкур барои истеҳсоли 5 ҳазор дона шифер дар як шабонарӯз пешбинӣ шудааст.

  Дар ин сафари корӣ ҳамчунин бо рафти ороиши  маркази хидматрасонии соҳибкор  Машраб Эгамбердиев ва  таҷдиди собиқ бинои маъмурӣ барои кӯдакистони дорои 200 ҷой аз ҷониби соҳибкор Алиҷон Маҷамов шинос шуда, ба масъулини ҷамоати деҳот ва соҳибкорон барои бо тарҳи зебо ба тартиб овардани саҳну атрофи биноҳо ва дар мӯҳлати кӯтоҳ анҷом додани корҳо дастур дода шуд.

2025-05-27 17:34:19

ПИЛЛАСУПОРӢ ОҒОЗ ШУД

Имсол кишоварзони шаҳри Панҷакент тибқи нақша 680 қуттӣ тухми кирмакро ба парвариш гузошта, аз он истеҳсол намудани 25,8 тонна ашёи хоми саноатиро ба нақша гирифтаанд.

  Имрӯз дар шаҳр  нахустин шуда, кирмакпарварони хоҷагии деҳқонии ба номи Тайлонови Ҷамоати деҳоти Саразм  дар ҳузури раиси шаҳр Абдухолиқ Холиқзода ба супоридани ҳосили дастранҷашон шурӯъ намуданд.

 Онҳо парвариши 38  қуттӣ тухми кирмакро ба ӯҳда гирифта, дар рӯзи аввал ба нуқтаи қабул беш аз 600 килограмм пиллаи хушсифат супориданд.

  Дар ин рӯз ҳамчунин кишоварзони хоҷагии деҳқонии “Хуросон”-и Ҷамоати Ёрӣ низ ба  супоридани пилла оғоз карданд.

  Гуфта шуд, ки имсол  ба кирмакпарварон  дар рӯзи супоридани ҳосил барои ҳар килограмм  пилла 20 сомонӣ пардохт карда мешавад.

2025-05-27 17:13:37

НЕРУҲОИ САРҲАДӢ- СИПАРИ БОЭЪТИМОДИ ВАТАН

Имрӯз дар қисми ҳарбии Қушунҳои сарҳадии Кумитаи давлатии амнияти миллии Ҷумҳурии Тоҷикистон дар шаҳри Панҷакент ба ифтихори Рӯзи Қӯшунҳои сарҳадии Ҷумҳурии Тоҷикистон, ки ба таъсисаш 31 сол пур мешавад, бо иштироки роҳбарияти мақомоти иҷроияи маҳаллии ҳокимияти давлатии шаҳр, мақомоти ҳифзи ҳуқуқ,  роҳбарони як қатор ташкилоту муассисаҳо,намояндагони ҷомеаҳои меҳнатӣ, хонандагони синфҳои болоии мактабҳо, волидони сарбозон ҷамъомади тантанавии идона баргузор шуд.

     Дар оғози ҷамъомад ба иштирокчиёни ид намунаи яроқу таҷҳизот ва техникаи ҳарбӣ намоиш дода шуд.

  Раиси шаҳр Абдухолиқ Холиқзода зимни табрики афсарону сарбозони қисми низомӣ бо Рӯзи Қӯшунҳои сарҳадии Ҷумҳурии Тоҷикистон, аз ҷумла таъкид намуд, ки он зодаи истиқлол буда, масъули ҳифзи рукни муҳим ва муқаддаси давлати мустақил, марз ва таъмини амниятро бар уҳда доранд. Дар замони мушкилтарин, дар баробари Артиши миллӣ, ниҳоди хосае барои   муҳофизати марз таъсис дода шуд, ки дар саргаҳи он Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Тоҷикистон, муҳтарам Эмомалӣ Раҳмон меистоданд. 

        Гуфта шуд, ки сарбозону афсарон дар  вазъи муташанниҷи сиёсии ҷаҳон моҳияту масъулияти  ватандорӣ, истиқлол, соҳибихтиёриро  дарк менамоянд ва хуб мефаҳманд, ки модару Ватан ягонаанд ва  ҳифзи озодӣ ва марзу буми  он  рисолати муқаддаси онҳо маҳсуб мешавад. 

 Мақомоти иҷроияи маҳаллии ҳокимияти давлатии шаҳр бо қисми низомии сарҳадбонон, дидбонгоҳҳои сарҳадӣ робитаи ҳамарӯза дорад ва барои беҳдошти шароити хидмати афсаору аскарон фаъолона мусоидат менамояд.

  Дар идомаи ҷамъомад  наваскарони қисми ҳарбӣ дар ҳузури ҳозирин барои садоқат ба Ватан ва Президент,содиқона ба ҷо овардани рисолати касбиашон савганд ёд карданд.

  Ҷамъомади тантанавӣ бо нишон додани машқҳои низомӣ, ба як қатор афсарон, роҳбарони ташкилоту муассисаҳо  тақдим намудани сипосномаю тӯҳфаҳои идона, нишони “Аълочии Қушунҳои сарҳадӣ”, гузашти низомии ҳайати  шахсии қисми ҳарбӣ ва барномаи ҳунарии санъаткорони шаҳр  анҷом ёфт.

   Дар қисми ҳарбӣ корҳои зиёди ободонӣ анҷом дода, барои афсарону сарбозон ҳама шароити оинномавӣ муҳайё карда шудааст ва  имрӯз барои ҳайати шахсӣ дастархони идона  низ густурда шуд.

2025-05-26 11:37:40

ТАНТАНАҲОИ РӮЗИ ҶАҲОНИИ ФУТБОЛ ДАР ШАҲРИ ПАНҶАКЕНТ

Бегоҳи дирӯз дар варзишгоҳи марказии шаҳри Панҷакент бо ҳузури роҳбарияти мақомоти иҷроияи маҳалии ҳокимияти давлатӣ, роҳбарон    ва ҷомеаҳои меҳнатии корхонаю  муассисаҳо, садҳо нафар ҳаводорону мухлисони бозии футбол- оммавитарин навъи варзиш, Рӯзи ҷаҳонии футбол бо тантана таҷлил карда шуд.

    Нахуст, ҳозиринро бо Рӯзи ҷаҳонии футбол раиси шаҳр Абдухолиқ Холиқзода муборакбод намуд.

 Аз ҷумла,  гуфта шуд, ки дар даврони истиқлол бо роҳнамоии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, варзиш, хоса футбол, ба рукни муҳими ҳаёти ҷавонони кишвар табдил ёфта, барои рушд, мустаҳкам намудани пойгоҳ ва инфрасохтори он тадбирҳои зиёде андешида мешавад.

 Боиси ифтихор аст, ки маҳз бо пешниҳоди Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе, Президенти Ассотсиатсияи футболи Осиёи Марказӣ ва Федератсияи футболи Тоҷикистон, муҳтарам Рустами Эмомалӣ бо Қатъномаи Маҷмааи умумии Созмони Милали Муттаҳид 25-уми май Рӯзи ҷаҳонии футбол эълон карда шуд. 

  Ба хотири рушди соҳаи варзиш, махсусан футбол, соли 2024 дар шаҳри Панҷакент Федератсияи футбол таъсис шуда, ба клуби футболи “Саразм”-и шаҳр аз ҳисоби буҷети маҳаллӣ маблағи зарурӣ ҷудо карда, ҳамчунин, бо маблағгузории буҷети маҳаллӣ варзишгоҳи марказии шаҳр тибқи меъёрҳои муқаррарнамудаи Федератсияи футболи мамлакат таъмиру таҷдид карда шуд.

  Ҳоло дар шаҳр варзишгоҳи марказӣ, 72 майдончаҳои хурди варзишӣ фаъолият дошта, соли гузашта 5 иншооти варзишӣ мавриди истифода қарор дода, ҳоло сохтмони боз 15 иншооти варзишӣ дар шаҳру деҳот идома дорад ва  дар  Рӯзи ҷаҳонии футбол  дар боғи фарҳангию фароғатии   Камоли Хуҷандии шаҳр боя як майдончаи замонавии футбол мариди истифодаи дӯстдорони ин намуди  варзиш қарор дода шуд .

  Дар идомаи тантанаҳои ҷашнӣ ба голибони мусобиқаи футбол барои соҳиб шудан ба ҷоми раиси шаҳр, ки ба ифтихори Рӯзи ҷаҳонии футбол байни дастаҳои  ниҳодҳои мақомоти ҳифзи ҳуқуқ, ташкилоту муассисаҳо,   маҳаллаҳои шаҳр  ва ҷамоатҳои деҳот ҷом, сипоснома ва  тӯҳфаҳои таъсиснамудаи мақомоти иҷроияи маҳаллии ҳокимияти давлатии шаҳр супорида шуд.

  Зимнан, дар ин мусобиқа, ки даҳ рӯз идома ёфт, 34 даста ширкат намуда, дар мусобиқаҳои финалӣ байни гурӯҳҳо дастаи шуъбаи корҳои дохилаи  Вазорати корҳои дохила дар шаҳр, беморхонаи марказии шаҳр, ва дастаи “Дӯстӣ”-и шаҳр ғолиб омада, соҳиби ҷом гаштанд.

  Таҷлили Рӯзи ҷаҳонии футбол бо баргузории  бозии намоишии дӯстдорони варзиш ва ҳунарнамоии Ҳунарпешаи Халқии Тоҷикистон Афзалшоҳ Шодиев хотима ёфт.

2025-05-26 10:00:17

МУЛОҚОТ БО РАИСИ РАЁСАТИ ШӮРОИ ДИРЕКТОРОНИ КМ “ЗАРАФШОН”

Мақомоти иҷроияи маҳаллии ҳокимияти давлатии шаҳри Панҷакент бо  яке аз калонтарин корхонаҳои саноати истихроҷу коркарди  маъдани мамлакат – ҶДММ КМ “Зарафшон” ҳамкории ҳамаҷонибаро ба роҳ мондааст.

  Дар ин замина раиси шаҳр Абдухолиқ Холиқзода раиси  раёсати Шӯрои директорони корхонаи муштараки “Зарафшон”, ҷаноби Ла Тифро ба ҳузур пазируфт.

  Дар  суҳбат ҷонибҳо  масъалаҳои тавсеаи рушди ин корхонаи азими саноатӣ, самтҳои ҳамкории он бо мақомоти иҷроияи маҳаллии ҳокимияти давлаиии шаҳр, саҳмгузории корхона дар ҳалли масъалаҳои иҷтимоӣ, зиёд намудани ҷойҳои нави корӣ, ташкили  коргоҳҳои хурди муштарак дар заминаи он, саҳмгузорӣ дар  таъмиру таҷдиди роҳҳои ҳудуди фаъолияти корхона ва дигар масъалаҳои мавриди назарро матраҳ намуданд.

2025-05-26 09:33:14

ТАҶЛИЛИ РӮЗИ КОРМАНДОНИ СОҲАИ СТАНДАРТИЗАТСИЯ ВА МЕТРОЛОГИЯ

Ҳамасола санаи 25 май дар мамлакат Рӯзи кормандони соҳаи стандартизатсия ва метрология таҷлил карда мешавад.

        Ба ин муносибат дар  Агентии минтақавии  стандартизатсия, метрология, сертификатсия ва нозироти  савдои шаҳри Панҷакент бо иштироки раиси шаҳр Абдухолиқ Холиқзода  ҷамъомад баргузор шуд.

       Зимни табрикоти кормандони Агентӣ аз ҷумла гуфта шуд, ки нақши онҳо чун як ниҳоди муҳими давлатӣ дар  татбиқи сиёсати давлатӣ дар соҳаи  стандартизатсия, метрология, таъмини риояи меъёри ягонаи кору хидматрсонӣ, назорат дар соҳаи савдо, ҳимояи ҳуқуқҳои  истеъмолкунандагон баланд аст ва онҳо ин рисолати касбии  бояд  бо камоли масъулият ба ҷо оранд.

        Дар интиҳои ҷамъомад ба як гурӯҳ кормандони фаъоли Агентӣ сипоснома ва тӯҳфаҳои хотиравии мақомоти иҷроияи маҳаллии ҳокимияти давлатии шаҳр тақдим карда шуд.

2025-05-26 08:52:46

ДАР БОҒИ КАМОЛИ ХУҶАНДӢ МАЙДОЧАИ ФУТБОЛ ИФТИТОҲ ШУД

Дар Рӯзи ҷаҳонии футбол дар боғи фарҳангию фароғатии ба номи Камоли Хуҷандии шаҳри Панҷакент дар доираи нақшаи таҷдиди он, ки   ба  истиқболи ҷашни 35- солагии истиқлоли давлатии Тоҷикистон таҳия шудааст, майдончаи футбол мариди истифода қарор дода шуд.

  Дар маросими ифтитоҳи ин иншооти варзишӣ раиси шаҳр Абдухолиқ Холиқзода  ба ин иқдоми соҳибкор Алишер Бозоров баҳои баланд дода, аз ҷумла гуфта шуд, ки ин  74-умин  майдончаи бозии футбол аст, ки ҳоло дӯстдорони ин намуди варзиши оммавӣ дар он бозӣ ва тамрин мекунанд.

 Тавре иттилоъ дода шуд, айни замон корҳои ободонию азнавсозӣ бо тарҳи нав оғоз шуда, атрофи  Кӯли ҷавонон, ки дар канори боғ воқеъ аст, роҳравҳо бо қуми  маҳин пӯшида, барои истироҳат ва шиноварӣ омода карда шудааст ва корҳо дар ин самт идома дорад.

  Мутобиқи лоиҳаи ангоравӣ дар боғ  бунёди манораи бузург фаввораҳо, мавзеъҳои истироҳатӣ, қаҳвахонаю майдонҳои бозӣ,  айвонҳои мунаққаш барои нишаст, амфитеатр, роҳравҳои чароғон, майдон ва лавҳаи ёдгорӣ ба хотири иштирокчиёни ҷанги дуюми ҷаҳон бо тарҳи нав ва ғайра пешбинӣ шуда, онҳо батадриҷ сохта мешаванд.

  Майдочаи бозии футбол, ки дар даромадгоҳи боғ  бо харҷи беш аз 400 ҳазор сомонӣ бунёд шудааст,  яке аз ин иншоот мебошад.