Дар ҷаласаи васеъи Шӯрои ҳамоҳангсози мақомоти ҳифзи ҳуқуқи шаҳри Панҷакент, ки таҳти раёсати раиси Шӯро, прокурори шаҳр, мушовири адлияи дараҷаи як Искандар Раҳматзода бо иштироки аъзоёни Шӯро, роҳбарони ташкилоту муассисаҳо, ҷамоатҳои деҳот ва дигар фаъолон баргузор шуд, рафти иҷрои қонунгузорӣ оид ба муқовимат бо коррупсия мавриди баррасӣ қарор гирифт.

Оид ба ин масъала муовини прокурори шаҳр Фирдавс Иброҳимзода, сардори шуъбаи минтақавии Агентии назорати давлатии молиявӣ ва мубориза бо коррупсия дар водии Зарафшон Нодирхон Акмалзода гузориш ироа намуда, муовини якуми раиси шаҳр Муҳаммадсодир Сафарзода ва сардори раёсати молияи шаҳр Ҷаҳон Мирзоҳафизиён дар бораи чораҳое, ки дар ин самт андешида шуданд, сухан карданд.

Дар ҷаласа зимни баррасии масъалаи рӯзнома натиҷаи санҷишҳои мақомоти марбута оид ба ошкор ва пешгирӣ намудани ҷиноятҳои коррупсионӣ ва иқтисодии хусусияти коррупсионидошта дар соҳаҳои маориф, истифодаи замин, сохторҳои мақомоти иҷроияи маҳаллии ҳокимияти давлатӣ, ҷамоатҳои деҳот, соҳаҳои барқ, обёрӣ ва беҳдошти замин, дигар соҳаҳо бо мисолҳои мушаххас матраҳ шуда, роҳбарону муҳосиботи корхонаю муассисаҳо, мақомоти молия, ҷамоатҳои деҳот, дигар соҳаҳо, кормандони васоити ахбори омма даъват шуданд, ки дар мубориза ва муқовимат бо коррупсия, пешгирии амалҳои хусусияти корруписонидошта, иҷрои муқарароти Қонуни Ҷумҳурии Тоҷикистон , “Дар бораи муқовимат ба коррупсия”, “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” ҷиҳати коҳиш додани ин зуҳуроти зиёновар ба ҷомеа ва давлат мусоидати фаъолона намоянд.

Дар ҷаласаи Шӯро ба саволу пешнишодҳои ҳозирин посухҳои қаноатбахш дода шуд.