Хонандаи синфи 11-и муассисаи давлатии литсейи № 1 Муҳаммадҷон Қосимов дар байни 9 нафар, ки аз муассисаҳои таълимии шаҳри Панҷакент дар даври ҷумҳуриявии озмуни “Илм – фурӯғи маърифат” иштирок менамоянд, аз номинатсияи физика нахустин ҷоизаро ба даст оварда, сазовори ҷойи аввал гардид.

Озмуни ҷумҳуриявии «Илм-фурӯғи маърифат» таҳти сарпарастӣ ва бо Амри Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо мақсади амалисозии ҳадафҳои «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» баргузор карда мешавад.

Тибқи Низомномаи озмун барои ғолибият дар даври ҷумҳуриявии озмун ба иштирокчиён 35, 25 ва 15 ҳазор сомонӣ мукофот пешбинӣ шуда, ҳамчунин омӯзгорони онҳо бо мукофот ва унвони “ Аълочии маориф ва илми Тоҷикистон”, волидонашон бо нишони “Маърифатпарвар” ва Ифтихорномаи Академияи миллии илмҳои Ҷумҳурии Тоҷикистон сарфароз гардонида мешаванд.

Зимнан, дар даврии шаҳрии ин озмун 1336, вилоятии он 56 нафар хонандагону донишҷӯёни муассисаҳои таълимии шаҳр иштирок намуда, 9 нафар ба даври ниҳоии он роҳхат гирифта буданд.

Мақомоти иҷроияи маҳаллии ҳокимияти давлатии шаҳр ин ғолибиятро ба Муҳаммадҷон, омӯзгорон ва волидонаи ӯ муборакбод намуда, ба дигар иштирокчиёни даври ниҳоии ин озмуни бонуфуз, ки ҳоло идома дорад, барор орзу мекунад.