Санаи 18 сентябри соли равон иҷлосияи бистуми Маҷлиси вакилони халқи шаҳри Панҷакент, даъвати шашум таҳти раёсати раиси Маҷлиси вакилони халқи шаҳр, раиси шаҳр Абдухолиқ Холиқзода баргузор шуд.

Дар иҷлосия намояндаи мақомоти иҷроияи ҳокимияти давлатии вилояти Суғд, сардори раёсати фарҳанги вилоят Бахтиёр Қосимов, вакилони Маҷлиси халқи вилоят, муовинони раиси шаҳр, роҳбарони воҳидҳои сохторӣ, мақомоти ҳифзи ҳуқуқ, мудирони шуъбаҳои дастгоҳ ва бахшҳои мақомоти иҷроияи маҳаллии ҳокимияти давлатии шаҳр, роҳбарони корхонаю ташкилотҳо, муассисаҳои таълимӣ, фарҳангӣ, раисони ҷамоатҳои деҳот, маҳаллаҳои шаҳр, намояндагони васоити ахбор иштирок намуданд.

Аз рӯи масъалаи якуми рӯзномаи иҷлосия - “Оид ба рафти иҷрои Қарори Ҳукумати Ҷумҳурии Тоҷикистон аз 03.04.2021, № 115 “ Дар бораи Барномаи давлатии рушди муассисаҳои фарҳангии Ҷумҳурии Тоҷикистон барои солҳои 2021-2025” муовини раиси шаҳр, вакил аз ҳавзаи интихоботии Лаби Чашма, № 3 Парвина Нақибӣ маърӯза кард.

Аз рӯи ин масъала вакил аз ҳавзаи интихоботии Зардолузор, № 2 Маҳмадмурод Сафаров маърӯзаи иловагӣ намуда, вакилон аз ҳавзаи интихоботии Ёрӣ, № 21 Азимҷон Икромов, аз ҳавзаи интихоботии Вашанӣ, № 4 Гулпарӣ Шарифова ба музокира баромаданд.

Дар маърӯза ва музокираҳо вакилон рафти иҷрои Барномаи зикршударо баррасӣ намуда, рушди муассисаҳои фарҳангӣ, беҳдошти фаъолияти онҳоро чун яке аз омилҳои ба чорабиниҳои фарҳангӣ бештар ҷалб намудани аҳолӣ ва баланд бардоштани сатҳи маърифати ҷомеа муҳим арзёбӣ намуданд.

Баъди баррасӣ ва саволу посухҳо иҷлосия аз рӯи ин масъала қарор қабул намуд.

Вакилон тибқи рӯзномаи иҷлосия ҳисоботи комиссияи доимии Маҷлиси вакилони халқи шаҳр оид ба масъалаҳои сиёсати аграрӣ, хурокворӣ, меҳнат ва хидмарасонӣ, ки бо он раиси комиссия, вакил аз ҳавзаи интихоботии Соҳибназар № 10 Нусратулло Қӯчқоров сухан кард ва ҳисоботи вакили Маҷлиси вакилони халқ аз ҳавзаи интихоботии Мазори шариф, № 29 Қамариддин Азизмуродовро дар бораи иҷрои ваколатҳои вакилиаш шунида, дар ин бора қарор қабул намуданд.

Вакилони Маҷлиси шаҳрӣ дар идомаи иҷлосия қарорҳои раиси шаҳрро тасдиқ намуданд.

Дар иҷлосия намояндаи мақомоти иҷроияи ҳокимияти давлатии вилояти Суғд Бахтиёр Қосимов сухан кард.

Дар фарҷоми иҷлосия дар назди ҳозирин раиси шаҳр Абдухолиқ Холиқзода баромад намуда, таваҷҷӯҳи онҳоро ба иҷрои дастурҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар мулоқот бо фаъолон ва ходимони дини мамлакат, суханронӣ дар Рӯзи дониш ва супоришҳои муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд, муҳтарам Раҷаббой Аҳмадзода ҷиҳати таҳкими фаъолияти муассисаҳои фарҳангӣ, мубориза бо падидаҳои экстремистию террористӣ, пешгирии гароиш ба ақидаҳои ифротӣ, дар сатҳи баланд ва муташаккилона баргузор намудани маъракаи даъвати ҷавонон ба хидмати ҳарбӣ ҷалб намуд.