ҲОСИЛИ ФАРОВОНИ КИШОВАРЗОНИ МОҒИЁН
2024-08-31 14:51:26
Кишоварзони хоҷагиҳои деҳқонии Ҷамоати деҳоти Моғиёни шащри Панҷакент ҳосили дастранҷи имсолаашонро ба маърази ҳамдиёрон гузоштанд.
Ҳоло дар кооперативи истеҳсолӣ- тиҷоратии “Моғиён”, ки аксари саҳмдоронро сарҷамъ намудааст ва хоҷагиҳои деҳқонию инфиродӣ ҷамъоварии ҳосили картошкаю сабзавот ва мева идома дорад.
Зимни боздиди раиси шаҳр Абдухолиқ Холиқзода гуфта шуд, ки иқлими Моғиён барои истеҳсоли картошка мувофиқ аст ва деҳқонон имсол майдони кишти онро ба беш аз 170 гектар расонидаанд.
Баъди ҷамъоварии ҳосил картошка заминҳо барои кишти тирамоҳии ғалла омода карда мешавад. Аз ҷумла, кишоварзони деҳаи Ғезан аз кишти такрории картошка, ки баъди дарави ҳосили ҷав кишт карда буданд,ҳосили хуб ба даст овардаанд.
Имсол дар Моғиён мева ҳам фаровон аст ва он на танҳо ба бозори шаҳр, балки шаҳрҳои Душанбею Хуҷанд низ содир карда мешавад.
