ДАР ДЕҲАИ ҒАЗЗАИ ДЕҲОТИ ВОРӮ ДУ МЕҲМОНХОНАИ НАВ ИФТИТОҲ КАРДА ШУД
2026-09-15 17:04:32
Дар деҳаи Ғаззаи деҳоти Ворӯи шаҳри Панҷакент дирӯз бо иштироки раиси шаҳр Абдухолиқ Холиқзода барои пазироии сайёҳон ва меҳмонон боз ду меҳмонхонаи нав мавриди истифода қарор дода шуд.
Меҳмонхона барои сайёҳону меҳмонон, ки соҳибкор Деваштич Шарифбадалов дар мавзеъи хушобу ҳавои Симиганҷ, дар соҳили Рӯзрӯд бо тарҳи зебо бо ҳамин ном бунёд намудааст, барои 20 нафар пешбинӣ шуда, дар он ҳама шароити зарурӣ муҳайё карда шудааст.
Дар ин ҷо ҳамчунин барои пазироии сайёҳон, ки мехоҳанд дар хаймаҳо буду бош дошта бошанд, ҷойи мувофиқ, хаймаҳои замонавӣ муҳайё шудааст.
Дар меҳмонхонаи дигар, ки аз ҷониби сарвари ширкати “Рӯзрӯд” Муродулло Латифов дар соҳили рости Рӯзрӯд бо тарҳи ҷолиб бунёд шудааст,10 нафар сайёҳон метавонанд, бо фароғат истироҳат намоянд ва аз гулмоҳӣ, ки инҷо дар ҳавзҳо парвариш карда мешаванд, истеъмол кунанд.
Дар деҳаи Ғазза, ки яке аз хатсайрҳои сайёҳӣ ба кӯҳҳои Фон аз тариқи он убуру мурур мекунад, бо ифтитоҳи ин ду меҳмонхона шумораи онҳо ба чор адад расид ва дар онҳо беш аз 60 нафар дар як вақт пазироӣ карда мешаванд.
Дар иншооти сайёҳии деҳа беш аз 12 нафар сокинони деҳа соҳиби ҷойи кор шудаанд.
