Субҳи 7 сентябр дар хиёбони Абӯабдуллоҳ Рӯдакии шаҳри Панҷакент ба ифтихори ҷашни бузурги таърихии 35- солагии истиқлоли давлатии Ҷумҳурии Тоҷикистон бо иштироки беш аз 2000 нафар афсарону сарбозони қисмҳои ҳарбии мустақар дар ҳудуди шаҳр ва ҳайати захираҳои сафарбарӣ аз корхонаю ташкилоту муассисаҳо гузашти низомӣ баргузор шуд.

Гузашти низомӣ бо садо додани Суруди миллӣ ва сухани табрикии раиси шаҳр Абдухолиқ Холиқзода оғоз ёфт.

Гуфта шуд, ки аз рӯзҳои аввали ба истиқлол расидани Тоҷикистон, баргузории Иҷлосияи таърихии шонздаҳуми Шӯрои Олӣ бо талошҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои бунёди Қувваҳои Мусаллаҳи кишвар асос гузошта шуд ва тӯли даврони истиқлол он ба нерӯи муқтадири ҳифзи озодӣ, фазои сулҳу салоҳ, амнияти ҷомеъа табдил ёфт.

Иштирокчиёни гузашти низомӣ бо қадамзании устувору сарбаландона ва ифтихор аз Ватани озоду обод садоқаташонро ба ғояҳои истиқлоли Ватан, сиёсати Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои мусаллаҳи Тоҷикистон, муҳтарам Эмомалӣ Раҳмон, ҳифзи дастовардҳои истиқлол собит намуданд.