Субҳи имрӯз бо иштироки муовини аввали раиси Маҷлиси намояндагони Маҷлиси Олии Ҷумҳурии Тоҷикистон Шермуҳаммад Шоҳиён, вакилони Маҷлиси намояндагон Парвиз Шодизода, Қиёмиддин Давлатзода , ки бо сафари корӣ дар Панҷакент қарор доранд ва раиси шаҳр Абдухолиқ Холиқзода, 2100 метри роҳи деҳаи Миндонаи деҳоти Ёрӣ баъди итмоми корҳои ободонӣ ва муфаршнамоӣ ба истифода дода шуд.

Дар ҷамъомад бо сокинони деҳа, ки ба ин муносибат баргузор шуд, таъкид гардид, ки ободонӣ ва мумфарш кардани роҳи деҳа дастовези арзандаи онҳо ба 35- солагии истиқлоли давлатии Тоҷикистон аст ва ба ин иқдоми онҳо баҳои баланд дода шуд.

Гуфта шуд, ин қитъаи роҳ бо харҷи беш аз ду миллион сомонӣ саҳмгузории сокинони деҳа, бо ҷалби техникаҳои роҳсозӣ аввал ҳамвору бозсозӣ ва баъдан мумфарш карда шуд.

Ёдоварӣ шуд, ки соли равон аз болои дарёи Зарафшон дар паҳлӯи деҳаи Қумоқ бо дастгирии Вазорати нақлиёти Ҷумҳурӣ ва мақомоти иҷроияи маҳаллии ҳокимияти давлатии шаҳр пули нав мавриди истифода қарор гирифта роҳи ду паҳлӯи он мумфарш гардид ва он масофаи деҳаҳои Миндона, Вешист ва Зиддеҳро бо шаҳр хеле наздик намуд.

Таъкид гардид, ки дар даврони истиқлоли кишвар бо роҳнамоии Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар ҳама гӯшаю канори кишвар корҳои ободонӣ вусъат ёфта, лоиҳаҳои бузурге дар соҳаҳои гуногун амалӣ карда шуданд.

Сокинони деҳа иброз доштанд, ки бо даст додани имконият наздик ба ду километр роҳи кӯчаҳои зодгоҳашонро низ мумфарш менамоянд.