Дар мулоқоти Ваколатдор оид ба ҳуқуқи инсон дар Ҷумҳурии Тоҷикистон Умед Бобозода бо фаъолони шаҳри Панҷакент, ки бо иштироки раиси шаҳр Абдухолиқ Холиқзода баргузор шуд, мӯҳтавои моддаи 5-и Қонститутсияи Ҷумҳурии Тоҷикистон, ки дар он инсон, ҳуқуқ ва озодиҳои ӯ арзиши олӣ дониста шудааст ва дастуру супоришҳои Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, ки дар Паём ба Маҷлиси Олӣ дар ин самт баён шудаанд, шарҳу тавзеҳ дода шуд.

Таъкид шуд, ки таъмини ҳуқуқу озодиҳои инсон, риояи принсипи баробарӣ ва пешгирии ҳама гуна шаклҳои табъиз яке аз самтҳои муҳими сиёсати иҷтимоии давлату Ҳукумати Ҷумҳурии Тоҷикистон маҳсуб ёфта, дар ин самт заминаҳои мустаҳками ҳуқуқӣ ва институтсионалӣ фароҳам оварда шудаанд.

Дар мулоқот ҳамчунин муҳтавои Қонуни Ҷумҳурии Тоҷикистон «Дар бораи баробарӣ ва барҳам додани ҳама гуна шаклҳои табъиз», роҳҳои амалисозии он, пешгирии муносибатҳои табъизомез, таъмини ҳуқуқу озодиҳои инсон ва шаҳрванд, таҳкими волоияти қонун ва баланд бардоштани маърифати ҳуқуқии аҳолӣ шарҳу тавзеҳ дода шуд.