Дар деҳаи Роҷи деҳоти Амондараи шаҳри Панҷакент, ки ба асари сели рӯзи 19 июни соли равон хисороти ҷиддӣ дида буд, бо дастгирии мақомоти иҷроияи маҳалии ҳокимияти давлатии шаҳр корҳои асосии бартараф намудани оқибати офати табиӣ анҷом дода шуд.

Дар ин раванд ҳамаи манзилҳое, ки ба асари сел лойоба даромада буд, тоза карда, роҳ кушода, хати барқ ва об барқарор карда шуданд.

Бо иштироки раиси шаҳр Абдухолиқ Холиқзода, вакилони Маҷлиси вилоятӣ, сокинони деҳа ва фаъолони деҳоти Амондара се пул, ки ду қисмати деҳаро ба ҳам мепайваст ва ба асари сел аз байн рафта буданд, 4 канали хурди оби полезӣ ва хати оби нӯшокию полезии деҳа мавриди истифода қарор дода шуд.

Дар маросими ифтитоҳи пулҳо гуфта шуд, ки тибқи супориши муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд муҳтарам Раҷаб Аҳмадзода зимни боздид аз деҳа ва рафти барқарор намудани оқибати офати табиӣ вакилони Маҷлиси вакилони халқи вилояти Суғд-Раҳмонқул Каримов, Муаззамхон Ансорӣ, Мастона Муродзода, Умед Ҳабибзода ва Шавкат Бобозода се пули ба асари сел азбайнрафтаи сои селрави байни деҳаро дар муддати кӯтоҳ барқарор намуданд.

Ҳамчунин, зикр шуд, ки сардори идораи обу ташноби шаҳр Ҳабибулло Нурзода аз ҳисоби шахсиаш барои хати оби нӯшокию полезии деҳа таҷҳизоти обкашӣ, лӯлаи об ва кабел дастрас намуд.

Ҳоло бартараф намудани оқибатҳои офати табиӣ дар дигар самтҳо дар деҳа илома дошта, ин кор зери назорати мақомоти иҷроияи маҳаллии ҳокимияти давлатии шаҳр қарор дорад.