Дараи Шинги шаҳри Панҷакент бо кӯлҳои афсонавии Ҳафткӯл кайҳост таваҷҷӯҳи сайёҳони дохилию хориҷӣ ва дӯстдорони табиатро ба худ ҷалб менамояд.

Солҳои охир дар заминаи таваҷҷӯҳи Ҳукумати кишвар ба рушди сайёҳӣ чун соҳаи фоидаовар ва шуғлофар ва дастгирии мақомоти иҷроияи маҳаллии ҳокимияти давлатии шаҳри Панҷакент дар соҳил ин кӯлҳо пойгоҳҳои муҷаҳҳази сайёҳӣ ва пазироии меҳмонони дохилию хориҷӣ бунёд карда мешаванд.

Раиси шаҳр Абдухолиқ Холиқзода зимни сафари корӣ ба деҳоти Шинг аз рафти бунёди чанде аз онҳо дидан намуд.

Дар соҳили кӯли Нофини ин силсилакӯлҳо соҳибкор Ҷумъабой Шаҳмаев бо дастгирии мақомоти иҷроияи маҳаллии ҳокимияти давлатии шаҳр барои сайёҳон меҳмонхона ва пойгоҳи сайёҳӣ бунёд кардааст. Ҳоло бинои дуқабатаи меҳмонхона бо 25 ҷой ба қабули сайёҳон омода буда, дар ҳуҷраҳои он катҳои бароҳати хоб ва дигар ҷиҳози зарурӣ гузошта шудааст.

Айни замон таҷҳизонидани ошхона ва ободу зебо ва сабзкорӣ намудани саҳни пойгоҳ идома дорад.

Дар соҳили кӯли сеюми Ҳафткӯл бошад аз ҷониби соҳибкор Руслан Ҳамроқулов сохтмони калонтарин пойгоҳи сайёҳӣ дар ин минтақа бо ҳама шароити замонавӣ идома дорад.

Дар бинои сеқабата бо тарҳи зебо ҳоло корҳои пардозгарӣ ва ороишӣ бомаром идома дошта, баъди итмоми корҳо дар он то 80 нафар сайёҳон ва меҳмонон дар як вақт пазироӣ карда мешаванд.

Саҳни пойгоҳ сабзкорӣ шуда, садҳо бех ниҳолҳои ороишӣ шинонида, ин ҷо бунёди фаввора низ пешбинӣ шудааст. Дар соҳили кӯл низ барои истироҳат айвон ва ҳуҷраҳо бунёд шуда, роҳаткурсиҳо гузошта шудаанд.

Тавре иттилоъ дода шуд, дар пойгоҳ парвариши мурғобӣ ва харгӯш низ роҳандозӣ шуда,ҳоло шумораи мурғобӣ ба 60 ва харгӯш ба 100 сар мерасад. Гӯшти парҳезии онҳо барои сайҳону меҳмонони ояндаи пойгоҳ пешниҳод мешавад.

Дар соҳили охирин кӯли Ҳафткӯл- Ҳазорчашма, низ рӯзи боздид даҳҳо нафар сайёҳони дохилӣ ва хориҷӣ машғули истироҳат буданд. Ин ҷо барои пазироӣ ва хидматрасонии сайёҳон ва дӯстдорони тамошои табиати фусункори атроф соҳибкорони маҳаллӣ хаймаҳо гузоштаанд ва дар оянда ин ҷо низ бунёди пойгоҳи муҷаҳҳази сайёҳӣ дар назар дошта шудааст.

Дар ҷараёни боздид аз масъулини ширкатҳои сайёҳӣ даъват шуд, ки ба тозаю озода нигоҳ доштани муҳити атроф, пешгирии партовафканӣ дар соҳил кӯлҳо пешгирӣ намоянд ва шуъбаи ҳифзи муҳити зисти шаҳр дар мавсими сайёҳӣ ин корро зери назорати доимӣ қарор диҳад.