Ҷаласаи Ситоди ҳолатҳои фавқулода ва мудофиаи граждании мақомоти иҷроияи маҳаллии ҳокимияти давлатии шаҳри Панҷакент бегоҳи имрӯз дар деҳаи Роҷи деҳоти Амодара, ки аз сели рӯзи 19 июн хисороти ҷиддӣ дидааст, баргузор шуд.

Дар ҷаласа, ки таҳти раёсати раиси шаҳр, сардори ситод Абдухолиқ Холиқзода, иштироки муовини сардори Раёсати Кумитаи ҳолатҳои фавқулода ва мудофиаи гражданӣ дар вилояти Суғд Ҷамшед Кӯчаков, аъзоёни ситод, фаъолони деҳоти Амондара ва сокинони деҳаи Роҷ доир гардид, рафти бартараф намудани оқибати офати табиӣ баррасӣ шуд.

Тавре аз гузориши муовини сардори ситоди шаҳрӣ, сардори шуъбаи шаҳрии раёсати вилоятии Кумитаи ҳолатҳои фавқулода ва мудофиаи гражданӣ Умед Миров зикр шуд, ба асари омадани сел ба манзилҳои истиқоматӣ, иншооти ёрирасон, роҳ, хати обу барқ, заминҳои кишт ва амволи сокинон зиёни ҷиддӣ ворид шудааст.

Гуфта шуд, ки ба сабаби сел ба манзили истиқоматӣ, иншооти ёрирасон ва заминҳои наздиҳавлигии 43 оила ва хонаи фарҳанги деҳа селоба ворид шуда, 3 пул ва 900 метр роҳ, ду пойгоҳи обрасон, панҷ симчӯби барқ корношоям гардида,3 нақлиёти боркаш ва сабукрав, ҳашт сар чорво ба коми сел рафтааст.

Ситоди ҳолатҳои фавқулода ва мудофиаи граждании мақомоти иҷроияи маҳаллии ҳокимияти давлатии шаҳр барои бартараф намудани оқибати офати табиӣ чораҳои фаврӣ андешида, ба ин кор 5 адад техникаи муҳандисӣ, 140 нафар сарбозони қисмҳои ҳарбии мустақар дар ҳудуди шаҳр ва сокинони деҳа сафарбар карда шуданд.

Давоми ду рӯз 500 метр роҳи дохили деҳа тоза карда, хати интиқоли барқ асосан барқарор намуда, аз лойоба тоза намудани манзилҳои истиқоматии сокинон ва барқарор намудани ҷӯйё, ки деҳаро бо оби полезӣ ва нӯшокӣ таъмин менамояд, бомаром идома дорад.

Ба ҳайати ситоди шаҳрӣ, роҳбарони ташкилоту муассисаҳои марбута, ҷамоати деҳот ва фаъолон дастур дода шуд, ки бо ташкили ҳашарҳо дар кӯтоҳтарин фурсат манзилҳои зиёндида аз лойоба тоза карда, қисмати боқимондаи роҳи байни деҳа барқарор карда, ба тоза намудани заминҳои наздиҳавлигӣ шурӯъ намуда, шумораи манзилҳои истиқоматӣ, ки дар минтақаи хавфноки канори селгаҳ, ҷойгиранд, муайян карда шаванд.

Ҳачунин масъулин вазифадор карда шуданд, ки ҳамаи ашёи рӯзгори сокинон, ки ба асари сел корношоям гардидаанд, ва заминҳои кишти зиёндида пурра ба ҳисоб гирифта шавад.

Таъкид шуд, ки рафти бартараф намудани оқибати офати табиӣ дар деҳа мавриди таваҷҷӯҳи пайвастаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон мақомоти иҷроияи маҳаллии ҳокимияти давлатии вилояти Суғд ва Ситоди ҳолатҳои фавқулода ва мудофиаи граждании мақомоти иҷроияи маҳаллии ҳокимияти давлатии шаҳри қарор дорад ва барои ин аз ҳамаи имкониятҳо истифода карда мешавад.