Рӯзи 20 июн дар Боғи фарҳангию фароғатии ба номи Садриддин Айнии шаҳри Душанбе дар асоси Амри Президенти Ҷумҳурии Тоҷикистон аз 2 январи соли 2026, №АП-952 ба ифтихорп 35- солагии истиқлоли давлатии Ҷумҳурии Тоҷикистон рӯзҳои фарҳанги шаҳри Панҷакент дар шаҳри Душанбе бо шукуҳу шаҳомати хоса, бо иштироки ҳазорон нафар сокинони ва меҳмонони пойтахти мамлакат баргузор гардид.

Муовини раиси шаҳри Душанбе Раҳимзода Толиб Карим , муовини якуми раиси ноҳияи Исмоили Сомонӣ Бозорзода Рустам Бозор ва дигар меҳмонони ҷашнвора, бо мушоияти раиси шаҳри Панҷакент Абдухолиқ Холиқзода аз растаҳои намоиши ҳунарҳои мардумӣ, таомҳои миллӣ, маҳсулоти кишоварзию саноатии шаҳр дидан намуда, ба он баҳои баланд доданд.

Ба хотири эҳтиром ва арҷгузорӣ меҳмонон ва иштирокчиёни ҷашнвора ба оромгоҳи сардафтари адабиёти муосири тоҷик, Қаҳрамони Тоҷикистон, устод Садриддин Айнӣ гулчанбар гузоштанд.

Ба сокинон ва меҳмонони пойтахт сатҳу сифат ва тарҳи намоиши маҳсулоти кишоварзиву саноатӣ, маҳсули дасти ҳунармандони мардумӣ, таомҳои миллӣ ва дастовардҳои иҷтимоиву иқтисодии шаҳри Панҷакент писанд омад ва онҳо бо камоли майл аз таомҳои миллӣ, хоса палави овозадори Панҷакент бо биринҷи “девзира”, дигар таомҳои миллӣ, даҳҳо намуд нонҳои бо ҳавас пухтаи бонувони шаҳр чошнӣ гирифтанд.

Дар оғози барномаи ҳунарии аҳли фарҳанг ва ҳунармандони шаҳр, ки дар амфитетри ҳудуди Боғи фарҳангию фароғатии ба номи Садриддин Айнӣ баргузор шуд, муовини раиси шаҳри Душанбе Раҳимзода Толиб Карим, муовини якуми раиси ноҳияи Исмоили Сомонӣ Бозорзода Рустам Бозор барои дар сатҳи баланди ташкилӣ ва фарҳангӣ баргузор намудани рӯзҳои фарҳанги шаҳри Панҷакент изҳори сипос намуда, он намунаи боризи рушд ва нумӯи ин шаҳри бостонӣ ва арҷгузорӣ ба мероси таърихӣ ва ҳунарҳои мардумӣ, татбиқи амалии сиёсати ҳамаҷонибаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар даврони истиқлол арзёбӣ карда шуд.

Раиси шаҳр Абдухолиқ Холиқзода ба иштирокчиёни ҷашнвора Панҷакентро чун шаҳри бостонӣ, ки дар солҳои соҳибистиқлолии кишвар дар заминаи сиёсати муваффақонаи Ҳукумати мамлакат ҳамаҷониба рӯ ба рушду нумӯъ дорад, маррифӣ намуд.

Гуфта шуд, ки имрӯз Панҷакент ба яке аз марказҳои калони саноатӣ, иқтисодӣ ва сайёҳии Тоҷикистон табдил ёфтааст. Бунёди коргоҳи истихроҷи тиллои «Зарафшон», нақбҳои «Истиқлол» ва «Шаҳристон», навсозии роҳи мошингарди Айнӣ – Панҷакент, пайваст шудани шабакаҳои барқии Панҷакент ба хатти баландшиддати ЛЭП – 500-и Ҷануб – Шимол, шинондани таҷҳизоти гаронарзиши тақсиму танзими барқ дар шабакаи мазкур, бунёди кӯчаю роҳҳои обод, муассисаҳои сершумори таъиноти иқтисодӣ, иҷтимоӣ ва фарҳангӣ, майдонҳо, гулгаштҳои зебою фараҳбахш, ба Феҳриси мероси башарии ЮНЕСКО ворид шудани шаш ёдгории беназири таърихӣ, ба истиқболи ҷашни 35-солагии истиқлоли давлатии Тоҷикистон ба истифода додани беш аз ҳазор иншооти таъиноти гуногун аз ҷумлаи корҳои муҳиму бузурги иҷрошуда мебошанд.

Санъаткорони шаҳр бо пешниҳоди барномаи рангини фарҳангиву консертӣ, суруду таронаҳои ватандӯстона ва рақсу оҳангҳои миллӣ табъи иштирокчиёнро болида гардонида, фарҳангу суннатҳои неки миллати тоҷикро муаррифӣ намуданд