Чу меборад ба сар борони меҳрат,

Маро бо шеъри боронӣ садо кун!

Душанбе қиблаи армони ман шуд,

Маро чун тоҷикистонӣ садо кун!

Ин байтҳо аз шеъри “ Маро чун тоҷикистонӣ садо кун”-и дорандаи нишони “Хидмати шоиста”, барандаи ҷоизаи адабии ба номи Камоли Хуҷандӣ, “Нишони сухан”-и Иттифоқи нависандагон, Аълочии фарҳанги Тоҷикистон, Аълочии матбуоти Тоҷикистон, шоир, рӯзноманигор ва омӯзгор, раиси бахши шаҳрии Иттифоқи нависандагони Тоҷикистон Исмоил Зарифӣ дар маҳфили адабӣ- фарҳангӣ, ки ба ифтихори 70-солагии ӯ бегоҳи дирӯз бо ибтикори мақомоти иҷроияи маҳаллии ҳокимияти давлатии шаҳри Панҷакент бо иштироки аҳли адабу фарҳанг, омӯзгорон ва ҷавонон дар Кохи фарҳанги ба номи Олим Бобоев баргузор шуд, борҳо садо дод.

Соҳибҷашнро нахуст раиси шаҳр Абдухолиқ Холиқзода бо ин санаи умр табрик намуда, аз хидматҳои арзандаи ӯ дар тараннуми озодию истиқлол, садоқат ба Ватан, тарбияи эҷодкорони ҷавон, омода намудани шогирдон барои иштирок дар озмунҳои ҷумҳуриявӣ, муаррифии осори адибони клласик ва муосири ҳавзаи адабиёти форсӣ- тоҷикӣ, мавқеи фаъоли ҷамъиятӣ ёдовар шуд ва тӯҳфаи идонаи мақомоти иҷроияи маҳаллии ҳокимияти давлатии шаҳрро тақдим намуд.

Намояндаи Иттифоқи нависандагони Тоҷикистон, шоир Абдурауф Муродӣ, Шоири халқии Тоҷикистон Камол Насрулло, раиси шуъбаи тоҷикии Иттифоқи нависандагони Ӯзбекистон дар вилояти Самарқанд Асадулло Шукуров, дигар адибону ҳамкорон ва дӯстон, шогирдони соҳибҷашн ӯро ба ин муносибат шодбош гуфтанд.

Маҳфили адабӣ- фарҳангӣ ба муносибати 70- солагии Исмоил Зарифӣ бо садо додани сурудҳо бар ашъори ӯ аз ҷониби санъаткорони шаҳр, тақдими китобҳои тозанашри ашъори шоир ба ҳаводорону мухлисони шеър хотима ёфт.