ДАР БОСТОНДЕҲ БИНОИ НАВИ ТАЪЛИМГОҲ БА ИСТИФОДА ДОДА ШУД
2025-09-01 17:25:53
Дарси сулҳ имрӯз дар муассисаи таҳсилоти миёнаи умумии № 121-и деҳаи Бостондеҳи ҷамоати деҳоти Саразми шаҳри Панҷакент дар бинои нав баргузор шуд. Дар маросими ифтитоҳи бинои иловагии таълимгоҳ, ки аз ду қабат ва шаш синфхонаи барҳаво иборат аст, раиси шаҳр Абдухолиқ Холиқзода ва намояндаи мақомоти иҷроияи ҳокимияти давлатии вилояти Суғд – сардори Раёсати Агентии назорати маориф дар вилояти Суғд Акмал Оқилзода иштирок намуданд. Дар ҷамъомади омӯзгорону хонандагон ва фаъолони деҳа, ки ба ин муносибат баргузор шуд, онҳо бо оғози соли нави таҳсил ва Рӯзи дониш муборакбод гуфта, барои саҳмгузорӣ дар бунёди бинои нави иловагии таълимгоҳ изҳори сипос карда шуд. Бо мавриди истифода қарор додани бинои нав, ки дар ду баст 300 нафар таълим мегиранд, мушкилоти норасоии ҷойи нишаст дар таълимгоҳ ҳалли худро ёфтааст. Дар маҷмӯъ дар таълимгоҳи мазкур 610 нафар хонандагон ба таҳсил фаро гирифта, ба онҳо 40 нафар омӯзгорон таълим медиҳанд. Ба хонандагони таълимгоҳ тӯҳфаи мақомоти иҷроияи маҳаллии ҳокимияти давлатии шаҳр- ду адад компутер, тақдим карда шуд.
