Бегоҳи дирӯз дар Кохи Лоиқи шаҳри Панҷакент бо иштироки Шоирони халқии Тоҷикистон Фарзона ва Озарахш ва аҳли адабу фарҳанги шаҳр маҳфили адабӣ- фарҳангии “Ҳумоюн” баргузор шуд.

Қабл аз оғози маҳфил Фарзона ва Озарахшро раиси шаҳр Абдухолиқ Холиқзода ба ҳузур пазируфт.

Дар сӯҳбати гарму самимӣ таъкид шуд, ки маҳфили адабӣ-фарҳангии “Ҳумоюн” бо ибтикори ин шоирони номвари тоҷик бо мақсади тарғиб ва муаррифии ашъори ноби адибон, суруду мусиқии асили тоҷикӣ- форсӣ, дарёфту тарбияи адибони ҷавони соҳибистеъдод ташкил ва роҳандозӣ шудааст ва ҷавобгӯи ҳадафҳое мебошад, ки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи бунёди ҷомеаи мутамаддин, тарбияи насли огоҳи ояндасоз ба миён гузоштаанд ва ҷиҳати иҷрои онҳо бо роҳбарии муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд муҳтарам Раҷаб Аҳмадзода дар вилоят корҳои зиёде ба ҷо оварда мешавад.

Ба Шоирони халқии Тоҷикистон чун барги сабз тӯҳфаҳои мақомоти иҷроияи маҳаллии ҳокимияти давлатии шаҳр тақдим карда шуд.

Дар маҳфил Озарахш ва Фарзона аз таваҷҷӯҳи аҳли адабу фарҳанги шаҳр ба адабиёту фарҳанг, ғамхории мақомоти иҷроияи маҳаллии ҳокимияти давлатии шаҳр ба онҳо изҳори қаноатмандӣ намуда, аз ашъори пешина ва тозаи худ порчаҳо қироат карданд.

Ҳамчунин дар ҳузури онҳо адибон- аъзоёни бахши шаҳрии Иттифоқи нависандагони Тоҷикистон, адибони ҷавон, ки аз шаҳри Душанбе омадаанд, навқаламон ашъори худро манзур намуданд.

Дар идомаи маҳфил меҳмонони он- муҳаққиқи санъати мусиқӣ, овозхон ва шоир аз Ҷумҳурии исломии Эрон ҳамроҳ бо санъаткорони шаҳру вилоят шеъру тарона хонданд ва хотири иштирокчиёни маҳфилро шод намуданд.

Дар бахши Саъдихонии маҳфил ҳозирин аз ашъори ноби ин шоири бузурги форсу тоҷик ёдоварӣ карданд.

Шоирони халқии Тоҷикистон Фарзона ва Озарахш аз пазироии гарм, таваҷҷӯҳ ба шеър, ба адабиёту мусиқӣ, ки дар ҷараёни баргузории маҳфил аз ҷониби иштирокчиён зуҳур шуд, изҳори шодмонӣ намуданд.