ИФТИТОҲИ МАРКАЗИ НАВИ ХИДМАТРАСОНӢ ВА МАИШӢ
2025-08-26 11:19:53
Дар деҳаи Сӯҷинаи Ҷамоати деҳоти Сӯҷинаи шаҳри Панҷакент бо мусоидати мақомоти иҷроияи маҳаллии ҳокимияти давлатии шаҳр ва сармоягузории соҳибкор Хисрав Эгамбердиев маркази хидматрасонӣ ва маишӣ мавриди истифода қарор дода шуд.
Тавре зимни ифтитоҳи марказ ба раиси шаҳр Абдухолиқ Холиқзода иттилоъ доданд, он аз толори барҳаво барои баргузории маъракаҳо иборат буда, дар таҳхонааш ҳаммоми замонавӣ ҷой дода шудааст.
Дохили толор бо ҷалби устоҳои чирадаст бо усули миллӣ гаҷкорӣ шуда, барои пазироии мизоҷон ҳамаи шароити мусоидро доро аст.
Баъди ифтитоҳ дар марказ маросими хатнасури ҳафт нафар кӯдакон аз оилаҳои камбизоат баргузор шуда, ба 15 нафар кӯдакон аз оилаҳои эҳтиёҷманд сару либос ва ҷиҳози мактабӣ тақдим карда, барои онҳо дастархон густурда шуд.
Ҳоло дар ҳудуди маркази хидматрасонӣ сохтмони нонвойхона идома дорад ва он рӯзҳои наздик ба истифода дода мешавад.
