Рафти иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон оид ба таъмини рушди соҳаи маориф, Стратегияи миллии рушди маорифи Ҷумҳурии Тоҷикистон барои давраи то соли 2030 дар муассисаҳои таълимии шаҳри Панҷакент дар машварати августии кормандони соҳаи маорифи шаҳр бо иштироки раиси шаҳр Абдухолиқ Холиқзода, намояндаи раёсати маорифи вилояти Суғд Бахтиёр Саҳадов, сарварони муассисаҳои таълимӣ ва омӯзгорон мавриди муҳокима қарор гирифт.

Қабл аз оғози машварат иштирокчиён аз намоиши ҳунари аъзоёни маҳфилҳои муассисаи таҳсилоти иловагӣ ва кӯдакистонҳо дидан намуданд.

Дар суханронии раиси шаҳр зимни баррасии рафти иҷрои Стратегияи миллии рушди маорифи Ҷумҳурии Тоҷикистон барои давраи то соли 2030 дар муассисаҳои таълимии шаҳри Панҷакент, аз ҷумла зикр карда шуд, дар мулоқот бо фаъолони шаҳри Панҷакент Пешвои муаззами миллат санаи 11 июл дастовардҳоро дар соҳаи маориф дар даврони истиқлол бо далелҳо баён дошта, баробари ин вазифаҳо дар ин соҳаи калидӣ муайян намуданд.

Зимни ин ташриф Пешвои муаззами миллат бинои муассисаи таҳсилоти миёнаи умумии № 115-и деҳаи Боғчаи Ҷамоати Шингро ифтитоҳ намуда, дар деҳаи Навободи Ҷамоати деҳоти Лоиқ Шералӣ кӯдакистон, ки 300 нафар кӯдаконро ба тарбия фаро мегирад ва дорои ҳама шароитҳои замонавӣ аст, мавриди истифода қарор доданд.

Дар ҳамин ҷо Пешвои миллат ба таври фосилавӣ ба фаъолияти муассисаи таҳсилоти томактабӣ дар деҳаи Суҷина барои 120 кӯдак, бинои муассисаи таҳсилоти миёнаи умумӣ дар деҳаи Косатарош барои 520 хонанда дар ду баст, синфхонаҳои иловагӣ дар деҳоти Сор барои 120 хонанда оғоз бахшиданд.

Мақомоти иҷроияи маҳаллии ҳокимияти давлатии шаҳр барои дар амал татбиқ намудани ҳадафҳое, ки дар Стратегияи номбурда муайян шудаанд, давоми солҳои охир бо истифода аз ҳамаи имкониятҳои дастрас ҷиҳати таъмини молиявии рушди маориф, мустаҳкам намудани пойгоҳи моддӣ- техникии он корҳои зиёдеро ба ҷо овард ва ҳоло 60 фоизи қисми хароҷоти буҷети шаҳр ба соҳаи маориф равона шуда, дар ҳамкорӣ бо шарикони рушд, ҷалби сармояи соҳибкорон, шахсони саховатпеша, падару модарон дар соҳаи маорифи шаҳр корҳои зиёде амалӣ шуданд ва ин раванд пайваста идома меёбад.

Ҳамчунин дар машварат таваҷҷӯҳи роҳбарияти шуъбаи маориф, сарварони муассисаҳои таълимӣ, омӯзгорон ба баланд бардоштани сифати таълиму тарбия, назорати пайваста ба раванди таълим, дарёфти соҳибистеъдодҳо ва таъмини иштироки шумораи бештари хонандагон дар озмуну олимпиадаҳои ҷумҳуриявӣ, иҷрои муқаррароти қонун дар бораи масъулият барои таълиму тарбияи кӯдак, омодагӣ ба мавсими зимистон ва дигар масъалаҳои муҳими соҳа ҷалб карда шуд.

Дар машварат намояндаи раёсати маорифи вилоят Бахтиёр Сарҳадов сухан кард.

Дар фарҷоми машварат ба як гурӯҳ кормандони соҳаи маориф, сарпарастон нишони “Аълочии маориф ва илми Ҷумҳурии Тоҷикистон”, ифтихорнома ва сипосномаи Вазорати маориф ва илм, раёсати маорифи вилояти Суғд, мақомоти иҷроияи маҳаллии ҳокимияти давлатии шаҳр тақдим карда, барномаи ҷолиби ҳунарӣ пешкаш карда шуд.