БОЗДИД АЗ ИНШООТИ БУНЁДШАВАНДА
2024-11-21 11:25:07
Мақомоти иҷроияи маҳаллии ҳокимияти давлатии шаҳри Панҷакент рафти корҳоро дар иншооти тибқи нақшаи омодагӣ ба ҷашни 35-умин солгарди истиқлоли давлатии Ҷумҳурии Тоҷикистон бунёдшаванда зери назорати пайваста қарор додааст.
Дар ҳамин замина раиси шаҳр Абдухолиқ Холиқзода аз рафти бунёди кӯдакистон дар деҳаи Навобод, беморхонаи минтақавӣ барои сад кат дар деҳаи Ғӯсари Ҷамоати деҳоти Лоиқ Шералӣ ва муассисаи таҳсилоти миёнаи умумӣ дар деҳаи Боғчаи Ҷамоати деҳоти Шинг дидан намуд.
Зимни шиносоӣ бо рафти корҳои сохтмонӣ ба масъулини ширкатҳои бинокорӣ ҷиҳати тезонидани корҳо ва дар мӯҳлати пешбинишуда бо сифати хуб ба истифода омода намудани онҳо дастур дода шуд.
Дар маҷмӯъ дар шаҳри Панҷакент ба истиқболи ҷашни 35-умин солгарди истиқлоли давлатии Ҷумҳурии Тоҷикистон бунёди ҳазор иншооти таъиноти гуногун пешбинӣ шуда, то ин муддат беш аз панҷсад иншоот мавриди истифода қарор гирифта, дар беш аз сад иншоот корҳо идома доранд.
