ТАҶЛИЛИ РӮЗИ ПРЕЗИДЕНТИ ҶУМҲУРИИ ТОҶИКИСТОН
2024-11-15 13:53:39
Таҷлили Рӯзи Президенти Ҷумҳурии Тоҷикистон дар шаҳри Панҷакент бо роҳпаймоии сокинон бо аксҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, шиору овезаҳое, ки садоқат ва ҷонибдориашонро аз сиёсати давлат ва Ҳукумати кишвар ифода менамуд, оғоз ёфт.
Дар Кохи фарҳанги шаҳр маҷлиси тантанавӣ ба ифтихори Рӯзи Президенти Ҷумҳурии Тоҷикистон бо иштироки собиқадорон, фаъолон ва ҷавонон баргузор шуд.
Намояндаи мақомоти иҷроияи ҳокимияти давлатии вилояти Суғд, сардори раёсати Хадамоти назорати давлатӣ дар соҳаи тандурустӣ ва ҳифзи иҷтимоии аҳолӣ дар вилоят Илҳом Пӯлодзода паёми табрикии муовини аввали раиси Маҷлиси миллии Маҷлиси Олии Ҷумҳурии Тоҷикистон, раиси вилояти Суғд, муҳтарам Раҷаббой Аҳмадзодаро ба ҳозирин ироа намуд. Раиси шаҳр Абдухолиқ Холиқзода ҳамдиёронро бо Рӯзи Президенти Ҷумҳурии Тоҷикистон шодбош гуфт.
Дар паёмҳои шодбошӣ, аз ҷумла, аз нақши носутудании Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар барқарор намудани сулҳу субот дар ҷомеа, таҳкими низоми давлатдорӣ, рушди иқтисодию иҷтимоии мамлакат, татбиқи лоиҳаҳои азим дар соҳаҳои роҳу нақлиёт, энергетика, саноат, рушди маориф, тандурустӣ, фарҳанг, забон, таърихи пурғановати миллат, арҷгузорӣ ба фарзандони бузурги он сухан рафта, таъкид шуд, ки ба шарофати пешниҳодҳои Пешвои миллати мо Тоҷикистон дар арсаи ҷаҳонӣ чун давлати ташаббускор ҷиҳати ҳалли мушкилоти глобалии сайёра шинохта шудааст.
Дар фарҷоми ҷамъомади тантанавӣ ба ҳозирин наворҳо аз кору пайкори Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон нишон дода, барномаи ҷолиби ҳунарӣ, ки тараннумгари нақш ва ҷойгоҳи ин фарзанди фарзонаи миллат дар таърихи навини кишвар аст, манзур карда шуд.
Бахшида ба Рӯзи Президенти Ҷумҳурии Тоҷикистон дар ҳамаи ҷомеаҳои меҳнатӣ, муассисаҳои таълимии шаҳр ҳамоишу ҷамъомадҳо баргузор шуданд.
