НОЗИЯ – ҒОЛИБИ МУСОБИҚАИ БАЙНАЛМИЛАЛӢ
2024-11-12 10:50:49
Дирӯз намояндагони мақомоти иҷроияи маҳаллии ҳокимияти давлатӣ, бахши ҷавонон ва варзиши шаҳри Панҷакент дар гузаргоҳи сарҳадӣ ҳайати дастаи Ҷумҳурии Тоҷикистонро, ки аз мусобиқаи ҷаҳонии сайёҳии варзишӣ аз шаҳри Тошканди Ҷумҳурии Ӯзбекистон бо ғалаба баргаштанд, пазироӣ намуданд.
Дар ин мусобиқаи сатҳи ҷаҳонӣ, ки байни ҷавонони 17-21 ва наврасони 13-16 – сола баргузор шуд, дастаи Тоҷикистон соҳиби 4 нишони тилло, 8 нуқра ва 4 биринҷӣ гашт.
Дар байни ғолибон хонандаи синфи 10-и муассисаи таҳсилоти миёнаи умумии № 30-и шаҳри Панҷакент, дастпарвари муассисаи давлатии мактаби варзишии шаҳри Панҷакент Нозия Шамсиддинова ҳам ҳаст, ки байни ҳамсолони худ маҳорати баланд нишон дода, мақоми дуюм ва нишони нуқраро соҳиб гаштааст.
Нозия ва дигар иштирокчиёни мусобиқаи байналмилалиро бо гулу гулдаста пешвоз гирифта, барои афрохтани парчами Тоҷикистон табрик гуфтанд.
