Дар заминҳои канории деҳаи Ғӯсари Ҷамоати деҳоти Лоиқ Шералии шаҳри Панҷакент, ки соли равон бо дастгирии мақомоти иҷроияи маҳаллии ҳокимияти давлатии шаҳр, соҳибкорон ва кӯмаки шарикони рушд тавассути пойгоҳи нави обкашӣ ва хати беш аз 5 киломерӣ оби полезӣ бароварда шуд, ҳоло омода намудани заминҳо барои бунёди токзори замонавӣ идома дорад.

Зимни боздиди раиси шаҳр аз ин мавзеъ гуфта шуд, ки ин ҷо дар навбати аввал дар майдони 15 гектар бо усули нав токзор бунёд карда мешавад ва ҳоло корҳои тахту ҳамвор кардани замин, кашидани хати об, сохтмони ҳавзи захираи об, гузоштани хавоза бо ҷалби техника ва саҳмдорон идома дорад.

Ба кишоварзон мутахассисон аз шаҳри Турсунзода, ки дар бунёди токзори хавозавӣ, гирифтани ҳосили баланди ангур таҷрибаи ғанӣ доранд, маслиҳат медиҳанд.