Имрӯз дар толори мақомоти иҷроияи маҳаллии ҳокимияти давлатии шаҳри Панҷакент дар доираи чорабиниҳо бахшида ба 80- солагӣ ва бузургдошти шаҳиди роҳи барқарор намудани ҳокимияти қонунӣ, вакили Шӯрои Олӣ, аввалин сардабири нашрияи “Садои мардум” Муродуллоҳ Шерализода конфронси илмӣ- амалӣ баргузор гардид.

Дар чорабинӣ доираи васеъи олимон, ҳамкорону ҳамсафони ӯ, рӯзноманигорон аз шаҳрҳои Душанбе, Хуҷанд, Самарқанди Ҷумҳурии Ӯзбекистон ва омӯзгорону аҳли фарҳангу зиёи шаҳри Панҷакент иштирок намуданд.

Муовини раиси вилояти Суғд Зуфар Исмоилзода, раиси шаҳр Абдухолиқ Холиқзода, вакили Маҷлиси намояндагони Маҷлиси Олии мамлакат Парвиз Шодизода, сардабири ҳафтавори “Тоҷикистон” Шариф Ҳамдампур, ходими намоёни давлативу ҷамъиятӣ Эркин Раҳматуллоев, муовини сардабири рӯзномаи “Садои мардум” Далер Мерганов ва дигарон дар чорабинӣ баромад карданд.

Зимни ибрози хотираҳо аз ҳамкорӣ бо Муродуллоҳ Шерализода, аз масъулияти баланд дар иҷрои рисолати касбӣ, эҳсоси волои ватандӯстӣ, садоқат ба ғояҳои инсондӯстӣ, одобу ахлоқи ҳамида ва сифатҳои неки инсонии ӯ ёд карда шуд.

Бо истинод ба баҳои баланди Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон гуфта шуд, ки зиндагии ин шахси ҳалиму хоксор то лаҳзаҳои вопасин ба кори халқу ҷомеа бахшида шуда, месазад, ки ҳаёти ӯро корнамоӣ номид.